ನವದೆಹಲಿ: ಕರ್ನಾಟಕ ಸೇರಿದಂತೆ 10 ರಾಜ್ಯಗಳ ಸರ್ಕಾರದ ಮುಖ್ಯ ಕಾರ್ಯದರ್ಶಿಗಳಿಗೆ ಬರಗಾಲ ಕುರಿತ ಕೇಸಿಗೆ ಸಂಬಂಧಪಟ್ಟಂತೆ ಏಪ್ರಿಲ್ 26ರಂದು ನ್ಯಾಯಾಲಯದ ಮುಂದೆ ಹಾಜರಾಗುವಂತೆ ಸುಪ್ರೀಂ ಕೋರ್ಟ್ ಬುಧವಾರ ಸಮನ್ಸ್ ಹೊರಡಿಸಿದೆ.

ಬರಪೀಡಿತ ರಾಜ್ಯಗಳ ಜನರಿಗೆ ಸರಿಯಾದ ಪುನರ್ವಸತಿ ಸೌಕರ್ಯ ಮತ್ತು ಹಣಕಾಸು ನೆರವು ಒದಗಿಸುವಂತೆ ಸ್ವರಾಜ್ ಅಭಿಯಾನ ಎಂಬ ಸರ್ಕಾರೇತರ ಸಂಘಟನೆ ಸಲ್ಲಿಸಿದ ಮನವಿ ಅರ್ಜಿಯ ವಿಚಾರಣೆ ನಡೆಸಿದ ನ್ಯಾಯಾಲಯ ಈ ಆದೇಶವನ್ನು ಜಾರಿ ಮಾಡಿದೆ. 

ಕರ್ನಾಟಕ, ಆಂಧ್ರ ಪ್ರದೇಶ, ಮಹಾರಾಷ್ಟ್ರ ತೆಲಂಗಾಣ, ಗುಜರಾತ್, ಛತ್ತೀಸ್ ಗಢ, ಹರ್ಯಾಣ, ಮಧ್ಯ ಪ್ರದೇಶ, ಬಿಹಾರ, ಜಾರ್ಖಂಡ್ ರಾಜ್ಯಗಳ ಮುಖ್ಯ ಕಾರ್ಯದರ್ಶಿಗಳಿಗೆ ನೊಟೀಸ್ ಜಾರಿ ಮಾಡಲಾಗಿದೆ.

ಆರಂಭದಲ್ಲಿ ಬರಪೀಡಿತ ರಾಜ್ಯಗಳ ಪಟ್ಟಿಯಲ್ಲಿ 12 ರಾಜ್ಯಗಳಿದ್ದವು. ನಂತರ ಉತ್ತರ ಪ್ರದೇಶ ಮತ್ತು ಒಡಿಶಾವನ್ನು ಅಳಿಸಲಾಯಿತು.

ರಾಷ್ಟ್ರೀಯ ಆಹಾರ ಭದ್ರತೆ ಕಾಯ್ದೆಯಡಿ ಸಬ್ಸಿಡಿ ಬೆಲೆಯಲ್ಲಿ ಬರಪೀಡಿತ ರಾಜ್ಯಗಳ ಜನರಿಗೆ ಆಹಾರ ಪದಾರ್ಥಗಳನ್ನು ಒದಗಿಸುವಂತೆ ಕಳೆದ ಮೇ ತಿಂಗಳಲ್ಲಿ ಸುಪ್ರೀಂ ಕೋರ್ಟ್ ಆದೇಶ ನೀಡಿತ್ತು. 

ಈ 10 ರಾಜ್ಯಗಳಿಗೆ ಆದೇಶ ನೀಡಿರುವ ಸುಪ್ರೀಂ ಕೋರ್ಟ್ ತಿಂಗಳಲ್ಲಿ ಬಿಪಿಎಲ್ ಕಾರ್ಡು ಹೊಂದಿರುವವರಿಗೆ ನೀಡುವಂತೆ ಎಪಿಎಲ್ ಕಾರ್ಡು ಹೊಂದಿರುವವರಲ್ಲಿ ಸಹ ಪ್ರತಿ ವ್ಯಕ್ತಿಗೆ 5 ಕೆಜಿಯಂತೆ ಮತ್ತು ಕಾರ್ಡು ಹೊಂದಿಲ್ಲದವರಿಗೂ ಕೂಡ ಆಹಾರ ಧಾನ್ಯ ಒದಗಿಸಲು ಸೂಚಿಸಿದೆ.