ನವದೆಹಲಿ: ವೈವಾಹಿಕ ಅತ್ಯಾಚಾರವನ್ನು ಅಪರಾಧೀಕರಣಗೊಳಿಸುವ ಉದ್ದೇಶ ಸರ್ಕಾರಕ್ಕೆ ಇಲ್ಲ ಎಂದು ಕೇಂದ್ರ ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಸಚಿವೆ ಮೇನಕಾ ಗಾಂಧಿ ಅವರು ಹೇಳಿದ್ದಾರೆ.

ಇಂದು ರಾಜ್ಯಸಭೆಯಲ್ಲಿ ವೈವಾಹಿಕ ಅತ್ಯಾಚಾರವನ್ನು ಅಪರಾಧೀಕರಣಗೊಳಿಸಲು ಸರ್ಕಾರ ಉದ್ದೇಶಿಸಿದೆಯೇ ಎಂಬ ಪ್ರಶ್ನೆಗೆ ಲಿಖಿತ ಉತ್ತರ ನೀಡಿದ ಸಚಿವೆ, ಭಾರತದಲ್ಲಿ ವೈವಾಹಿಕ ಅತ್ಯಾಚಾರವನ್ನು ಅಪರಾಧೀಕರಣಗೊಳಿಸಲು ಸಾಧ್ಯವಿಲ್ಲ ಎಂದಿದ್ದಾರೆ.

ಅಂತಾರಾಷ್ಟ್ರೀಯವಾಗಿ ಪರಿಭಾವಿಸಲಾಗಿರುವ ವೈವಾಹಿಕ ಅತ್ಯಾಚಾರದ ಅಪರಾಧೀಕರಣವನ್ನು ಭಾರತದಲ್ಲಿ ಅನ್ವಯಿಸಲು ಸಾಧ್ಯವಿಲ್ಲ; ಏಕೆಂದರೆ ಇಲ್ಲಿ ಬಡತನ, ಶಿಕ್ಷಣ ಮಟ್ಟ, ಅಸಂಖ್ಯ ಸಾಮಾಜಿಕ ಕಟ್ಟುಕಟ್ಟಳೆಗಳು, ಮೌಲ್ಯಗಳು, ಧಾರ್ಮಿಕ ನಂಬಿಕೆಗಳು, ಜನರ ಮನೋಭಾವ ಮುಂತಾಗಿ ಹಲವಾರು ಬಗೆಯ ತೊಡಕುಗಳಿವೆ ಎಂದು ಮೇನಕಾ ಗಾಂಧಿ ಹೇಳಿದರು.

ನ್ಯಾಯಾಲಯದ ಕಾನೂನು ಸಲಹಾ ಸ್ನೇಹಿತೆ ಇಂದಿರಾ ಜೈಸಿಂಗ್‌ ಅವರು ಈ ಹಿಂದೆ ಸುಪ್ರೀಂ ಕೋರ್ಟಿಗೆ ಸಲ್ಲಿಸಿದ್ದ ವರದಿಯಲ್ಲಿ ವೈವಾಹಿಕ ಲೈಂಗಿಕತೆಯಲ್ಲಿ ಬಲವಂತದ ಗುದ ಸಂಭೋಗ ನಡೆಸುವ ಪ್ರಕರಣಗಳನ್ನು ಐಪಿಸಿ ಸೆ.377ರ ವ್ಯಾಪ್ತಿಯೊಳಗೆ ತಾರದೆ ಐಪಿಸಿ ಸೆಕ್ಷನ್‌ 376ರ ಅತ್ಯಾಚಾರ ಅಪರಾದದಡಿ ತರಬೇಕೆಂದು ಮನವಿ ಮಾಡಿಕೊಂಡಿದ್ದರು. ಮಾತ್ರವಲ್ಲದೆ ಪರಸ್ಪರ ಒಪ್ಪಿಗೆಯ ಸೆಕ್ಸ್‌ನಲ್ಲಿ ಶಾಮೀಲಾಗುವ ಅಪ್ರಾಪ್ತ ವಯಸ್ಸಿನವರನ್ನು ಕ್ರಿಮಿನಲ್‌ ಕಾನೂನಿನ ವ್ಯಾಪ್ತಿಗೆ ತರದಿರುವ ಕಾನೂನುಗಳನ್ನು ಪುನರ್‌ ರಚಿಸಬೇಕೆಂದೂ ಅವರು ಸಲಹೆ ನೀಡಿದ್ದರು.