ನವದೆಹಲಿ:  ಪಂಜಾಬ್ ನ್ಯಾಷನಲ್ ಬ್ಯಾಂಕಿನ 11. 300 ಕೋಟಿ ರೂ. ಹಗರಣಕ್ಕೆ ಬಿಜೆಪಿಯೇ ಹೊಣೆ ಎಂದು ಕಾಂಗ್ರೆಸ್ ವಾಗ್ದಾಳಿ ನಡೆಸಿದೆ.ಪ್ರಧಾನಿ ನರೇಂದ್ರಮೋದಿ ನೇತೃತ್ವದ ಸರ್ಕಾರದಲ್ಲಿ ಆರ್ಥಿಕತೆ ಕುಸಿದಿದ್ದು, ಅಂತಾರಾಷ್ಟ್ರೀಯ ಮಟ್ಟದಲ್ಲಿ ದೇಶದ ವರ್ಚಸ್ಸು ಕಡಿಮೆಯಾಗಿದೆ ಎಂದು ಕಾಂಗ್ರೆಸ್ ಹಿರಿಯ ನಾಯಕ ಕಪಿಲ್ ಸಿಬಲ್ ಆರೋಪಿಸಿದ್ದಾರೆ.

ದೇಶದ ಸಂಪತ್ತು ದೋಚಿ ಕಳ್ಳರು ಪರಾರಿಯಾಗುತ್ತಿದ್ದಾಗ ದೇಶದ ಕಾವಲುಗಾರ ಅಂತಾ ಕರೆದುಕೊಳ್ಳುತ್ತಿದ್ದ ಪ್ರಧಾನಿ ನರೇಂದ್ರಮೋದಿ ಏನು ನಿದ್ರೆ ಮಾಡುತ್ತಿದ್ದಾರಾ ಅಂತಾ ಕಪಿಲ್ ಸಿಬಲ್ ವಾಗ್ದಾಳಿ ನಡೆಸಿದ್ದಾರೆ.

 ನವದೆಹಲಿಯಲ್ಲಿಂದು  ಜಂಟಿ ಸುದ್ದಿಗೋಷ್ಠಿ ನಡೆಸಿದ ಕಾಂಗ್ರೆಸ್ ಮುಖಂಡರಾದ ರಣದೀಪ್ ಸುರ್ಜಿವಾಲಾ ಶಕ್ತಿಸಿನ್ಹಾ ಗೋಯೆಲ್ , ಪವನ್ ಖೇರಾ ಹಾಗೂ ಕಪಿಲ್ ಸಿಬಲ್, ಸಿಬಿಐ ಎರಡನೇ ಎಫ್ ಐಆರ್ ನಲ್ಲಿ ಉಲ್ಲೇಖಿಸಿರುವಂತೆ ಆರೋಪಿ ನೀರವ್ ಮೋದಿ 2017ರಲ್ಲಿ ಎನ್ ಡಿಎ ಸರ್ಕಾರ ಅಧಿಕಾರದಲ್ಲಿರುವಾಗಲೇ ಒಪ್ಪಂದ ಮಾಡಿಕೊಂಡಿದ್ದರೂ. ಹಗರಣ ನಡೆಯದಂತೆ ತಡೆಯುವಲ್ಲಿ ಸರ್ಕಾರ ವಿಫಲವಾಗಿದೆ,

 ಇದೊಂದು ಸುಲಭ ವ್ಯಾಪಾರದ ಮಾರ್ಗವಾಗಿದ್ದು, ನರೇಂದ್ರಮೋದಿ ಅವರ ವಿದೇಶ ಪ್ರವಾಸದ ವೇಳೆಯಲ್ಲಿ ತೆರಳುವ ಜನರ ಬಗ್ಗೆ ವಿವರ ಒದಗಿಸುವಂತೆ ಕಪಿಲ್ ಸಿಬಲ್ ಆಗ್ರಹಿಸಿದರು.

 ಯುಪಿಎ ಆಡಳಿತಾವಧಿ ಹಾಗೂ ಬಿಜೆಪಿ ಆಡಳಿತಾವಧಿಯ ಕುರಿತು ಬಹಿರಂಗ ಚರ್ಚೆಗೆ ಬರುವಂತೆ ಬಿಜೆಪಿಗೆ ಸವಾಲು ಹಾಕಿದ ಕಪಿಲ್ ಸಿಬಲ್, ದೇಶದಲ್ಲಿ ಲೂಟಿ ಆಗುತ್ತಿದ್ದರೂ ಬಿಜೆಪಿಯವರು ಕಣ್ಣಿದ್ದು ಕುರುಡರಂತೆ ವರ್ತಿಸುತ್ತಿದ್ದಾರೆ ಎಂದು ಆರೋಪಿಸಿದರು.