ಮೂರನೇ ಮಹಡಿಯಿಂದ ಬಿದ್ದ 2 ವರ್ಷದ ಕೂಸು ಪವಾಡ ಸದೃಶ ರೀತಿಯಲ್ಲಿ ಬದುಕುಳಿದಿದೆ. 

ದಾಮನ್-ಡಿಯುವಿನಲ್ಲಿ ಈ ಘಟನೆ ವರದಿಯಾಗಿದ್ದು, ರಸ್ತೆಯಲ್ಲಿ ತೆರಳುತ್ತಿದ್ದ ವ್ಯಕ್ತಿ ಈ ದೃಶ್ಯವನ್ನು ಕಂಡು ತಕ್ಷಣವೇ ಆ ಮಗುವನ್ನು ರಕ್ಷಿಸಿದ್ದಾರೆ. ಎಎನ್ಐ ನಲ್ಲಿ ಈ ವಿಡಿಯೋ ಪ್ರಕಟವಾಗಿದ್ದು, ಮಗುವನ್ನು ರಕ್ಷಿಸಲು ಸ್ಥಳೀಯರು ಧಾವಿಸಿರುವ ದೃಶ್ಯ ಸೆರೆಯಾಗಿದೆ. 

ಆಟವಾಡುತ್ತಿದ್ದ ಮಗು ಅಚಾನಕ್ಕಾಗಿ ಮೂರನೇ ಮಹಡಿಯಿಂದ ಬಿದ್ದಿದೆ. ಆದರೆ ಮಧ್ಯದಲ್ಲಿ ಕಿಟಕಿಯ ಸರಳಿಗೆ ಸಿಲುಕಿಕೊಂಡಿದ್ದು, ಅಳಲು ಪ್ರಾರಂಭಿಸಿದೆ. ಇದನ್ನು ಕಂಡ ಸ್ಥಳೀಯರು ಮಾನವ ಸರಪಳಿ ನಿರ್ಮಿಸಿ ಆ ಮಗು ಬಿದ್ದರೂ ಯಾವುದೇ ಗಾಯಗಳಾಗದಂತೆ ಎಚ್ಚರ ವಹಿಸಿ ಕಾಪಾಡಿದ್ದಾರೆ. 

ಘಟನೆಯಲ್ಲಿ ಮಗುವಿಗೆ ಯಾವುದೇ ಸಮಸ್ಯೆಗಳು ಉಂಟಾಗಿಲ್ಲ. ಹೆಚ್ಚಿನ ಮಾಹಿತಿಯನ್ನು ನಿರೀಕ್ಷಿಸಲಾಗುತ್ತಿದೆ. ಮಧ್ಯಪ್ರದೇಶದ ಟಿಕಮಾರ್ಗ್ ನಲ್ಲಿಯೂ ಇದೇ ರೀತಿಯಲ್ಲಿ 3 ವರ್ಷದ ಮಗು 35 ಅಡಿ ಬಾಲ್ಕನಿಯಿಂದ ಬಿದ್ದಿತ್ತು. ಆದರೆ ಇದನ್ನು ಗಮನಿಸಿದ್ದ ಸೈಕಲ್ ರಿಕ್ಷಾ ಚಾಲಕ ಆ ಮಗು ತನ್ನ ಸೈಕಲ್ ರಿಕ್ಷಾ ಮೇಲೆ ಬೀಳುವಂತೆ ಮಾಡಿ ರಕ್ಷಿಸಿದ್ದ.