ಗುವಾಹಟಿ: ಶಾರೂಖ್ ಖಾನ್ ಯಾರು? ನನಗೆ ಅವರ ಬಗ್ಗೆಯಾಗಲೀ ಅಥವಾ ಅವರ ಸಿನಿಮಾದ ಬಗ್ಗೆಯಾಗಲೀ ಏನೂ ಗೊತ್ತಿಲ್ಲ ಎಂದು ಅಸ್ಸಾಂ ನ ಸಿಎಂ ಹಿಮಂತ ಬಿಸ್ವ ಶರ್ಮ ಹೇಳಿದ್ದಾರೆ. 

ಗುವಾಹಟಿಯ ನರೇಂಗಿಯ ಥಿಯೇಟರ್ ಬಳಿ ಜಮಾಯಿಸಿದ ಬಜರಂಗದಳದ ಕಾರ್ಯಕರ್ತರು ಶಾರೂಖ್ ಖಾನ್ ಅವರ ಪಠಾಣ್ ಸಿನಿಮಾವನ್ನು ವಿರೋಧಿಸಿ ಪ್ರತಿಭಟನೆ ನಡೆಸಿದ್ದರು. ಈ ಬಗ್ಗೆ ಪತ್ರಕರ್ತರ ಪ್ರಶ್ನೆಗೆ ಪ್ರತಿಕ್ರಿಯಿಸಿದ ಹಿಮಂತ ಬಿಸ್ವ ಶರ್ಮಾ, ಖಾನ್ ನನಗೆ ಕರೆ ಮಾಡಿಲ್ಲ. ಹಲವು ಮಂದಿ ಬಾಲಿವುಡ್ ನವರು ಸಮಸ್ಯೆ ಬಗ್ಗೆ ಹೀಗೆ ಮಾಡುತ್ತಾರೆ, ಅವರು ಕರೆ ಮಾಡಿದಲ್ಲಿ ನಾನು ಗಮನಿಸುತ್ತೇನೆ ಎಂದು ಶರ್ಮಾ ಹೇಳಿದ್ದಾರೆ.
 
ಕಾನೂನು ಸುವ್ಯವಸ್ಥೆ ಉಲ್ಲಂಘಿಸಿದರೆ ಕ್ರಮ ಕೈಗೊಳ್ಳಲಾಗುವುದು ಎಂದು ಶರ್ಮಾ ಎಚ್ಚರಿಸಿದ್ದಾರೆ. ಬಾಲಿವುಡ್ ನ ಪಠಾಣ್ ಸಿನಿಮಾದಲ್ಲಿ ದೀಪಿಕಾ ಪಡುಕೋಣೆ ಬೇಶರಮ್ ಹಾಡಿನಲ್ಲಿ ಕೇಸರಿ ಬಿಕಿನಿ ಧರಿಸಿರುವುದಕ್ಕೆ ಹಿಂದೂ ಸಂಘಟನೆಗಳು ತೀವ್ರ ವಿರೋಧ ವ್ಯಕ್ತಪಡಿಸುತ್ತಿದ್ದು, ಚಿತ್ರದ ವಿರುದ್ಧ ಪ್ರತಿಭಟನೆ ನಡೆಸುತ್ತಿದ್ದಾರೆ. 

ಖಾನ್ ಬಾಲಿವುಡ್ ನ ಸೂಪರ್ ಸ್ಟಾರ್ ಎಂದು ಪತ್ರಕರ್ತರು ಹೇಳಿದ್ದಕ್ಕೆ, ಪ್ರತಿಕ್ರಿಯಿಸಿದ ಶರ್ಮಾ, ಪತ್ರಕರ್ತರು ಕಾಳಜಿ ವಹಿಸಬೇಕಾದದ್ದು ಹಿಂದಿ ಸಿನಿಮಾಗಳ ಬಗ್ಗೆ ಅಲ್ಲ, ಅಸ್ಸಾಮಿಗಳ ಬಗ್ಗೆ ಎಂದು ಹೇಳಿದ್ದಾರೆ.