ಮುಂಬೈನಲ್ಲಿ ಧಾರಾಕಾರವಾಗಿ ಮಳೆ ಸುರಿಯುತ್ತಿದ್ದ ವೇಳೆ ನೀರು ತುಂಬಿದ್ದ ರಸ್ತೆಯಲ್ಲಿ ಖ್ಯಾತ ವೈದ್ಯರಾದ ದೀಪಕ್ ಅಮರಾಪುರ್ಕರ್ ಅವರು ನಡೆದು ಹೋಗುತ್ತಿದ್ದರು. ಈ ವೇಳೆ ಮ್ಯಾನ್ ಹೋಲ್ ಗೆ ಬಿದ್ದಿದ್ದರು. 

ಡಾ. ಅಮರಾಪುರ್ಕರ್ ಬಾಂಬೆ ಆಸ್ಪತ್ರೆಯಲ್ಲಿ ಸೀರಿಯರ್ ಗ್ಯಾಸ್ಟ್ರೋ ಎಂಟರೊಲಾಜಿಸ್ಟ್ ಆಗಿ ಕಾರ್ಯನಿರ್ವಹಿಸುತ್ತಿದ್ದರು, ಎಲಿಫಿನ್ ಸ್ಟೋನ್ ರಸ್ತೆಯ ವರೆಗೂ ಕಾರಿನಲ್ಲಿ ಬಂದಿರುವ ವೈದ್ಯರು ಚಾಲಕನಿಗೆ ಮನೆಯವರೆಗೂ ಡ್ರಾಪ್ ಮಾಡುವಂತೆ ತಿಳಿಸಿದ್ದಾರೆ. ರಸ್ತೆ ಸಂಪೂರ್ಣವಾಗಿ ಆವೃತಗೊಂಡಿದ್ದರಿಂದ ಕಾರು ಹೋಗಲು ಸಾಧ್ಯವಾಗಿರಲಿಲ್ಲ. ಹೀಗಾಗಿ, ಕಾಲ್ನಡಿಗೆ ಮೂಲಕ ಮನೆಗೆ ಹೋಗಲು ಕಾರಿನಿಂದ ಇಳಿದಿದ್ದಾರೆ. ಇದಾದ ಬಳಿಕ ವೈದ್ಯರು ನಾಪತ್ತೆಯಾಗಿದ್ದಾರೆಂದು ಹೇಳಲಾಗುತ್ತಿತ್ತು. 

ರಸ್ತೆ ನೀರಿನಿಂದ ಆವೃತವಾಗಿದ್ದ ಹಿನ್ನಲೆಯಲ್ಲಿ ನಡೆದುಹೋಗುತ್ತಿದ್ದ ಸಂದರ್ಭದಲ್ಲಿ ವೈದ್ಯರು ಮ್ಯಾನ್ ಹೋಲ್ ಗೆ ಬಿದ್ದಿದ್ದರು ಎಂದು ಕೆಲ ಪ್ರತ್ಯಕ್ಷದರ್ಶಿಗಳು ಹೇಳಿದ್ದರು. ಸ್ಥಳದಲ್ಲಿ ವೈದ್ಯರು ಹಿಡಿದುಕೊಂಡಿದ್ದ ಛತ್ರಿ ಕೂಡ ಪತ್ತೆಯಾಗಿತ್ತು. ಈ ಹಿನ್ನಲೆಯಲ್ಲಿ ವೈದ್ಯರಿಗಾಗಿ ಅಗ್ನಿಶಾಮಕ ದಳದ ಸಿಬ್ಬಂದಿಗಳು, ಮುಂಬೈ ನಗರಪಾಲಿಕೆಗಳ ಸಿಬ್ಬಂದಿಗಳು ಮ್ಯಾನ್ ಹೋಲ್ ಬಳಿ ಭಾರೀ ರಕ್ಷಣಾ ಕಾರ್ಯಾಚರಣೆಯನ್ನು ನಡೆಸಿದ್ದರು. ಆದರೂ, ಪತ್ತೆಯಾಗಿರಲಿಲ್ಲ. ಇದೀಗ ವೈದ್ಯರ ಮೃತದೇಹ ಮುಂಬೈನ್ ವೋರ್ಲಿಯಲ್ಲಿ ಪತ್ತೆಯಾಗಿದೆ ಎಂದು ತಿಳಿದುಬಂದಿದೆ.