ನವದೆಹಲಿ: ದೇಶಕ್ಕೆ ಪ್ರಬಲ ಮತ್ತು ಸ್ವತಂತ್ರ ಬ್ಯಾಂಕ್ ನ ಅಗತ್ಯವಿರುವುದರಿಂದ ಸರ್ಕಾರದ ಅತ್ಯುನ್ನತ ಅಧಿಕಾರಿಗಳ ವರ್ಗದ ಒತ್ತಡವಿಲ್ಲದೆ ಆರ್ ಬಿಐ ತನ್ನ ಸಾಮರ್ಥ್ಯವನ್ನು ರಕ್ಷಿಸಬೇಕು ಎಂದು ನಿರ್ಗಮಿತ ರಿಸರ್ವ್ ಬ್ಯಾಂಕ್ ಗವರ್ನರ್ ರಘುರಾಮ್ ರಾಜನ್ ಹೇಳಿದ್ದಾರೆ. 

ಅವರು ನಾಳೆ ಗವರ್ನರ್ ಸ್ಥಾನಕ್ಕೆ ರಾಜೀನಾಮೆ ನೀಡಿ ನಿರ್ಗಮಿಸುವ ಮುನ್ನ ಇಂದು ದೆಹಲಿಯ ಸೈಂಟ್ ಸ್ಟೆಫನ್ಸ್ ಕಾಲೇಜಿನಲ್ಲಿ ಕೇಂದ್ರ ಬ್ಯಾಂಕಿನ ಸ್ವತಂತ್ರದ ಕುರಿತು ಉಪನ್ಯಾಸ ನೀಡಿದರು. ಸರ್ಕಾರ ರಚಿಸಿರುವ ಚೌಕಟ್ಟಿನಡಿಯಲ್ಲಿ ಕೆಲಸ ಮಾಡಬೇಕಾಗಿರುವುದರಿಂದ ಎಲ್ಲಾ ಅಡೆತಡೆಗಳನ್ನು ನಿವಾರಿಸಿ ಕೆಲಸ ಮಾಡಬೇಕಾಗುತ್ತದೆ ಎಂದರು.

ಈ ಸಂದರ್ಭದಲ್ಲಿ ಅವರ ಮೊದಲಿನ ಆರ್ ಬಿಐ ಗವರ್ನರ್  ಡಿ.ಸುಬ್ಬಾರಾವ್ ಅವರ ಮಾತುಗಳನ್ನು ರಾಜನ್ ನೆನಪಿಸಿಕೊಂಡರು. ರಿಸರ್ವ್ ಬ್ಯಾಂಕಿಗೆ ಕಾರ್ಯಚಟುವಟಿಕೆಗಳ ನಿರ್ಧಾರ ತೆಗೆದುಕೊಳ್ಳುವ ಸ್ವಾತಂತ್ರ್ಯ ಮುಖ್ಯ ಎಂದು ಹೇಳಿದರು. ಈ ನಿಟ್ಟಿನಲ್ಲಿ ಬಜೆಟ್, ಅನುಮತಿ, ಸಕ್ರಮ ಮತ್ತು ಮೇಲ್ವಿಚಾರಣೆ ಮೊದಲಾದ ನಿರ್ಧಾರಗಳನ್ನು ತೆಗೆದುಕೊಳ್ಳುವ ಅಧಿಕಾರ ಆರ್ ಬಿಐಗೆ ಇರಬೇಕು ಎಂದರು.