ನವದೆಹಲಿ: ಪ್ರಧಾನ ಮಂತ್ರಿ ಜನ ಆರೋಗ್ಯ ಯೋಜನೆ(ಪಿಎಂಜೆಎವೈ)ಯ ಪರಿಣಾಮಕಾರಿ ಜಾರಿಗೆ ಈಗಿರುವ ಆರೋಗ್ಯ ಮೂಲಭೂತ ಸೌಕರ್ಯ ಸಾಕಷ್ಟು ಇಲ್ಲ ಎಂದು ಅರಿತಿರುವ ಸರ್ಕಾರ, ದೇಶದ ಎರಡು ಮತ್ತು ಮೂರನೇ ದರ್ಜೆ ನಗರಗಳಲ್ಲಿ ಖಾಸಗಿ ಆಸ್ಪತ್ರೆಗಳನ್ನು ತೆರೆಯಲು ಕರಡು ಯೋಜನೆಯನ್ನು ತಯಾರಿಸಿದೆ.

ಈ ಬಗ್ಗೆ ಕೇಂದ್ರ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವಾಲಯ ಎಲ್ಲಾ ರಾಜ್ಯಗಳಿಗೆ ಸಲಹಾ ಪತ್ರವನ್ನು ಕಳುಹಿಸಿದ್ದು, ಆಸ್ಪತ್ರೆಗಳನ್ನು ಆರಂಭಿಸಲು ಭೂಮಿ ಸುಲಭವಾಗಿ ದೊರೆಯುವಂತೆ ಮಾಡಲು ಅನುಮತಿ ಸುಲಭವಾಗಿ ದೊರೆಯುವಂತೆ ಮಾಡಬೇಕು ಎಂದು ಹೇಳಿದೆ.

ಕೃಷಿ ಭೂಮಿಯ ದರದಲ್ಲಿ ಸುಲಭ ಸಾಲ ದೊರೆಯುವಂತೆ ಮಾಡಲು ಮತ್ತು ವಸತಿ ದರದಲ್ಲಿ ಆಸ್ಪತ್ರೆಗಳಿಗೆ ಅನಿಯಮಿತಿ ವಿದ್ಯುತ್ ಸಂಪರ್ಕ ನೀಡಬೇಕೆಂದು ಕೇಂದ್ರ ಸರ್ಕಾರ ಎಲ್ಲಾ ರಾಜ್ಯ ಸರ್ಕಾರಗಳನ್ನು ಕೋರಿದೆ.

ಭಾರತ ದೇಶದಲ್ಲಿ ಜನಸಂಖ್ಯೆ ಏರಿಕೆಯಾಗುತ್ತಿದೆ. ಜನಸಂಖ್ಯೆಗೆ ಹೋಲಿಸಿದರೆ ಆಸ್ಪತ್ರೆಗಳ ಸಂಖ್ಯೆ ಕಡಿಮೆಯಾಗಿದೆ. ಪ್ರತಿ 879 ಜನರಿಗೆ ಒಂದು ಆಸ್ಪತ್ರೆಯಿದೆ. ವಿಶ್ವದಲ್ಲಿ ಪ್ರತಿ 10 ಸಾವಿರ ಜನಕ್ಕೆ ಸರಾಸರಿ 30 ಆಸ್ಪತ್ರೆಗಳಿವೆ. ಪ್ರಧಾನ ಮಂತ್ರಿ ಜನ ಆರೋಗ್ಯ ಯೋಜನೆಯಡಿ 500 ದಶಲಕ್ಷಕ್ಕೂ ಅಧಿಕ ಫಲಾನುಭವಿಗಳಿದ್ದು ಮುಂದಿನ 10 ವರ್ಷಗಳಲ್ಲಿ 0.64 ದಶಲಕ್ಷ ಹೆಚ್ಚುವರಿ ಬೆಡ್ ಗಳ ಅಗತ್ಯವಿದೆ ಎಂದು ನೀತಿ ಆಯೋಗ ಸಿದ್ದಪಡಿಸಿದ ಕರಡು ನೀತಿಯಲ್ಲಿ ಹೇಳಲಾಗಿದೆ.

ನಮ್ಮ ದೇಶದಲ್ಲಿ ಆಸ್ಪತ್ರೆಗಳ ಸಂಖ್ಯೆ ಅದರಲ್ಲೂ ಎರಡು ಮತ್ತು ಮೂರನೇ ದರ್ಜೆ ನಗರಗಳಲ್ಲಿ ಏರಿಕೆಯಾಗಬೇಕಾಗಿದೆ. ಆರೋಗ್ಯ ಕ್ಷೇತ್ರದಲ್ಲಿ ಇರುವ ಬೇಡಿಕೆ ಮತ್ತು ಪೂರೈಕೆಯ ನಡುವಿನ ಅಧಿಕ ಅಂತರವನ್ನು ತಡೆಯಲು ಖಾಸಗಿ ವ್ಯಕ್ತಿಗಳು ಪ್ರಮುಖ ಪಾತ್ರ ವಹಿಸುತ್ತಾರೆ ಎಂದು ಕರಡು ನೀತಿಯಲ್ಲಿ ಹೇಳಿದೆ.