ನವದೆಹಲಿ: ಪ್ರಯಾಣಿಕರ ಲಗೇಜ್ ಹೆಚ್ಚಾಗಿದ್ದರೆ 6 ಪಟ್ಟು  ದಂಡ ವಿಧಿಸುವುದಾಗಿ ಹೇಳಿದ್ದ ರೈಲ್ವೇ ಇಲಾಖೆ ಇದೀಗ ಯೂಟರ್ನ್ ಹೊಡೆದಿದ್ದು, ದಂಡ ವಿಧಿಸುವ ನಿರ್ಧಾರದಿಂದ ಹಿಂದೆ ಸರಿದಿರುವುದಾಗಿ ತಿಳಿಸಿದೆ.

ಈ ಹಿಂದೆ ಪ್ರಯಾಣಿಕರು ತಮ್ಮೊಂದಿಗೆ ನಿಗದಿ ಪಡಿಸಿದ್ದಕ್ಕಿಂತ ಹೆಚ್ಚಿನ ಲಗೇಜ್ ಗಳನ್ನು ರೈಲಿನಲ್ಲಿ​ ಕೊಂಡೊಯ್ದರೆ ಲಗೇಜ್​ ಶುಲ್ಕದ 6 ಪಟ್ಟು ದಂಡ ವಿಧಿಸಲಾಗುವುದು  ಎಂದು ರೈಲ್ವೆ ಇಲಾಖೆ ಇತ್ತೀಚೆಗೆ ತಿಳಿಸಿತ್ತು. ಇಲಾಖೆಯ ಈ ಕ್ರಮಕ್ಕೆ ವ್ಯಾಪಕ ಟೀಕೆ ವ್ಯಕ್ತವಾದ ಹಿನ್ನೆಲೆಯಲ್ಲಿ ಈಗ ರೈಲ್ವೆ ಇಲಾಖೆ ದಂಡ ವಿಧಿಸುವ ನಿರ್ಧಾರದಿಂದ ಹಿಂದೆ ಸರಿದಿರುವುದಾಗಿ ತಿಳಿಸಿದೆ.

ಇನ್ನು ಈ ಹಿಂದೆ ಜೂನ್​ 1 ರಿಂದ ಹೆಚ್ಚುವರಿ ಲಗೇಜ್​ ಕೊಂಡೊಯ್ಯುವವರನ್ನು ಪತ್ತೆ ಹಚ್ಚಲು ವಿಶೇಷ ಕಾರ್ಯಾಚರಣೆ ಆರಂಭಿಸಿತ್ತು. ಈ ಸಂದರ್ಭದಲ್ಲಿ ಸ್ಲೀಪರ್ ಬೋಗಿ ಪ್ರಯಾಣಿಕರು 40 ಕೆ.ಜಿ. ಮತ್ತು ಎರಡನೇ ದರ್ಜೆ ಬೋಗಿಗಳಲ್ಲಿ ಪ್ರಯಾಣಿಸುವವರು 35 ಕೆ.ಜಿ. ತೂಕದ ಲಗೇಜನ್ನು ಶುಲ್ಕವಿಲ್ಲದೇ ಮತ್ತು ಎಸಿ ಕೋಚ್ ನ ಪ್ರಯಾಣಿಕರು 70 ಕೆಜಿ ವರೆಗಿನ ಶುಲ್ಕ ರಹಿತ ಲಗೇಜನ್ನು ಗರಿಷ್ಟ 150 ಕೆಜಿ ವರಿಗಿನ ಶುಲ್ಕ ಸಹಿತ ಲಗೇಜನ್ನು ಕೊಂಡೊಯ್ಯಬಹುದು. 30 ವರ್ಷಗಳ ಹಿಂದೆಯೇ ಈ ನಿಯಮ ರೂಪಿಸಲಾಗಿದ್ದು, ಇನ್ಮುಂದೆ ಇದನ್ನು ಕಟ್ಟುನಿಟ್ಟಾಗಿ ಜಾರಿ ಮಾಡಲಾಗುವುದು ಎಂದು ರೈಲ್ವೆ ಅಧಿಕಾರಿಗಳು ತಿಳಿಸಿದ್ದರು.

ರೈಲ್ವೆ ಇಲಾಖೆ ಹೆಚ್ಚಿನ ಲಗೇಜ್​ ಕೊಂಡೊಯ್ಯದಂತೆ ಪ್ರಯಾಣಿಕರಲ್ಲಿ ಜಾಗೃತಿ ಮೂಡಿಸಲು ಪ್ರಯತ್ನ ನಡೆಸಿತ್ತು. ಈ ಮೂಲಕ ಹೆಚ್ಚಿನ ಲಗೇಜ್​ ತೆಗೆದುಕೊಂಡು ಹೋಗುವುದರಿಂದ ಸಹ ಪ್ರಯಾಣಿಕರಿಗೆ ತೊಂದರೆಯಾಗುತ್ತದೆ ಎಂಬುದನ್ನು ಪ್ರಯಾಣಿಕರಿಗೆ ಮನದಟ್ಟು ಮಾಡಿಕೊಡುವುದು ನಮ್ಮ ಉದ್ದೇಶವಾಗಿತ್ತು ಎಂದು ರೈಲ್ವೆ ಇಲಾಖೆಯ ವಕ್ತಾರ ರಾಜೇಶ್​ ಬಾಜಪೇಯಿ ತಿಳಿಸಿದ್ದಾರೆ. 

ಇಲಾಖೆಯ ಈ ನಿರ್ಧಾರಕ್ಕೆ ವ್ಯಾಪಕ ಆಕ್ರೋಶ ವ್ಯಕ್ತವಾದ ಬೆನ್ನಲ್ಲೇ ಇಲಾಖೆ ಇದೀಗ ಈ ನಿರ್ಧಾರದಿಂದ ಹಿಂದೆ ಸರಿದಿದೆ.