ಬೆಂಗಳೂರು: ಕೋವಿಡ್-19 ಮಾದರಿಯಲ್ಲೇ ನಿಫಾ ವೈರಾಣು ಪತ್ತೆಗೆ ಟ್ರೂನ್ಯಾಟ್ ಟೆಸ್ಟ್ ಕಿಟ್ ಗಳ ಬಳಕೆಗೆ ಭಾರತದ ಔಷಧ ನಿಯಂತ್ರಕ (ಡಿಸಿಜಿಐ) ಅನುಮೋದನೆ ನೀಡಿದೆ.
        
ಟ್ರೂನ್ಯಾಟ್-ಎಂಟಿಬಿ ನಿಫಾ ವೈರಸ್ ಕಿಟ್ ಗಳಿಗೆ ವಾಣಿಜ್ಯ ಉತ್ಪಾದನೆ ಪರವಾನಗಿಗೆ ತುರ್ತು ಅನುಮೋದನೆ ದೊರೆತಿದೆ.

2018 ರಲ್ಲಿ ಮೊದಲ ಬಾರಿಗೆ ಕೇರಳದಲ್ಲಿ ನಿಫಾ ವೈರಸ್ ಪತ್ತೆಯಾದಾಗ ಗೋವಾ ಮೂಲದ ಭಾರತದ ಮೊಲ್ಬಿಯೊ ಡಯಾಗ್ನೋಸ್ಟಿಕ್ಸ್ ಎಂಬ ಸಂಸ್ಥೆ ಈ ಕಿಟ್ ಗಳನ್ನು ಅಭಿವೃದ್ಧಿಪಡಿಸಿತ್ತು.

ಈ ಕಿಟ್ ಗಳ ಮೂಲಕ ನಿಫಾ ವೈರಾಣುಗಳನ್ನು ತ್ವರಿತವಾಗಿ ಪತ್ತೆ ಮಾಡಬಹುದಾಗಿದೆ. ಟಿಬಿ, ಕೋವಿಡ್-19, ಹೆಪಿಟೈಟಿಸ್ ಗಳಿಗೆ ಟ್ರೂನ್ಯಾಟ್ ಟೆಸ್ಟ್ ಗಳು ಈಗಾಗಲೇ ಲಭ್ಯವಿದ್ದು ಈಗ ನಿಫಾ ವೈರಾಣುಗಳನ್ನು ತ್ವರಿತವಾಗಿ ಪತ್ತೆ ಹಚ್ಚುವ ಮೂಲಕ ಸೋಂಕು ಹರಡದಂತೆ ಎಚ್ಚರ ವಹಿಸಲು ಈ ಕಿಟ್ ಗಳು ಸಹಕಾರಿಯಾಗಿದೆ.

ಸಂಸ್ಥೆಯ ಸಿಇಒ ಶ್ರೀರಾಮ್ ನಟರಾಜನ್ ಈ ಬಗ್ಗೆ ಮಾತನಾಡಿದ್ದು, ಕೋವಿಡ್-19 ಸೋಂಕು, ಸಾಂಕ್ರಾಮಿಕಗಳ ತ್ವರಿತ ಪತ್ತೆ, ನಿಖರ ಪರೀಕ್ಷೆಯ ಮಹತ್ವವನ್ನು ಕೋವಿಡ್-19 ನಮಗೆ ತಿಳಿಸಿಕೊಟ್ಟಿದೆ. ಟ್ರೂನ್ಯಾಟ್ ಡಿಜಿಸಿಐ ನಿಂದ ನಿಫಾ ವೈರಾಣು ಪತ್ತೆ ಮಾಡಲು ಅನುಮೋದನೆ ಪಡೆದಿರುವ ಮೊದಲ ವೇದಿಕೆಯಾಗಿದ್ದು, 30 ರೋಗಗಳನ್ನು ಪತ್ತೆ ಮಾಡಬಹುದಾಗಿದ್ದು, ಫಲಿತಾಂಶ ಬರಲು ಒಂದು ಗಂಟೆಗಿಂತ ಕಡಿಮೆ ಅವಧಿ ಬೇಕಾಗುತ್ತದೆ" ಎಂದು ಹೇಳಿದ್ದಾರೆ.