ಚೆನ್ನೈ: ಐಎಸ್ ಐಎಸ್  ಉಗ್ರ ಸಂಘಟನೆಯ ಆರು ಬೆಂಬಲಿಗರ ವಿರುದ್ಧ ರಾಷ್ಟ್ರೀಯ ತನಿಖಾ ತಂಡ ಇಂದು ಚಾರ್ಜ್ ಶೀಟ್ ದಾಖಲಿಸಿದೆ.

ಈ ಆರೋಪಿಗಳು ಹಿಂದೂ ಮುಖಂಡರು, ಹೋರಾಟಗಾರರನ್ನು ಗುರಿಯಾಗಿರಿಸಿಕೊಂಡು  ಅಪರಾಧ ಕೃತ್ಯ ನಡೆಸಲು ಸಂಚು ರೂಪಿಸಿದ್ದರು ಎಂದು ಎನ್ ಐಎ ಆರೋಪಿಸಿದೆ.

ಐಎಸ್ ಐಎಸ್ ಉಗ್ರ ಸಂಘಟನೆಯಿಂದ ಪ್ರೇರಿತಗೊಂಡು ಕೊಯಮತ್ತೂರಿನಲ್ಲಿ ಹಿಂದೂ ಮುಖಂಡರು ಹಾಗೂ ಹೋರಾಟಗಾರರನ್ನು ಗುರಿಯಾಗಿರಿಸಿಕೊಂಡು ಅಪರಾಧ ಕೃತ್ಯ ನಡೆಸಲು ಸಂಚು ರೂಪಿಸಲಾಗಿತ್ತು ಎಂದು ರಾಷ್ಟ್ರೀಯ ತನಿಖಾ ದಳ ತನ್ನ ಹೇಳಿಕೆಯಲ್ಲಿ ತಿಳಿಸಿದೆ.

ಅಶಿಕ್,  ಇಸ್ಮಾಯಿಲ್, ಸಂಸುದೀನ್, ಮೊಹಮ್ಮದ್ ಸಲ್ಲಾ ಉದ್ದೀನ್, ಜಾಫರ್ ಸಾದಿಕ್  ಆಲಿ, ಮತ್ತು ಶಾಹುಲ್ ಹಮೀದ್ ಎಂಬವರ ವಿರುದ್ಧ ಚೆನ್ನೈನಲ್ಲಿನ ವಿಶೇಷ ನ್ಯಾಯಾಲಯದಲ್ಲಿ ಎನ್ ಐಎ ಚಾರ್ಜ್ ಶೀಟ್ ದಾಖಲಿಸಿದೆ.

1967 ರ ಕಾನೂನು ಬಾಹಿರ ಚಟುವಟಿಕೆ (ತಡೆ) ಕಾಯ್ದೆಯ ಸೆಕ್ಷನ್ 18, 18 ಬಿ, 38 ಮತ್ತು 39 ಮತ್ತು ಐಪಿಸಿ ಸೆಕ್ಷನ್  120 ಬಿ, 143, 153 ಎ, 295 ಎ ಮ್ತು 34 ರ ಅನ್ವಯ ಚಾರ್ಜ್ ಶೀಟ್ ದಾಖಲಿಸಲಾಗಿದೆ.

ಕಳೆದ ವರ್ಷ ಕೊಯಂಬತ್ತೂರಿನ ಠಾಣೆಯಲ್ಲಿ ಐಪಿಸಿ ಸೆಕ್ಷನ್ 143, 120 ಬಿ ಹಾಗೂ ಕಾನೂನು ಬಾಹಿರ ಚಟುವಟಿಕೆ ನಿಯಂತ್ರಣ ಕಾಯ್ದೆ ಸೆಕ್ಷನ್ 15, 16, 18, 20 ಮತ್ತು 38 ರ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿತ್ತು.