ನವದೆಹಲಿ: ಮಹಿಳೆಯೋರ್ವರನ್ನು ರಕ್ಷಿಸಲು ಹೋಗಿ  ಟ್ರೈನಿ ಐಎಎಸ್‌ ಅಧಿಕಾರಿಯೊಬ್ಬರು ಸಾವನ್ನಪ್ಪಿದ ದಾರುಣ ಘಟನೆ ದೆಹಲಿಯಲ್ಲಿ ನಡೆದಿದೆ.

ಹರ್ಯಾಣದ ಸೋನ್ ಪೇಟೆಯ ಅಶೀಶ್ ದಾಹಿಯಾ ಮೃತಪಟ್ಟ ಐಎಎಸ್ ಅಧಿಕಾರಿ. 

ನವದೆಹಲಿಯ ಫಾರಿನ್ ಕ್ಲಬ್‌ ಇನ್ಸ್‌‌ಟಿಟ್ಯೂಟ್‌‌ನಲ್ಲಿ ಪಾರ್ಟಿಯೊಂದು ಆಯೋಜಿಸಲಾಗಿತ್ತು. ಈ ಪಾರ್ಟಿಗೆ ಅಶೀಶ್ ದಾಹಿಯಾ ಸೇರಿದಂತೆ ಭಾರತೀಯ ವಿದೇಶಿ ಮತ್ತು ಆದಾಯ ಸೇವೆಗಳ ಅಧಿಕಾರಿಗಳು ತೆರಳಿದ್ದರು. ಆಗ ಕೆಲವರು ಕ್ಲಬ್‌‌ನಲ್ಲಿರುವ ಸ್ವಿಮ್ಮಿಂಗ್‌ ಪೂಲ್‌ಗೆ ಈಜಾಡಲು ಹೋಗಿದ್ದಾರೆ. ಈ ವೇಳೆ ಅವರು ಮದ್ಯ ಸೇವಿಸಿದ್ದರು ಎನ್ನಲಾಗಿದೆ.

ಇವರಲ್ಲಿದ್ದ ಓರ್ವ ಮಹಿಳಾ ಅಧಿಕಾರಿ ಆಕಸ್ಮಿಕವಾಗಿ ಕಾಲು ಜಾರಿ ಸ್ವಿಮ್ಮಿಂಗ್‌ ಪೂಲ್‌ನಲ್ಲಿ ಬಿದ್ದಿದ್ದಾರೆ. ಇದನ್ನು ನೋಡಿ  ಅಶೀಶ್ ದಾಹಿಯಾ ಮತ್ತಿರರು ತಕ್ಷಣವೇ ಸ್ವಿಮ್ಮಿಂಗ್‌ ಪೂಲ್‌ಗೆ ಜಿಗಿದಿದ್ದಾರೆ. ಮಹಿಳಾ ಅಧಿಕಾರಿಯನ್ನು ರಕ್ಷಿಸಿ, ನೀರಿನಿಂದ ಹೊರಗೆ ಎಳೆದು ಅವರ ಪ್ರಾಣ ಉಳಿಸಿದ್ದಾರೆ.

ಆದರೆ, ಇದಾದ ಕೆಲ ಸಮಯದ ಬಳಿಕ ಅಶೀಶ್ ನೀರಿನಲ್ಲಿ ತೇಲುತ್ತಿರುವುದು ಕಂಡು ಬಂತು ಎಂದು ಪೊಲೀಸ್ ಅಧಿಕಾರಿಯೊಬ್ಬರು ಹೇಳಿದ್ದಾರೆ.

ಅಶೀಶ್‌‌ರನ್ನು ನೀರಿನಿಂದ ಹೊರಗೆಳೆದು, ಇಲ್ಲಿನ ಫೋರ್ಟಿಸ್‌ ಆಸ್ಪತ್ರೆಗೆ ರವಾನಿಸಿದ್ದಾರೆ. ಆದರೆ, ಅಷ್ಟರಲ್ಲೇ ಅಶೀಶ್‌ ಕೊನೆಯುಸಿರೆಳೆದ್ದಾರೆ ಎಂದು ವೈದ್ಯರು ಘೋಷಿಸಿದ್ದಾರೆ. ನಂತರ ಮರಣೋತ್ತರ ಪರೀಕ್ಷೆಗಾಗಿ ಐಎಎಸ್‌ ಅಧಿಕಾರಿ ಅಶೀಶ್ ಅವರ ಮೃತದೇಹವನ್ನು ಫೋರ್ಟಿಸ್‌ ಆಸ್ಪತ್ರೆಯಿಂದ ಏಮ್ಸ್‌ಗೆ ಆಸ್ಪತ್ರೆಗೆ ಸಾಗಿಸಲಾಗಿದೆ.