ಹೈದರಾಬಾದ್: ತ್ರಿವಳಿ ತಲಾಖ್ ಶಿಕ್ಷಾರ್ಹ ಅಪರಾಧ ಎಂಬ ಸುಗ್ರೀವಾಜ್ಞೆಗೆ ಕೇಂದ್ರ ಸಚಿವ ಸಂಪುಟ ಸಭೆ ಅಸ್ತು ಎಂದ ಬೆನ್ನಲ್ಲೇ 29 ವರ್ಷದ ಮಹಿಳೆಗೆ 62ರ ಪತಿ ವಾಟ್ಸಾಪ್ ಮೂಲಕ ತ್ರಿವಳಿ ತಲಾಖ್ ನೀಡಿದ್ದಾರೆ. 

ಸಾಮಾಜಿಕ ಜಾಲತಾಣಗಳಾದ ಫೇಸ್ ಬುಕ್, ಟ್ವಿಟರ್ ಮತ್ತು ವಾಟ್ಸಪ್ ನಲ್ಲಿ ತ್ರಿವಳಿ ತಲಾಖ್ ನೀಡಿತ್ತಿರುವ ಪ್ರಕರಣಗಳು ದಿನೇ ದಿನೇ ಹೆಚ್ಚಾಗುತ್ತಿದ್ದು, ಇಂತಹುದೇ ಮತ್ತೊಂದು ಪ್ರಕರಣ ಹೈದರಾಬಾದ್ ನಲ್ಲಿ ವರದಿಯಾಗಿದೆ. ಅದೂ ಕೂಡ ತ್ರಿವಳಿ ತಲಾಖ್ ಶಿಕ್ಷಾರ್ಹ ಅಪರಾಧ ಎಂಬ ಸುಗ್ರೀವಾಜ್ಞೆಗೆ ಕೇಂದ್ರ ಸಚಿವ ಸಂಪುಟ ಸಭೆ ಅಸ್ತು ಎಂದ ಬೆನ್ನಲ್ಲೇ 29 ವರ್ಷದ ಮಹಿಳೆಗೆ 62ರ ಪತಿ ವಾಟ್ಸಾಪ್ ಮೂಲಕ ತ್ರಿವಳಿ ತಲಾಖ್ ನೀಡಿದ್ದಾರೆ. 

ಹೈದರಾಬಾದ್‍ನ ಹುಮಾ ಸಾಯಿರಾ ಎಂಬಾಕೆಯನ್ನು ಓಮನ್ ಮೂಲದ ಶೇಕ್ ಘಬಿಶ್‍ ಸೈದ್ ನಸಿಬ್ ಅಲ್ ಜಲ್ಬೊಬಿ ಎಂಬುವವರು 2017ರ ಮೇ ನಲ್ಲಿ ವಿವಾಹವಾಗಿದ್ದರು. ಮದುವೆಯಾಗಿ ಒಂದು ವರ್ಷದವರೆಗೂ ಅವರು ಪತಿ ಜತೆ ಓಮನ್‍ನಲ್ಲಿ ವಾಸಿಸುತ್ತಿದ್ದರು. ಅಲ್ಲದೆ ಗಂಡನಿಂದ ಕಿರುಕುಳಕ್ಕೊಳಗಾದರೂ ರಾಜಿ ಮಾಡಿಕೊಂಡು ಅಲ್ಲೇ ವಾಸವಾಗಿದ್ದರು. ಬಳಿಕ ಸಾಯಿರಾ ಗಂಡು ಮಗುವಿಗೆ ಜನ್ಮ ನೀಡಿದ್ದರು. ಆದರೆ ಅನಾರೋಗ್ಯದಿಂದ ಮಗು ಮೂರು ತಿಂಗಳಲ್ಲೇ ಮೃತಪಟ್ಟಿತ್ತು. ಹೀಗಾಗಿ ಗಂಡ ವಾಪಸ್ ಭಾರತಕ್ಕೆ ಹೋಗುವಂತೆ ಪೀಡಿಸುತ್ತಿದ್ದನಂತೆ.

ಸಾಯಿರಾ ಕೂಡ ವೈದ್ಯಕೀಯ ಚಿಕಿತ್ಸೆಗಾಗಿ 2018ರ ಜುಲೈ 30ರಂದು ಭಾರತಕ್ಕೆ ಮರಳಿದ್ದರು. ಇದೀಗ ವಾಟ್ಸಾಪ್‍ ನಲ್ಲಿ ತಲಾಖ್ ನೀಡಿರುವ ಮೆಸೇಜ್ ಕಳುಹಿಸಿದ್ದಾರೆ ಎಂದು ಮಹಿಳೆ ಕಣ್ಣೀರಿಡುತ್ತಿದ್ದಾರೆ. ಇನ್ನು ಈ ವಿಚಾರದ ಬಗ್ಗೆ ಮಹಿಳೆ ವಿದೇಶಾಂಗ ಸಚಿವೆ ಸುಷ್ಮಾ ಸ್ವರಾಜ್ ಅವರ ಸಹಾಯ ಯಾಚಿಸಿದ್ದಾರೆ. ತನ್ನ ಮೆಸೇಜ್ ಗಳನ್ನು ಪತಿ ನಿರ್ಲಕ್ಷಿಸುತ್ತಿದ್ದು, ಅವರ ಬಳಿ ತಲಾಖ್ ಮಾಡಿರುವ ಕುರಿತಾಗಿ ಪ್ರಶ್ನೆಗಳನ್ನು ಕೇಳಬೇಕಿದೆ ಎಂದು ಸಾಯಿರಾ ತಿಳಿಸಿದ್ದಾರೆ. ಅಲ್ಲದೆ ‘ಇಂಥ ಜನರು ಬಡ ಮಹಿಳೆಯರ ಜೀವನದಲ್ಲಿ ಆಟವಾಡುತ್ತಿದ್ದಾರೆ. ಅವರಿಗೆ ಬೇಕು ಎಂದಾಗ ಮದುವೆಯಾಗುತ್ತಾರೆ. ಮೋಜು ತೀರಿದ ಬಳಿಕ ತಲಾಖ್ ನೀಡುತ್ತಾರೆ. ನಾನೀಗ ಎಲ್ಲಿಗೆ ಹೋಗಬೇಕು..? ಇಂಥವರು ನಮ್ಮಿಂದ ಪ್ರಯೋಜನ ಪಡೆಯುತ್ತಿದ್ದಾರೆ’ ಎಂದು ಸಾಯಿರಾ ಆರೋಪಿಸಿದ್ದಾರೆ.