ಚೆನ್ನೈ: ತಮಿಳುನಾಡಿನ ಖ್ಯಾತ ನಟ ಹಾಗೂ ರಾಜಕಾರಣಿ ಆರ್.ಶರತ್ ಕುಮಾರ್ ಅವರ ಕಾರಿನಲ್ಲಿದ್ದ 9 ಲಕ್ಷ ರೂಪಾಯಿ ನಗದು ಹಣವನ್ನು ಚುನಾವಣಾಧಿಕಾರಿಗಳು ಶನಿವಾರ ವಶಪಡಿಸಿಕೊಂಡಿದ್ದಾರೆ.

ಶರತ್ ಕುಮಾರ್ ಅವರು ಮೇ 16ರಂದು ನಡೆಯಲಿರುವ ತಮಿಳುನಾಡು ವಿಧಾನ ಸಭಾ ಚುನಾವಣೆಯಲ್ಲಿ ಟುಟಿಕೊರಿನ್ ಜಿಲ್ಲೆಯ ತಿರುಚೆಂದೂರು ವಿಧಾನಸಭಾ ಕ್ಷೇತ್ರದಿಂದ ಎಡಿಎಂಕೆ ಪಕ್ಷದ ಗುರುತಿನೊಂದಿಗೆ ಸ್ಪರ್ಧಿಸುತ್ತಿದ್ದಾರೆ.

ಅಖಿಲ ಭಾರತ ಸಮತುವಾ ಮಕ್ಕಲ್ ಕಾಚಿ ಪಕ್ಷದ ಮುಖ್ಯಸ್ಥರಾಗಿರುವ ಶರತ್ ಕುಮಾರ್ ತಿರುಚೆಂದೂರಿನ ನಲ್ಲೂರು ವಿಲಕ್ಕು ಬಳಿ 9 ಲಕ್ಷ ರೂಪಾಯಿ ನಗದನ್ನು ಕಾರಿನಲ್ಲಿಟ್ಟುಕೊಂಡು ಪ್ರಯಾಣಿಸುತ್ತಿರುವಾಗ ವಿಶೇಷ ತಹಸೀಲ್ದಾರ್ ಪಿ.ವಲ್ಲಿಕನ್ನು ನೇತೃತ್ವದ ಕ್ಷಿಪ್ರಪಡೆಗೆ ಸಿಕ್ಕಿಬಿದ್ದಿದ್ದಾರೆ. ಖಜಾನೆಯಲ್ಲಿ ಹಣವನ್ನು ಠೇವಣಿ ಇರಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ರಾಜ್ಯದಲ್ಲಿ ಚುನಾವಣಾ ನೀತಿ ಸಂಹಿತೆ ಜಾರಿಗೆ ಬಂದ ನಂತರ ಚುನಾವಣಾಧಿಕಾರಿಗಳು 80 ಕೋಟಿಗೂ ಅಧಿಕ ಹಣವನ್ನು ವಶಪಡಿಸಿಕೊಂಡಿದ್ದಾರೆ. ಆದರೆ ರಾಜ್ಯದ ಒಬ್ಬ ಖ್ಯಾತ ನಟ ಹಾಗೂ ಪ್ರಮುಖ ರಾಜಕಾರಣಿ ಹಣವನ್ನು ಸಾಗಿಸುವಾಗ ಸಿಕ್ಕಿಬಿದ್ದದ್ದು ಇದೇ ಮೊದಲ ಸಲವಾಗಿದೆ.