ನವದೆಹಲಿ: ದೇಶದ ಹಲವು ಪ್ರದೇಶಗಳಲ್ಲಿ ಓಮಿಕ್ರಾನ್ ಸೋಂಕು ಹೆಚ್ಚಳದ ಆತಂಕ ಕಾಡುತ್ತಿದ್ದು, ಕೇಂದ್ರ ತಂಡಗಳನ್ನು 10 ರಾಜ್ಯಗಳಲ್ಲಿ ನಿಯೋಜನೆ ಮಾಡುವುದಾಗಿ ಕೇಂದ್ರ ಆರೋಗ್ಯ ಸಚಿವಾಲಯ ಮಾಹಿತಿ ನೀಡಿದೆ.
ಲಸಿಕೆ ನೀಡುತ್ತಿರುವುದರಲ್ಲಿ ಕಡಿಮೆ ವೇಗ ಇರುವ ರಾಜ್ಯಗಳು, ಕೋವಿಡ್-19 ಸೋಂಕು ಅಥವಾ ಕೋವಿಡ್-19 ರೂಪಾಂತರಿ ಓಮಿಕ್ರಾನ್ ಸೋಂಕು ಪ್ರಕರಣಗಳು ಹೆಚ್ಚಿರುವ 10 ರಾಜ್ಯಗಳನ್ನು ಪಟ್ಟಿ ಮಾಡಲಾಗಿದ್ದು, ಕೇಂದ್ರ ತಂಡವನ್ನು ನಿಯೋಜಿಸಲಾಗುತ್ತಿದೆ.
ತಮಿಳುನಾಡು, ಕರ್ನಾಟಕ, ಬಿಹಾರ, ಉತ್ತರ ಪ್ರದೇಶ, ಜಾರ್ಖಂಡ್, ಪಂಜಾಬ್, ಮಹಾರಾಷ್ಟ, ಕೇರಳ, ಮಿಜೊರಾಮ್ ಪಶ್ಚಿಮ ಬಂಗಾಳ ರಾಜ್ಯಗಳಲ್ಲಿ ಈ ತಂಡ ನಿಯೋಜನೆಗೊಂಡು ಪರಿಸ್ಥಿತಿ ಸುಧಾರಣೆಗೆ ಸ್ಥಳೀಯ ಆರೋಗ್ಯ ಇಲಾಖೆ, ಆಡಳಿತದೊಂದಿಗೆ ಕಾರ್ಯನಿರ್ವಹಣೆ ಮಾಡಲಿದೆ.
ಸೋಂಕು ಹರಡುವಿಕೆಯ ಪತ್ತೆ, ನಿಗಾ ವಹಿಸುವುದು, ಕಂಟೈನ್ಮೆಂಟ್ ಕಾರ್ಯಾಚರಣೆಗಳು ಹಾಗೂ ಕೋವಿಡ್-19 ಟೆಸ್ಟಿಂಗ್ ಐಎನ್ಎಸ್ಎಸಿಒಜಿ ನೆಟ್ವರ್ಕ್ ಗೆ ಜಿನೋಮ್ ಸೀಕ್ವೆನ್ಸಿಂಗ್ ಗಾಗಿ ಸ್ಯಾಂಪಲ್ ಗಳನ್ನು ಕಳಿಸುವುದು ಮುಂತಾದ ಪ್ರಮುಖ ವಿಷಯಗಳತ್ತ ಈ ಕೇಂದ್ರ ತಂಡ ವಿಶೇಷ ಗಮನ ಹರಿಸಲಿದೆ.
ಕೋವಿಡ್-19 ತಡೆಗೆ ಸೂಕ್ತ ನಡವಳಿಕೆ ಜಾರಿಗೆ ತರುವುದು, ಆಸ್ಪತ್ರೆಗಳಲ್ಲಿ ಬೆಡ್ ಗಳ ಲಭ್ಯತೆ, ಆಂಬುಲೆನ್ಸ್, ವೆಂಟಿಲೇಟರ್, ವೈದ್ಯಕೀಯ ಆಕ್ಸಿಜನ್, ಕೋವಿಡ್-19 ಲಸಿಕೆ ಪ್ರಗತಿ ವಿಷಯಗಳಿಗೂ ಈ ಕೇಂದ್ರ ತಂಡವೇ ಹೊಣೆಯಾಗಿರಲಿದೆ.