ವಾಷಿಂಗ್ ಟನ್: ಪತ್ರಕರ್ತೆ ಪಲ್ಲವಿ ಗೋಗೋಯ್ ಅವರೊಂದಿಗೆ ಸಹಮತದ ಸಂಬಂಧ ಇತ್ತು ಎಂದು ಹೇಳಿರುವ ಎಂಜೆ ಅಕ್ಬರ್ ಅವರ ಹೇಳಿಕೆಯನ್ನು ಪಲ್ಲವಿ ಗೊಗೋಯ್ ಅಲ್ಲಗಳೆದಿದ್ದು, ಅಕ್ಬರ್ ಜೊತೆಗೆ ಸಹಮತದ ಸಂಬಂಧ ಇರಲಿಲ್ಲ, ಅದು ದಬ್ಬಾಳಿಕೆ ಹಾಗೂ ಅಧಿಕಾರದ ದುರ್ಬಳಕೆಯಿಂದ ಇದ್ದಂತಹ ಸಂಬಂಧ ಎಂದು ಹೇಳಿದ್ದಾರೆ.
ನ್ಯಾಷನಲ್ ಪಬ್ಲಿಕ್ ರೇಡಿಯೋದ ವಾಣಿಜ್ಯ ವಿಭಾಗದ ಸಂಪಾದಕರಾಗಿರುವ ಪಲ್ಲವಿ ಗೊಗೋಯ್, ಎಂ ಜೆ ಅಕ್ಬರ್ ಪತ್ರಕರ್ತರಾಗಿದ್ದಾಗ ತನ್ನ ಮೇಲೆ ಅತ್ಯಾಚಾರ ನಡೆಸಿದ್ದರು ಎಂದು ಆರೋಪಿಸಿದ್ದರು. ಈ ಬಳಿಕ ಪ್ರತಿಕ್ರಿಯೆ ನೀಡಿದ್ದ ಅಕ್ಬರ್, ಪಲ್ಲವಿ ಅವರೊಂದಿಗೆ ಸಹಮತದ ಸಂಬಂಧವಿತ್ತು ಎಂದು ಹೇಳಿದ್ದಾರೆ. ಆದರೆ ಅಕ್ಬರ್ ಹೇಳಿಕೆಯನ್ನು ತಿರಸ್ಕರಿಸಿರುವ ಪಲ್ಲವಿ ಗೋಗೋಯ್, ತಾನು ಮಾಡಿದ್ದ ಆರೋಪದ ಪ್ರತಿ ಪದಕ್ಕೂ ಈಗಲೂ ಬದ್ಧ ಎಂದು ಸ್ಪಷ್ಟಪಡಿಸಿದ್ದಾರೆ.
ಪಲ್ಲವಿ ಜತೆ ಸಹಮತದ ಸಂಬಂಧ ಇತ್ತು. ನಾವಿಬ್ಬರು ಕೆಲವು ತಿಂಗಳ ಕಾಲ ಜೊತೆಗಿದ್ದೇವು. ಇದು ನನ್ನ ಸಂಸಾರಿಕ ಜೀವನದಲ್ಲಿ ಭಾರಿ ಕೋಲಾಹಲ ಎಬ್ಬಿಸಿತ್ತು ಎಂದು ಅಕ್ಬರ್ ಸ್ಪಷ್ಟನೆ ನೀಡಿದ್ದರು.