ನವದೆಹಲಿ: ಮನೋಜ್ ತಿವಾರಿ ಅವರನ್ನು ದೆಹಲಿ ಬಿಜೆಪಿ ಘಟಕದ ಅಧ್ಯಕ್ಷರಾಗಿ ನೇಮಿಸಿ ರಾಷ್ಟ್ರಾಧ್ಯಕ್ಷ ಅಮಿತ್ ಶಾ ಆದೇಶ ಹೊರಡಿಸಿದ್ದಾರೆ.

ಮನೋಜ್ ತಿವಾರಿಯವರು ಸತೀಶ್ ಉಪಾಧ್ಯಾಯ ಅವರ ಸ್ಥಾನವನ್ನು ಈ ಕೂಡಲೇ ಅಲಂಕರಿಸಲಿದ್ದಾರೆ ಎಂದು ಹೇಳಿಕೆಯಲ್ಲಿ ತಿಳಿಸಿದ್ದಾರೆ. ಅಲ್ಲದೆ ಬಿಹಾರ ಬಿಜೆಪಿ ಘಟಕದ ಅಧ್ಯಕ್ಷರಾಗಿ ನಿತ್ಯಾನಂದ ರಾಯಿ ಅವರನ್ನು ನೇಮಿಸಲಾಗಿದೆ. 

ಯಾದವ್ ಕುಟುಂಬಕ್ಕೆ ಸೇರಿದ ನಿತ್ಯಾನಂದ ರಾಯಿ ಅವರನ್ನು ನೇಮಿಸುವ ಮೂಲಕ ಆರ್ ಜೆಡಿ ಮುಖ್ಯಸ್ಥ ಲಾಲು ಪ್ರಸಾದ್ ಯಾದವ್ ಅವರಿಗೆ ಪ್ರತಿಸ್ಪರ್ಧಿಯನ್ನಾಗಿ ಸಜ್ಜುಗೊಳಿಸುವ ಯೋಜನೆ ಬಿಜೆಪಿಯದ್ದು. ಮೇಲ್ವರ್ಗದ ಸಾಂಪ್ರದಾಯಿಕ ಮತದಾರರಲ್ಲದೆ ಇತರ ಹಿಂದುಳಿದ ವರ್ಗಗಳ, ಕೆಳಮಟ್ಟದ ಸಮುದಾಯಗಳನ್ನು ಕೂಡ ತಲುಪುವ ಗುರಿಯನ್ನು ಬಿಜೆಪಿ ಹೊಂದಿದೆ.

ಮನೋಜ್ ತಿವಾರಿಯವರು ಈಶಾನ್ಯ ದೆಹಲಿ ಲೋಕಸಭಾ ಕ್ಷೇತ್ರವನ್ನು ಪ್ರತಿನಿಧಿಸಿದರೆ, ರಾಯಿ ಬಿಹಾರದ ಉಜಿಯರ್ಪುರ್ ಲೋಕಸಭಾ ಕ್ಷೇತ್ರವನ್ನು ಪ್ರತಿನಿಧಿಸುತ್ತಿದ್ದಾರೆ. ಈ ಹಿಂದೆ ಬಿಹಾರದ ಬಿಜೆಪಿ ಘಟಕದ ನೇತೃತ್ವವನ್ನು ಮಂಗಲ್ ಪಾಂಡೆ ವಹಿಸಿದ್ದರು.

ಬೋಜ್ ಪುರಿ ಗಾಯಕ, ಮನೋಜ್ ತಿವಾರಿ 2014ರಲ್ಲಿ ಈಶಾನ್ಯ ದೆಹಲಿ ಕ್ಷೇತ್ರದ ಲೋಕಸಭಾ ಸದಸ್ಯರಾಗಿ ಆಯ್ಕೆಯಾಗಿದ್ದರು.