ಬಿಹಾರ: ಮೊಬೈಲ್ ಕಳ್ಳನನ್ನು ಬಂಧಿಸಲು ದಕ್ಷಿಣ ಭಾರತದ ಖ್ಯಾತ ನಟಿ ನಯನತಾರಾ ಅವರ ಫೋಟೋವನ್ನು ಬಳಸಿದ್ದ ಬಿಹಾರದ ಮಹಿಳಾ ಪೊಲೀಸ್ ಮಧುಬಾಲ ದೇವಿ ಇದೀಗ ಸುದ್ದಿಯಾಗಿದ್ದಾರೆ. 

ಬಿಹಾರದ ದರಭಂಗ್ ಜಿಲ್ಲೆಯಲ್ಲಿ ಅಸಿಸ್ಟೆಟ್ ಸಬ್ ಇನ್ಸ್ ಪೆಕ್ಟರ್ ಮಧುಬಾಲಾ ದೇವಿ ನಯನತಾರಾ ಅವರಂತೆ ಪೋಸ್ ಕೊಟ್ಟು ಖದೀಮನನ್ನು ಹಿಡಿದು ಚಾಣಾಕ್ಷತೆ ಮೆರೆದಿದ್ದಾರೆ. ಬಿಜೆಪಿ ನಾಯಕ ಸಂಜಯ್ ಮಹಾಟೋ ಎಂಬುವರ ದುಬಾರಿ ಮೌಲ್ಯದ ಮೊಬೈಲ್ ಅನ್ನು ಮೊಹಮ್ಮದ್ ಹಸ್ ನೈನ್ ಎಂಬಾತ ಕದ್ದಿದ್ದ. ಈ ಬಗ್ಗೆ ಬಿಜೆಪಿ ನಾಯಕ ದೂರು ದಾಖಲಿಸಿದ್ದರು. 

ಕಳುವಾಗಿದ್ದ ಮೊಬೈಲ್ ಕಾಲ್ ಡಿಟೇಲ್ಸ್ ದಾಖಲೆಗಳನ್ನು ಪರಿಶೀಲಿಸಿದಾಗ ಮೊಬೈಲ್ ಕಳ್ಳ ಅದೇ ಮೊಬೈಲ್ ಹ್ಯಾಂಡ್ ಸೆಟ್ ಬಳಸುತ್ತಿರುವುದಾಗಿ ಗೊತ್ತಾಗಿದೆ. ನಂತರ ಪೊಲೀಸರು ಆತನನ್ನು ಹಲವು ಬಾರಿ ಬಂಧಿಸಲು ಮುಂದಾದಾಗ ಆತ ತಪ್ಪಿಸಿಕೊಂಡು ಪರಾರಿಯಾಗಿದ್ದ. 

ಇದಕ್ಕಾಗಿ ಮಧುಬಾಲ ಅವರು ಪ್ರೀತಿಯ ನಾಟಕವಾಡಿದ್ದರು. ಮೊದಲಿಗೆ ಆಸಕ್ತಿ ತೋರದ ಕಳ್ಳ ನಂತರ ನಿಮ್ಮ ಫೋಟೋ ಕಳುಹಿಸಿ ಎಂದು ಕೇಳಿದ್ದಾನೆ. ಆಗ ಮಧುಬಾಲ ಅವರು ನಯನತಾರ ಅವರ ಫೋಟೋವನ್ನು ಕಳುಹಿಸಿದ್ದಾರೆ. ನಯನತಾರ ಫೋಟೋವನ್ನು ಕಂಡ ಕಳ್ಳ ಕೂಡಲೇ ಭೇಟಿಯಾಗುವುದಾಗಿ ಒಪ್ಪಿಕೊಂಡಿದ್ದಾನೆ. ನಂತರ ಸೂಕ್ತ ಮುನ್ನಚ್ಚರಿಕೆ ಕ್ರಮಗಳನ್ನು ತೆಗೆದುಕೊಂಡು ಕಳ್ಳನನ್ನು ಹಿಡಿಯುವಲ್ಲಿ ಯಶಸ್ವಿಯಾಗಿದ್ದಾರೆ. 

ಅಂತು ಖ್ಯಾತ ನಟಿಯೊಬ್ಬರ ಫೋಟೋ ಕಳ್ಳನ ಬಂಧನಕ್ಕೆ ಕಾರಣವಾಗಿರುವುದು ವಿಪರ್ಯಾಸವೇ ಸರಿ.