ಜೈಪುರ: ವಂಚನೆ ಪ್ರಕರಣ ಎದುರಿಸುತ್ತಿರುವ ಉದ್ಯಮಿ ನೀರವ್ ಮೋದಿ ಜೊತೆಗೆ ಕಾಂಗ್ರೆಸ್ ಹಳೆಯ ಹಾಗೂ ಬಲಿಷ್ಠ ನಂಟು ಹೊಂದಿದೆ ಎಂದು ಕೇಂದ್ರ ಸಚಿವ ಪ್ರಕಾಶ್ ಜಾವ್ಡೇಕರ್ ಆರೋಪಿಸಿದ್ದಾರೆ. 

ನೀರವ್ ಮೋದಿ ಲಂಡನ್ ನಲ್ಲಿರುವುದು ಖಾತ್ರಿಯಾಗಿರುವ ವರದಿಯ ಬಗ್ಗೆ ಮಾತನಾಡಿರುವ ಅವರು, ಲಂಡನ್ ನಲ್ಲಿ ನೀರವ್ ಮೋದಿ ಇರುವುದನ್ನು ಕಂಡು ಕಾಂಗ್ರೆಸ್ ಕಾರ್ಯಕರ್ತರಿಗೆ ಸಂತಸವಾಗಿರಬೇಕ, ತಮ್ಮದೇ ಪಕ್ಷ ಆಶ್ರಯ ನೀಡಿದ್ದ, ಮೆರೆಸಿದ್ದ ಉದ್ಯಮಿ ಈಗ ಲಂಡನ್ ನಲ್ಲಿರುವುದಕ್ಕೆ ಕಾಂಗ್ರೆಸ್ ನವರಿಗೆ ಸಂತೋಷವಾಗಿರುತ್ತದೆ ಎಂದು ಜಾವ್ಡೇಕರ್ ಹೇಳಿದ್ದಾರೆ.

ಕಾಂಗ್ರೆಸ್ ಸರ್ಕಾರ ಇರುವಾಗ ಕಳ್ಳರು ದೇಶದಲ್ಲೇ ಇರಲು ಬಯಸುತ್ತಿದ್ದರು. ಕಾಂಗ್ರೆಸ್ ಸರ್ಕಾರದಲ್ಲಿ ಆರಾಮಾಗಿ ಲೂಟಿ ಹೊಡೆಯಲಾಗುತ್ತಿತ್ತು ಸರ್ಕಾರವೇ ಅದಕ್ಕೆ ನೆರವು ನೀಡುತ್ತಿತ್ತು ಎಂದು ಜಾವ್ಡೇಕರ್ ಆರೋಪಿಸಿದ್ದಾರೆ. 

ಆದರೆ ಮೋದಿ ಸರ್ಕಾರ ಬಂದ ನಂತರ ಅವೆಲ್ಲಕ್ಕೂ ಕಡಿವಾಣ ಹಾಕಲಾಯಿತು, ಲೂಟಿ ಮಾಡುತ್ತಿದ್ದ ಉದ್ಯಮಿಗಳಿಗೆ ಭಯ ಪ್ರಾರಂಭವಾಯಿತು. ಈಗ ಕಳ್ಳರೇ ಕಾವಲುಗಾರನನ್ನು ನಿಂದಿಸುತ್ತಿದ್ದಾರೆ ಎಂದು ಜಾವ್ಡೇಕರ್ ಹೇಳಿದ್ದಾರೆ.