ನವದೆಹಲಿ: ಭಾರತದಲ್ಲಿ ಸೆಪ್ಟೆಂಬರ್ 9 ಮತ್ತು 10ರಂದು ಜಿ20 ಶೃಂಗಸಭೆ ನಡೆಯಲಿದ್ದು ಇದಕ್ಕಾಗಿ ಜಿ20 ನಾಯಕರು ಆಗಮಿಸಲಿದ್ದಾರೆ. ಇನ್ನು ಶೃಂಗಸಭೆಗೂ ಎರಡು ದಿನ ಮುಂಚೆಯೇ ಅಂದರೆ ಇಂದು ಅಮೆರಿಕ ಅಧ್ಯಕ್ಷ ಜೋ ಬೈಡನ್ ಮೊದಲಿಗೆ ಭಾರತಕ್ಕೆ ಆಗಮಿಸುತ್ತಿದ್ದು 18ನೇ ಜಿ20 ಶೃಂಗಸಭೆಗೆ ಕ್ಷಣಗಣನೆಗೆ ಶುರುವಾಗಿದೆ. 

ಜಕಾರ್ತಾದಲ್ಲಿ ನಡೆಯಲಿರುವ ಆಸಿಯಾನ್ ಭಾರತ ಮತ್ತು ಪೂರ್ವ ಏಷ್ಯಾ ಶೃಂಗಸಭೆಯಲ್ಲಿ ಭಾಗವಹಿಸಿದ ನಂತರ ಪ್ರಧಾನಿ ನರೇಂದ್ರ ಮೋದಿ ಅವರು ಸೆಪ್ಟೆಂಬರ್ 7ರಂದು ಸಂಜೆ ದೆಹಲಿಗೆ ಮರಳಲಿದ್ದಾರೆ. ಶೃಂಗಸಭೆಯ ಪೂರ್ವಭಾವಿಯಾಗಿ ಪ್ರಧಾನಿ ಮೋದಿ ಮತ್ತು ಅಧ್ಯಕ್ಷ ಬೈಡನ್ ಸೆಪ್ಟೆಂಬರ್ 8ರಂದು ದ್ವಿಪಕ್ಷೀಯ ಸಭೆ ನಡೆಸಲಿದ್ದಾರೆ. ಹೆಚ್ಚಿನ ನಾಯಕರು ಸೆಪ್ಟೆಂಬರ್ 8ರ ಸಂಜೆಯೊಳಗೆ ದೆಹಲಿಗೆ ಆಗಮಿಸುತ್ತಾರೆ.

ಮುಖ್ಯ ಶೃಂಗಸಭೆಯು ಭಾರತ ಮಂಟಪದಲ್ಲಿ ಸೆಪ್ಟೆಂಬರ್ 9ರಂದು ಪ್ರಗತಿ ಮೈದಾನದಲ್ಲಿ ಪ್ರಾರಂಭವಾಗುತ್ತದೆ. ರಿಷಿ ಸುನಕ್, ಇಮ್ಯಾನುಯೆಲ್ ಮ್ಯಾಕ್ರೋನ್, ಓಲಾಫ್ ಸ್ಕೋಲ್ಜ್ ಮತ್ತು ಫ್ಯೂಮಿಯೊ ಕಿಶಿಡಾ ಈ ಶೃಂಗಸಭೆಯಲ್ಲಿ ಭಾಗವಹಿಸುವ ವಿಶ್ವದ ನಾಯಕರ ಪಟ್ಟಿಯಲ್ಲಿದ್ದಾರೆ.

ಆರ್ಥಿಕತೆ, ಆಹಾರ ಭದ್ರತೆ ಮತ್ತು ಹವಾಮಾನ ಬದಲಾವಣೆ ಕುರಿತು ಚರ್ಚೆಗಳನ್ನು ಒಳಗೊಂಡಿರುವ ಸಭೆಗಳು ಮತ್ತು ಚರ್ಚೆಗಳು ಸೆಪ್ಟೆಂಬರ್ 9ರಂದು ನಡೆಯಲಿವೆ. ಆಫ್ರಿಕನ್ ಯೂನಿಯನ್ ಔಪಚಾರಿಕವಾಗಿ G20ಗೆ ಸೇರುತ್ತದೆ. ಕೂಟವನ್ನು ನಂತರ G21 ಎಂದು ಉಲ್ಲೇಖಿಸಲಾಗುತ್ತದೆ.

ಇದನ್ನೂ ಓದಿ: ರಾಷ್ಟ್ರಪತಿಗಳ ಜಿ20 ಔತಣಕೂಟದಲ್ಲಿ ಮಮತಾ ಬ್ಯಾನರ್ಜಿ ಭಾಗಿ

ಸೆಪ್ಟೆಂಬರ್ 9ರಂದು ಭಾರತದ ರಾಷ್ಟ್ರಪತಿ, ದ್ರೌಪದಿ ಮುರ್ಮು ಅವರು ಭಾರತ ಮಂಟಪದಲ್ಲಿ ಎಲ್ಲಾ ನಾಯಕರು ಮತ್ತು ಇತರ ಗಣ್ಯರಿಗೆ ಭೋಜನವನ್ನು ಆಯೋಜಿಸಲಿದ್ದಾರೆ. ಈ ಔತಣಕೂಟವು ಈಗಾಗಲೇ 'ಭಾರತದ ಅಧ್ಯಕ್ಷ'ರಿಂದ ಆಹ್ವಾನ ಬಂದಿದ್ದರಿಂದ ಸುದ್ದಿಯಲ್ಲಿದೆ.

