ಟಿಕ್ ಟಾಕ್ ವಿಡಿಯೋ ಮಾಡುವಾಗ ಯುವಕನೊಬ್ಬ ರೈಲಿನಿಂದ ಬಿದ್ದಿರುವ ಭಯಾನಕ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ಯುವಕನೋರ್ವ ರೈಲಿನಿಂದ ಕೆಳಗೆ ಓಡುವ ದೃಶ್ಯವನ್ನು ರೈಲಿನ ಒಳಗಡೆ ಕುಳಿತ ಮತ್ತೋರ್ವ ಯುವಕ ಸೆರೆಹಿಡಿಯಲು ಮುಂದಾಗಿದ್ದ. ಈ ವೇಳೆ ಯುವಕ ಚಲಿಸುತ್ತಿದ್ದ ರೈಲಿನ ಕಂಬಿಯನ್ನು ಹಿಡಿದುಕೊಂಡು ಓಡಲು ಮುಂದಾಗಿದ್ದನು. ಆದರೆ ಅದೃಷ್ಟ ಕೈಕೊಟ್ಟಿತ್ತು.
ಯುವಕ ಓಡುವಾಗ ಕಾಲು ಜಾರಿ ಕೆಳಗೆ ಬಿದ್ದಿದ್ದಾನೆ. ಈ ವೇಳೆ ಆತನ ತಲೆ ಮತ್ತು ದೇಹಕ್ಕೆ ರೈಲಿನ ಕಂಬಿಗಳು ಬಡಿದಿವೆ. ಅದೃಷ್ಟವಶಾತ್ ಆತನಿಗೆ ಸಣ್ಣ ಪುಟ್ಟ ಗಾಯಗಳಾಗಿವೆ. ಜೀವಪಾಯದಿಂದ ಪಾರಾಗಿದ್ದಾನೆ. ಈ ವಿಡಿಯೋವನ್ನು ಕೇಂದ್ರ ಸಚಿವ ಪಿಯೂಶ್ ಗೋಯಲ್ ಅವರು ಶೇರ್ ಮಾಡಿದ್ದು ಯಾರೇ ಆಗಲಿ ತಮ್ಮ ಜೀವಕ್ಕೆ ಸಂಚಕಾರ ತಂದುಕೊಳ್ಳುವ ಕೆಲಸಗಳನ್ನು ಮಾಡಬೇಡಿ ಎಂದು ಸಲಹೆ ನೀಡಿದ್ದಾರೆ.