ಇಸ್ಲಾಮಾಬಾದ್: ಅಮೆರಿಕ ವಿರುದ್ಧ ಪಾಕಿಸ್ತಾನವನ್ನು ದೂರ ತಳ್ಳಿರುವ ಆರೋಪ ಮಾಡಿರುವ ಪಾಕಿಸ್ತಾನ ಪ್ರಧಾನಿ ಇಮ್ರಾನ್ ಖಾನ್, ನಮ್ಮನ್ನು ಅಸ್ತ್ರದಂತೆ ಬಳಕೆ ಮಾಡುವ ಅಮೆರಿಕದೊಂದಿಗೆ ಬಾಂಧವ್ಯ ಹೊಂದುವುದಕ್ಕೆ ಸಾಧ್ಯವಿಲ್ಲ ಎಂದು ಹೇಳಿದ್ದಾರೆ. 

"ನಮ್ಮನ್ನು ಅಸ್ತ್ರದಂತೆ ಬಳಕೆ ಮಾಡುವ ಅಮೆರಿಕದೊಂದಿಗೆ ನಾವು ದ್ವಿಪಕ್ಷೀಯ ಬಾಂಧವ್ಯ ಹೊಂದುವುದಕ್ಕೆ ಸಾಧ್ಯವಿಲ್ಲ, ಹಣ ಪಡೆದು ಬೇರೆಯವರ ಯುದ್ಧ ನಾವು ಮಾಡುವುದಕ್ಕೆ ಸಿದ್ಧವಿಲ್ಲ ಎಂದು ಇಮ್ರಾನ್ ಖಾನ್ ಸಂದರ್ಶನವೊಂದರಲ್ಲಿ ಹೇಳಿದ್ದಾರೆ.  ನಾವು ಅಸ್ತ್ರದಂತೆ ಬಳಕೆಯಾಗುವ ಪರಿಸ್ಥಿತಿಯನ್ನು ಮತ್ತೊಮ್ಮೆ ಎದುರಿಸುವುದಕ್ಕೆ ಸಿದ್ಧವಿಲ್ಲ. ಈ ರೀತಿಯಾಗುವುದರಿಂದಾಗಿ ನಾವು ಜೀವಹಾನಿಯನ್ನಷ್ಟೇ ಅಲ್ಲದೇ ಬುಡಕಟ್ಟು ಪ್ರದೇಶಗಳನ್ನೂ ಕಳೆದುಕೊಳ್ಳಬೇಕಾಗುತ್ತಿದೆ, ನಮ್ಮ ಘನತೆಯನ್ನೂ ಕಳೆದುಕೊಳ್ಳಬೇಕಾಗುತ್ತಿದೆ, ಅಮೆರಿಕಾದೊಂದಿಗೆ ನಾವು ಸೂಕ್ತವಾದ ಬಾಂಧವ್ಯವನ್ನು ಬಯಸುತ್ತಿದ್ದೇವೆ ಎಂದು ಇಮ್ರಾನ್ ಖಾನ್ ಹೇಳಿದ್ದಾರೆ.

ಅಮೆರಿಕಾದೊಂದಿಗೆ ಯಾವ ರೀತಿಯ ಬಾಂಧವ್ಯ ಬಯಸುತ್ತಿದ್ದೀರಿ ಎಂಬ ಪ್ರಶ್ನೆಗೆ ಉತ್ತರಿಸಿರುವ ಇಮ್ರಾನ್ ಖಾನ್, ಚೀನಾದೊಂದಿಗಿನ ಪಾಕಿಸ್ತಾನದ ಬಾಂಧವ್ಯದ ಉದಾಹರಣೆ ನೀಡಿದ್ದು, ಚೀನಾದೊಂದಿಗೆ ನಮ್ಮ ಬಾಂಧವ್ಯ ಒಂದೇ ಆಯಾಮದಲ್ಲಿಲ್ಲ, ನಮ್ಮ ನಡುವೆ ಇರುವುದು ವ್ಯಾಪಾರ ವಹಿವಾಟಿನ ಸಂಬಂಧ, ಅದೇ ರೀತಿಯ ಸಂಬಂಧವನ್ನು ಚೀನಾದೊಂದಿಗೂ ಬಯಸುತ್ತಿದ್ದೇವೆ ಎಂದು ಖಾನ್ ತಿಳಿಸಿದ್ದಾರೆ.