ಭೋಪಾಲ್: ರಾಜನೀತಿಜ್ಞ ಮತ್ತು ಕವಿಯಾಗಿ ಜನಪ್ರಿಯತೆ ಗಳಿಸಿರುವ ಮಾಜಿ ಪ್ರಧಾನಿ ದಿವಂಗತ ಅಟಲ್ ಬಿಹಾರಿ ವಾಜಪೇಯಿಯವರು ಸಿನಿಮಾ ಪ್ರೇಮಿ ಕೂಡ ಆಗಿದ್ದರು.

ವಾಜಪೇಯಿಯವರ 63 ವರ್ಷದ ಸೋದರ ಮಗಳು ಮಾಲಾ ತಿವಾರಿ ತಮ್ಮ ಚಿಕ್ಕಪ್ಪನ ಜೊತೆ ಕಳೆದ ಮಧುರ ಕ್ಷಣಗಳನ್ನು ನೆನಪಿಸಿಕೊಳ್ಳುತ್ತಾರೆ. ಗ್ವಾಲಿಯರ್ ನಲ್ಲಿದ್ದಾಗ ನಮ್ಮ ಇಡೀ ಕುಟುಂಬದವರು ಸಿನಿಮಾ ನೋಡುತ್ತಿದ್ದೆವು. ಚಾಚಾಜಿ ಕೂಡ ಸಿನಿಮಾ ಪ್ರಿಯರಾಗಿದ್ದರು. ಹಳೆ ಚಿತ್ರಗೀತೆಗಳನ್ನು ಕೇಳುತ್ತಿದ್ದರು. ನನ್ನ ಪತಿ, ಚಿಕ್ಕಪ್ಪ, ಎಲ್ ಕೆ ಅಡ್ವಾಣಿ ಮತ್ತು ಪ್ರತಿಭಾ ಅಡ್ವಾಣಿಯವರ ಜೊತೆ ನನ್ನ ಮದುವೆ ನಂತರ ಹಲವು ಸಿನಿಮಾಗಳನ್ನು ನೋಡಿದ್ದೇನೆ. 1977-80ರಲ್ಲಿ ಜನತಾ ಸರ್ಕಾರವಿದ್ದಾಗ ಅಡ್ವಾಣಿಯವರು ಕೇಂದ್ರ ವಾರ್ತಾ ಮತ್ತು ಪ್ರಸಾರ ಖಾತೆ ಸಚಿವರಾಗಿದ್ದರು. ಆಗ ನಾವೆಲ್ಲ ಒಟ್ಟಿಗೆ ಹಲವು ಸಿನಿಮಾಗಳನ್ನು ನೋಡಿದ್ದೆವು ಎನ್ನುತ್ತಾರೆ.

ಇಂದೋರ್ ನಲ್ಲಿ ತಮ್ಮ ಮಗನೊಂದಿಗೆ ವಾಸವಾಗಿರುವ ತಿವಾರಿ ವಾಜಪೇಯಿಯವರ ಹಿರಿಯ ಸೋದರ ಸಡ ಬಿಹಾರಿ ವಾಜಪೇಯಿಯವರ ಆರು ಮಂದಿ ಪುತ್ರಿಯರಲ್ಲಿ ಕೊನೆಯವರು. ವಾಜಪೇಯಿಯವರ ಮೂವರು ಸೋದರರು ಮತ್ತು ಇಬ್ಬರು ಸೋದರಿಯರಲ್ಲಿ ಸಡ ಬಿಹಾರಿ ವಾಜಪೇಯಿ ಎರಡನೆಯವರು.

ನಾನು ಜನಿಸಿದ್ದು 1955ರಲ್ಲಿ, ವೈಜಯಂತಿಮಾಲಾ ಅವರ ನಾಗಿನ್ ಸಿನಿಮಾ ಬಿಡುಗಡೆಯಾದ ವರ್ಷ. ಆ ಸಿನಿಮಾದ ಹಾಡು ಕೇಳಿ ನಾನು ಅಳುವುದನ್ನು ನಿಲ್ಲಿಸುತ್ತಿದ್ದೆನಂತೆ, ಹೀಗಾಗಿ ಅಟಲ್ ಚಾಚಾಜಿಯೇ ನನಗೆ ಮಾಲಾ ಎಂದು ಹೆಸರಿಟ್ಟರು.

ತಮ್ಮ ಸೋದರ, ಸೋದರಿಯರ ಮಕ್ಕಳೊಂದಿಗೆ ನಾಗಿನ್, ರಜಿಯಾ ಸುಲ್ತಾನ ಸಿನಿಮಾಗಳನ್ನು ವೀಕ್ಷಿಸಿದ್ದ ವಾಜಪೇಯಿಯವರು 1999ರಲ್ಲಿ ಬಿಡುಗಡೆಯಾದ ಅಮಿರ್ ಖಾನ್ ಅವರ ಸರ್ಫ್ ರೋಷ್ ಸಿನಿಮಾವನ್ನು ಇಷ್ಟಪಟ್ಟಿದ್ದರು. ಸರ್ಫ್ ರೋಷ್ ಸಿನಿಮಾವನ್ನು ತಪ್ಪದೆ ನೋಡು ಎಂದು ಫೋನ್ ನಲ್ಲಿ ಮಾಲಾ ತಿವಾರಿಗೆ ವಾಜಪೇಯಿಯವರು ಹೇಳಿದ್ದರಂತೆ.

ಮಧ್ಯ ಪ್ರದೇಶದ ಬಿಜೆಪಿ ಮಹಿಳಾ ಮೋರ್ಚದ ಕಾರ್ಯಕಾರಿಣಿಯಾಗಿ ಸೇವೆ ಸಲ್ಲಿಸಿದ್ದ ಮಾಲಾ ತಿವಾರಿ ವಾಜಪೇಯಿಯವರು ತಮ್ಮ ಕುಟುಂಬದರಿಗೆಲ್ಲಾ ಆದರ್ಶಪ್ರಾಯ ಮತ್ತು ಅನುಕರಣೀಯವಾಗಿದ್ದರು. ಮಾರ್ಗದರ್ಶಕರಾಗಿದ್ದರು ಎನ್ನುತ್ತಾರೆ.

ನೀನು ಸರ್ಕಾರದ ಯಾವುದೇ ಹುದ್ದೆಗಳಿಗೆ ಸೇರಲು ಪ್ರಯತ್ನಿಸುವುದಿದ್ದರೂ ನನ್ನ ಹೆಸರನ್ನು ಬಳಸಿ ಶಿಫಾರಸು ಮಾಡಬೇಡ, ನಿನ್ನ ಸಾಮರ್ಥ್ಯದಿಂದ ಮುಂದೆ ಬಾ ಎನ್ನುತ್ತಿದ್ದರಂತೆ ವಾಜಪೇಯಿಯವರು.