ನವದೆಹಲಿ: "ಮಾಧ್ಯಮ ಪ್ರಾಯೋಜಿತ" ಕಿರಿಯ-ಹಿರಿಯರು ಎಂಬ ತಾರತಮ್ಯಗಿಂತ "ಸೈದ್ಧಾಂತಿಕ ಸ್ಪಷ್ಟತೆಯ ಕೊರತೆಯು ಪಕ್ಷಕ್ಕೆ ಹೆಚ್ಚು ಹಾನಿಯನ್ನುಂಟುಮಾಡಿದೆ" ಎಂದು ಹಿರಿಯ ಕಾಂಗ್ರೆಸ್ ನಾಯಕ, ರಾಜ್ಯಸಭಾ ಸದಸ್ಯ ಹಾಗೂ ಮಧ್ಯಪ್ರದೇಶದ ಮಾಜಿ ಮುಖ್ಯಮಂತ್ರಿ ದಿಗ್ವಿಜಯ್ ಸಿಂಗ್ ಅವರು ಹೇಳಿದ್ದಾರೆ.
ಒಂದು ಕಾಲದಲ್ಲಿ ಕಾಂಗ್ರೆಸ್ ಮಾಜಿ ಅಧ್ಯಕ್ಷ ರಾಹುಲ್ ಗಾಂಧಿಯವರ ಆಪ್ತರಾಗಿದ್ದ ಪಕ್ಷದ ಮಾಜಿ ಪ್ರಧಾನ ಕಾರ್ಯದರ್ಶಿ ದಿಗ್ವಿಜಯ್ ಸಿಂಗ್ ಅವರು, ಕಾಂಗ್ರೆಸ್ ಪಕ್ಷವು ಸೈದ್ಧಾಂತಿಕ ಆಧಾರದ ಮೇಲೆ ಕೆಲಸ ಮಾಡಬೇಕು ಎಂದು ಟ್ವೀಟ್ ಮಾಡುವ ಮೂಲಕ ಪಕ್ಷದ ಕೆಲವು ಮುಖಂಡರ ವಿರುದ್ಧ ಪರೋಕ್ಷವಾಗಿ ವಾಗ್ದಾಳಿ ನಡೆಸಿದ್ದಾರೆ.
"ಮುಖ್ಯವಾಗಿ ಕಾಂಗ್ರೆಸ್ ನಲ್ಲಿ ಕಿರಿಯ ಅಥವಾ ಹಿರಿಯರಲ್ಲಿನ ಸೈದ್ಧಾಂತಿಕ ಸ್ಪಷ್ಟತೆಯ ಕೊರತೆಯೂ ಪಕ್ಷಕ್ಕೆ ಹಾನಿಯನ್ನುಂಟುಮಾಡುತ್ತಿದೆ ಎಂದು ಸಿಂಗ್ ಟ್ವೀಟ್ ಮಾಡಿದ್ದಾರೆ.
ಐಡಿಯಾಲಾಜಿಕಲ್ ಸ್ಪಷ್ಟತೆಯ ಕೊರತೆಯು ನಾಯಕರ ಅಸ್ಪಷ್ಟ ನಿಲುವಿಗೆ ಕಾರಣವಾಗುತ್ತದೆ. ಆರ್‌ಎಸ್‌ಎಸ್ ವಿರುದ್ಧ ಹೋರಾಡುವುದಕ್ಕೆ ಕೆಲವರು ಏಕೆ ನಾಚಿಕೆಪಡುತ್ತಾರೆ? ಅವರದ್ದು ಧ್ರುವೀಕರಣ ಮತ್ತು ಬಡವರ ವಿರೋಧಿ, ರೈತ ವಿರೋಧಿ, ಕಾರ್ಮಿಕ ವಿರೋಧಿ ನೀತಿ, ಒಡೆದು ಆಳುವ ಸಿದ್ಧಾಂತ. ಇದು ಭಾರತದ ಏಕತೆ ಮತ್ತು ಸಮಗ್ರತೆಯನ್ನು ನಾಶಪಡಿಸುತ್ತಿದೆ ಮತ್ತು ಅದರ ಸಾಮಾಜಿಕ, ಆರ್ಥಿಕತೆಯನ್ನು ನಾಶಪಡಿಸುತ್ತಿದೆ" ಎಂದು ಮಾಜಿ ಸಿಎಂ ಹೇಳಿದ್ದಾರೆ.
ಕಾಂಗ್ರೆಸ್ ನ ಹಿರಿಯ ಮುಖಂಡರಲ್ಲಿ ಯಾರು ರಾಹುಲ್ ಜಿ ಅಥವಾ ಪ್ರಿಯಾಂಕಾ ಜಿ ಅವರನ್ನು ವಿರೋಧಿಸುತ್ತಾರೆ? ಒಬ್ಬ ಹಿರಿಯ ನಾಯಕನನ್ನು ಹೆಸರಿಸಿ? ಇಡೀ ಕಾಂಗ್ರೆಸ್ ಒಗ್ಗಟ್ಟಿನಿಂದ ನೆಹರೂ ಗಾಂಧಿ ಕುಟುಂಬದೊಂದಿಗೆ ನಿಂತಿದೆ. ಅವರು ಎಲ್ಲರನ್ನು ಸೇರಿಸುವ ಶಕ್ತಿ" ಎಂದು ದಿಗ್ವಿಜಯ್ ಸಿಂಗ್ ಟ್ವೀಟ್ ಮಾಡಿದ್ದಾರೆ.