ತಿರುವನಂತಪುರಂ: ತಾಜ್ ಮಹಲ್ ಕುರಿತ ಇತ್ತೀಚೆಗಿನ ವಿವಾದಗಳು ಬಿಡೆಪಿ ಪಕ್ಷದ ಅಸಹಿಷ್ಣುತೆಯನ್ನು ತೋರಿಸುತ್ತಿದೆ ಎಂದು ಕೇರಳ ಸಿಎಂ ಪಿಣರಾಯಿ ವಿಜಯನ್ ಹೇಳಿದ್ದಾರೆ.

ತಿರುವನಂತಪುರಂನಲ್ಲಿ ಸಿಪಿಐಎಂ ನೇತೃತ್ವದ ಎಡ ಪಕ್ಷಗಳು ಆಯೋಜಿಸಿದ್ದ ಜನ ಜಾಗರಣ್ ಜಾಥಾದಲ್ಲಿ ಪಾಲ್ಗೊಂಡು ಮಾತನಾಡಿದ ಪಿಣರಾಯಿ ವಿಜಯನ್ ಅವರು, ಉತ್ತರ ಪ್ರದೇಶ ಪ್ರವಾಸಿ ತಾಣಗಳ ಪಟ್ಟಿಯಿಂದ ತಾಜ್  ಮಹಲ್ ಅನ್ನು ಕೈಬಿಟ್ಟ ಬಳಿಕವೇ ವಿವಾದ ಸೃಷ್ಟಿಯಾಗಿದೆ. ತಾಜ್ ಮಹಲ್ ಅನ್ನು ಶಹಜಾಹನ್ ಎಂಬ ಮುಸ್ಲಿಂ ರಾಜ ನಿರ್ಮಿಸಿದ ಎಂಬ ಒಂದೇ ಕಾರಣಕ್ಕೆ ಬಿಜೆಪಿಯವರು ಅದನ್ನು ವಿರೋಧಿಸುತ್ತಿದ್ದಾರೆ. ಇದು ಆ ಪಕ್ಷ  ಅಸಹಿಷ್ಣುತೆಯನ್ನು ತೋರಿಸುತ್ತಿದೆ ಎಂದು ಅವರು ಕಿಡಿಕಾರಿದರು.

ದೇಶದ ಭವಿಷ್ಯದ ಬಗ್ಗೆ ಈ ವಿವಾದದ ಮೂಲಕ ಜನತೆ ಗಂಭೀರ ಚಿಂತನೆ ಮಾಡಬೇಕಿದ್ದು, ನಮ್ಮ ದೇಶದ ಎಂತಹ ದಿಕ್ಕಿನಲ್ಲಿ ಚಲಿಸುತ್ತಿದೆ ಎಂಬುದನ್ನು ಗಮನಿಸಬೇಕಿದೆ. ಬಿಜೆಪಿ ಪಕ್ಷ ಬೇಕೆಂದೇ ಅಯೋಧ್ಯೆ ಮತ್ತು ತಾಜ್ ಮಹಲ್  ವಿವಾದಗಳನ್ನು ಸೃಷ್ಟಿಸುತ್ತಿದ್ದು, ದೇಶದಲ್ಲಿ ಕೋಮು ಗಲಭೆ ಸೃಷ್ಟಿಸುವ ಉದ್ದೇಶದಿಂದಲೇ ಅವರು ಇಂತಹ ವಿವಾದಗಳನ್ನು ಸೃಷ್ಟಿಸುತ್ತಿದ್ದಾರೆ ಎಂದು ಆರೋಪಿಸಿದರು.