ಹೈದರಾಬಾದ್: ಅಮೆರಿಕದ ಫ್ಲೋರಿಡಾದಲ್ಲಿ ಮಂಗಳವಾರ ರಾತ್ರಿ ಕ್ವಿಕ್ ಫಿಲ್ ಗ್ಯಾಸ್ ಸ್ಟೇಷನ್ ದರೋಡೆಗೆ ಯತ್ನಿಸಿದ ದರೋಡೆಕೋರರು, ತೆಲಂಗಾಣ ಮೂಲದ ಸ್ಟೇಷನ್ ಕ್ಲರ್ಕ್ ಕೆ. ಗೋವರ್ಧನ್ ರೆಡ್ಡಿ ಅವರನ್ನು ಗುಂಡಿಕ್ಕಿ ಹತ್ಯೆ ಮಾಡಿದ್ದಾರೆ.
ಘಟನೆಯಲ್ಲಿ ಮತ್ತೊಬ್ಬರು ಸಹ ಗಂಭೀರವಾಗಿ ಗಾಯಗೊಂಡಿದ್ದು, ಆಸ್ಪತ್ರೆಗೆ ದಾಖಲಿಸಲಾಗಿದೆ.
ಈ ಸಂಬಂಧ ಕೊಲೆ ಪ್ರಕರಣ ದಾಖಲಿಸಿಕೊಂಡಿರುವ ಫ್ಲೋರಿಡಾ ಪೊಲೀಸರು, ಮೂವರು ಆರೋಪಿಗಳನ್ನು ಬಂಧಿಸಿದ್ದಾರೆ.
ಅಮೆರಿಕದಲ್ಲಿ ಕಳೆದ 7 ವರ್ಷಗಳಿಂದ ವಾಸವಿದ್ದ 40 ವರ್ಷದ ಗೋವರ್ಧನ್ ರೆಡ್ಡಿ ಅವರು ತೆಲಂಗಾಣದ ಯಾದಾದ್ರಿ ಭೋಂಗಿರ್ ಜಿಲ್ಲೆಯ ರಹೀಮ್ ಖಾನ್ ಪೇಟ್ ಗ್ರಾಮದವರು ಎನ್ನಲಾಗಿದೆ.
ಮೆರಿಕಾದಲ್ಲಿ ಈ ಘಟನೆ ನಡೆದಿರುವುದರಿಂದ ಗೋವರ್ಧನ್ ರೆಡ್ಡಿ ಅವರ ಮೃತದೇಹವನ್ನು ಭಾರತಕ್ಕೆ ತಂದು, ತಮಗೆ ಒಪ್ಪಿಸುವಂತೆ ಅವರ ಕುಟುಂಬದವರು ಸರ್ಕಾರಕ್ಕೆ ಮನವಿ ಮಾಡಿದ್ದಾರೆ.