ಲಖನೌ: ಭಾರಿ ಚರ್ಚೆಗೆ ಕಾರಣವಾಗಿರುವ ಪದ್ಮಾವತಿ ಸಿನಿಮಾದ ಹಾಡಿಗೆ ಉತ್ತರಪ್ರದೇಶದ ಮಾಜಿ ಮುಖ್ಯಮಂತ್ರಿ ಮುಲಾಯಂ ಸಿಂಗ್‌ ಯಾದವ್‌ ಅವರ ಸೊಸೆ ಅಪರ್ಣಾ ಯಾದವ್‌ ಹೆಜ್ಜೆ ಹಾಕಿದ್ದಾರೆ. 

ಮುಲಾಂಯ ಸಿಂಗ್ ಯಾದವ್ ಕಿರಿಯ ಪುತ್ರ ಪ್ರತೀಕ್‌ ಯಾದವ್‌ ಅವರ ಹೆಂಡತಿಯಾಗಿರುವ ಅಪರ್ಣಾ ಯಾದವ್‌, ಉತ್ತರಪ್ರದೇಶದ ಲಖನೌ ನಲ್ಲಿ ನಡೆದ ತಮ್ಮ ಸಹೋದರನ ನಿಶ್ಚಿತಾರ್ಥ ಕಾರ್ಯಕ್ರಮದಲ್ಲಿ ಸಂಜಯ್‌ ಬನ್ಸಾಲಿ  ನಿರ್ದೇಶನದ ಪದ್ಮಾವತಿಯ ಘೂಮರ್‌ ಹಾಡಿಗೆ ಸಹನರ್ತಕಿಯರೊಂದಿಗೆ ಅಪರ್ಣಾ ನೃತ್ಯ ಮಾಡಿದ್ದಾರೆ. ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿದ್ದು, ಹಲವರ ಕೆಂಗಣ್ಣಿಗೆ ಗುರಿಯಾಗಿಗದ್ದು, ಹಲವು ರಾಜ್ಯಗಳಲ್ಲಿ  ಪದ್ಮಾವತಿ ಬಿಡುಗಡೆಗೆ ನಿಷೇಧ ಹೇರಿರುವ ಬೆನ್ನಲ್ಲೇ ಸಮಾಜವಾದಿ ಪಾರ್ಟಿ ಮುಖಂಡರ ಸೊಸೆ ವಿವಾದಿತ ಚಿತ್ರದ ಹಾಡಿಗೆ ಡ್ಯಾನ್ಸ್‌ ಮಾಡಿರುವುದು ಆಕ್ರೋಶಕ್ಕೆ ಕಾರಣವಾಗಿದೆ.

ಇನ್ನು ಪದ್ಮಾವತಿ ಸಿನಿಮಾಗೆ ಭಾರೀ ವಿರೋಧ ವ್ಯಕ್ತಪಡಿಸಿರುವ ರಜಪೂತ ಸಮುದಾಯದ ಕರ್ಣಿ ಸೇನಾ ಮುಖ್ಯಸ್ಥ ಲೋಕೇಂದ್ರ ಸಿಂಗ್ ಅವರು ಈ ಬಗ್ಗೆ ಪ್ರತಿಕ್ರಿಯಿಸಿದ್ದು, ಪದ್ಮಾವತಿ ವಿರುದ್ಧ ನಾವು ಹೋರಾಟ ನಡೆಸುತ್ತಿದ್ದರೂ  ರಜಪೂತ ಭಾವನೆಗಳಿಗೆ ಬೆಲೆ ಕೊಡದೆ ಅಪರ್ಣಾ ಅವರು ಡ್ಯಾನ್ಸ್‌ ಮಾಡಿದ್ದಾರೆ. ಅವರಿಗೆ ಇಷ್ಟವಿದ್ದರೆ ನಾವು ನಿಜವಾದ ಘೂಮರ್‌ ಹಾಡು ಮತ್ತು ಜನಪದ ಹಾಡುಗಳನ್ನು ಕಳಿಸಿಕೊಡುತ್ತೇವೆ.. ಬೇಕಿದ್ದರೆ ಡ್ಯಾನ್ಸ್‌ ಮಾಡಲಿ ಎಂದು  ತಮ್ಮ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.