ಶೃಂಗಸಭೆಯ ದಿನದಂದು, ನಾಯಕರ ಸಂಗಾತಿಗಳಿಗಾಗಿ ವಿಶೇಷ ಪ್ರವಾಸವನ್ನು ರೂಪಿಸಲಾಗಿದೆ. ಇದು ಅಗ್ರಿಕಲ್ಚರ್ ಇನ್‌ಸ್ಟಿಟ್ಯೂಟ್, ರಾಜ್‌ಘಾಟ್, ನ್ಯಾಷನಲ್ ಗ್ಯಾಲರಿ ಆಫ್ ಮಾಡರ್ನ್ ಆರ್ಟ್ ಮತ್ತು ಶಾಪಿಂಗ್ ಟ್ರಿಪ್‌ಗೆ ಭೇಟಿ ನೀಡುತ್ತದೆ.

PHOTOS: ಜಿ20 ಶೃಂಗಸಭೆಗೆ ಆಕರ್ಷಕವಾಗಿ ಸಿಂಗಾರಗೊಂಡಿರುವ 'ಭಾರತ ಮಂಟಪ'!

ಸೆ.10ರಂದು ಬೆಳಗ್ಗೆ ಮತ್ತೆ ನಾಯಕರು ಸಭೆ ಸೇರಿ ಜಂಟಿ ಘೋಷಣೆ ಅಥವಾ ನಾಯಕರ ಹೇಳಿಕೆಯ ಅಂತಿಮ ಕರಡು ಪ್ರಕಟಿಸಲಾಗುವುದು. ನಂತರ G20 ಅಧ್ಯಕ್ಷ ಸ್ಥಾನವನ್ನು ಬ್ರೆಜಿಲ್‌ಗೆ ಹಸ್ತಾಂತರಿಸಲಾಗುವುದು. ಹೆಚ್ಚಿನ ನಾಯಕರು ಸೆಪ್ಟೆಂಬರ್ 10ರ ಸಂಜೆ ಹಾಗೂ ಸೆಪ್ಟೆಂಬರ್ 11ರ ಬೆಳಿಗ್ಗೆ ದೆಹಲಿಯಿಂದ ಹೊರಡುತ್ತಾರೆ.

ಶೃಂಗಸಭೆಯಲ್ಲಿ ಭಾಗವಹಿಸುತ್ತಿರುವ ನಾಯಕರು:
ಅರ್ಜೆಂಟೀನಾ -- ಆಲ್ಬರ್ಟೊ ಫೆರ್ನಾಂಡಿಸ್
ಆಸ್ಟ್ರೇಲಿಯಾ - ಆಂಥೋನಿ ಅಲ್ಬನೀಸ್
ಬ್ರೆಜಿಲ್ - ಲೂಯಿಜ್ ಇನಾಸಿಯೊ
ಕೆನಡಾ - ಜಸ್ಟಿನ್ ಟ್ರುಡೊ
ಚೀನಾ--ಲಿ ಚಿಯಾಂಗ್
ಫ್ರಾನ್ಸ್ - ಎಮ್ಯಾನುಯೆಲ್ ಮ್ಯಾಕ್ರನ್
ಜರ್ಮನಿ--ಓಲಾಫ್ ಸ್ಕೋಲ್ಜ್
ಭಾರತ - ನರೇಂದ್ರ ಮೋದಿ
ಇಂಡೋನೇಷ್ಯಾ - ಜೋಕೊ ವಿಡೋಡೋ
ಇಟಲಿ --ಜಾರ್ಜಿಯಾ ಮೆಲೋನಿ
ಜಪಾನ್ -- ಫ್ಯೂಮಿಯೋ ಕಿಶಿಡಾ
ಮೆಕ್ಸಿಕೋ -- ಆಂಡ್ರೆಸ್ ಮ್ಯಾನುಯೆಲ್
ದಕ್ಷಿಣ ಕೊರಿಯಾ - ಯೂನ್ ಸುಕ್ ಯೆಯೋಲ್
ರಷ್ಯಾ - ಸೆರ್ಗೆ ಲಾವ್ರೊವ್
ಸೌದಿ ಅರೇಬಿಯಾ - ಮುಹಮ್ಮದ್ ಬಿನ್ ಸಲ್ಮಾನ್
ದಕ್ಷಿಣ ಆಫ್ರಿಕಾ - ಸಿರಿಲ್ ರಾಮಫೋಸಾ
ಟರ್ಕಿ - ಆರ್ಸಿ ಎರ್ಡೋಗನ್
ಯುನೈಟೆಡ್ ಕಿಂಗ್‌ಡಮ್ -- ರಿಷಿ ಸುನಕ್
ಯುನೈಟೆಡ್ ಸ್ಟೇಟ್ಸ್ -- ಜೋ ಬಿಡೆನ್
ಯುರೋಪಿಯನ್ ಯೂನಿಯನ್--ಚಾರ್ಲ್ಸ್ ಮೈಕೆಲ್