ಚೆನ್ನೈ: ಆಡಳಿತರೂಢ ಎಐಎಡಿಎಂಕೆ ಸರ್ಕಾರದ ಭ್ರಷ್ಟಾಚಾರದ ವಿರುದ್ಧ ಅಕ್ಟೋಬರ್ 3 ಹಾಗೂ 4ರಂದು ರಾಜ್ಯಾದ್ಯಂತ ಬೃಹತ್ ಪ್ರತಿಭಟನೆಗೆ ಡಿಎಂಕೆ ಪಕ್ಷ ಕರೆ ನೀಡಿದೆ. 

2009ರ ಶ್ರೀಲಂಕಾ ನಾಗರಿಕ ಸಂಘರ್ಷದಲ್ಲಿ ತಮಿಳರ ವಿರುದ್ಧದ ಕಾರ್ಯಾಚರಣೆಯಲ್ಲಿ ಅಂದಿನ ಯುಪಿಎ ಸರ್ಕಾರ ಹಾಗೂ ಡಿಎಂಕೆ ಸರ್ಕಾರ ತೆಗೆದುಕೊಂಡ ನಿರ್ಧಾರಗಳ ವಿರುದ್ಧ ಎಐಎಡಿಎಂಕೆ ಪಕ್ಷ ಸೆಪ್ಟೆಂಬರ್ 25ರಂದು ರಾಜ್ಯಾದ್ಯಂತ ಸಾರ್ವಜನಿಕ ರ್ಯಾಲಿಗಳನ್ನು ನಡೆಸುತ್ತಿದೆ. ಇದಕ್ಕೆ ಸೆಡ್ಡು ಹೊಡೆಯಲು ಡಿಎಂಕೆ ಅಕ್ಟೋಬರ್ 3 ಹಾಗೂ 4ರಂದು ರಾಜ್ಯಾದ್ಯಂತ ಪ್ರತಿಭಟನೆಗೆ ಕರೆ ನೀಡಿದೆ. 

ಈ ಬೃಹತ್ ಪ್ರತಿಭಟನೆಗೆ ಡಿಎಂಕೆ ಕಮಿಷನ್-ಕಲೆಕ್ಷನ್-ಕರಪ್ಷನ್ ಎಂದು ಹೆಸರಿಟ್ಟಿದೆ. ಇನ್ನು ರಾಜ್ಯಾದ್ಯಂತ ನಡೆಯಲಿರುವ ಪ್ರತಿಭಟನೆಯಲ್ಲಿ ಡಿಎಂಕೆ ಹಿರಿಯ ನಾಯಕರಾದ ದೊರೈ ಮುರುಗನ್, ಟಿಆರ್ ಬಾಲು, ಶಿವ, ರಾಜ ಮತ್ತು ಟಿಕೆಎಸ್ ಇಲಂಗೊವನ್ ಸೇರಿದಂತೆ ಹಲವು ನಾಯಕರು ಪ್ರತಿಭಟನೆಯನ್ನುದ್ದೇಶಿಸಿ ಮಾತನಾಡಲಿದ್ದಾರೆ.