ನವದೆಹಲಿ: ದೇಶದಲ್ಲಿನ ಕಪ್ಪು ಹಣಕ್ಕೆ ಕೊಳ್ಳೆಯಿಟ್ಟಿರುವ ಪ್ರಧಾನಿ ನರೇಂದ್ರ ಮೋದಿ ಅವರು ಇದೀಗ ವಿದೇಶಗಳಲ್ಲಿರುವ ಕಪ್ಪು ಹಣದ ಬಗ್ಗೆ ಮಾಹಿತಿ ಪಡೆಯುವ ಪ್ರಯತ್ನಕ್ಕೆ ಸ್ವಿಸ್ ಸಾಥ್ ನೀಡಿದ್ದು, ಸೆಪ್ಟೆಂಬರ್ 2019ರಿಂದ ಸ್ವಿಸ್ ಬ್ಯಾಂಕ್ ಗಳಲ್ಲಿರುವ ಭಾರತೀಯ ಖಾತೆಗಳ ವಿವರವನ್ನು ಆಟೋಮ್ಯಾಟಿಕ್ ಆಗಿ ಪಡೆಯಬಹುದಾಗಿದೆ.

ಈ ಸಂಬಂಧ ಸಿಬಿಡಿಟಿ ಅಧ್ಯಕ್ಷ ಸುಶಿಲ್ ಚಂದ್ರ ಹಾಗೂ ಭಾರತದಲ್ಲಿರುವ ಸ್ವಿಸ್ ರಾಜತಾಂತ್ರಿಕ ಅಧಿಕಾರಿ ಗಿಲ್ಲೆಸ್ ರೋಡಿಯಟ್ ಅವರು ಮಂಗಳವಾರ ಉಭಯ ದೇಶಗಳ ನಡುವೆ ಸ್ವಯಂಚಾಲಿತ ಮಾಹಿತಿ ವಿನಿಮಯ(ಎಇಒ)ಕ್ಕಾಗಿ 'ಜಂಟಿ ಘೋಷಣೆ'ಗೆ ಸಹಿ ಹಾಕಿದ್ದಾರೆ.

ಈ ಒಪ್ಪಂದದ ಪ್ರಕಾರ ಸೆಪ್ಟೆಂಬರ್ 2019ರಿಂದ ಸ್ವಿಸ್ ಬ್ಯಾಂಕ್ ಗಳಲ್ಲಿ ಖಾತೆ ಹೊಂದಿರುವ ಭಾರತೀಯರ ಬಗ್ಗೆ ಸ್ವಯಂಚಾಲಿತ ಮಾಹಿತಿ ದೊರೆಯಲಿದೆ ಎಂದು ವಿತ್ತ ಸಚಿವಾಲಯದ ಪ್ರಕಟಣೆ ತಿಳಿಸಿದೆ. ಅಲ್ಲದೆ ಇದು ಕಪ್ಪು ಹಣದ ವಿರುದ್ಧದ ಹೋರಾಟಕ್ಕೆ ಸಹಾಯಕವಾಗಲಿದೆ ಎಂದು ಹೇಳಿದೆ.

ಪ್ರಧಾನಿ ನರೇಂದ್ರ ಮೋದಿ ಅವರು ಜೂನ್ 6ರಂದು ಸ್ವಿಸ್ ಅಧ್ಯಕ್ಷ ಜೊಹಾನ್‌ ಶ್ನೀಡರ್‌ ಅಮ್ಮಾನ್‌ ಅವರನ್ನು ಭೇಟಿ ಮಾಡಿ, ತೆರಿಗೆ ವಂಚಕರ ಬಗ್ಗೆ ಮಾಹಿತಿ ಪಡೆಯಲು ಸ್ವಯಂಚಾಲಿತ ಮಾಹಿತಿ ವಿನಿಮಯ ಒಪ್ಪಂದದ ಬಗ್ಗೆ ಚರ್ಚಿಸಿದ್ದರು.