ಪ್ರಯಾಗ್ ರಾಜ್: ಪ್ರಯಾಗ್ ರಾಜ್ ನಲ್ಲಿ ಈ ಬಾರಿ ನಡೆಯಲಿರುವ ಮಹಾಕುಂಭಮೇಳ ಎಲ್ಲರನ್ನೂ ಆಕರ್ಷಿಸುತ್ತಿದೆ.
ಕುಂಭಮೇಳಕ್ಕೆ ಸಾಕ್ಷಿಯಾಗುವ ಯಾರಾದರೂ ಕ್ಷಣಹೊತ್ತಾದರೂ ಆಧ್ಯಾತ್ಮದ ಅನುಭೂತಿ ಪಡೆಯುತ್ತಾರೆ. ಆದರೆ ಇಲ್ಲೊಬ್ಬ ಬಾಲಕಿ ಮಹಾಕುಂಭಮೇಳಕ್ಕೆ ಪರವಶಳಾಗಿ ಸನ್ಯಾಸಿಯಾಗಲು ನಿರ್ಧರಿಸಿದ್ದಾಳೆ. ಆಕೆಯ ಹೆಸರು ರಾಖಿ. ಐಎಎಸ್ ಅಧಿಕಾರಿಯಾಗುವ ಕನಸು ಹೊತ್ತಿದ್ದ 13 ರ ಬಾಲಕಿ.
ಆಗ್ರಾ ಮೂಲದ ಈ ಬಾಲಕಿಯನ್ನು ಆಕರ್ಷಿಸಿದ್ದು ಕೇವಲ ಮಹಾಕುಂಭವಷ್ಟೇ ಅಲ್ಲದೇ ಜುನಾ ಅಖಾಡದ ಮಹಾಂತ್ ಕೌಶಲ್ ಗಿರಿ ಮಹಾರಾಜ್ (Mahant Kaushal Giri Maharaj) ಅವರ ಆಧ್ಯಾತ್ಮಿಕ ಬೋಧನೆಗಳೂ ಆಕೆಯನ್ನು ಆಧ್ಯಾತ್ಮದತ್ತ ಆಕರ್ಷಿಸಿವೆ.
ರಾಖಿಯ ನಿರ್ಧಾರಕ್ಕೆ ಸಂತೋಷದಿಂದ ಒಪ್ಪಿಗೆ ನೀಡಿರುವ ಆಕೆಯ ಪೋಷಕರು ಹೇಳಿದ್ದಿಷ್ಟು...
"ಜುನಾ ಅಖಾರದ ಮಹಂತ್ ಕೌಶಲ್ ಗಿರಿ ಮಹಾರಾಜ್ ಅವರು ಕಳೆದ ಮೂರು ವರ್ಷಗಳಿಂದ ನಮ್ಮ ಗ್ರಾಮಕ್ಕೆ ಭಗವತ್ ಕಥಾ ಅಧಿವೇಶನಗಳನ್ನು ನಡೆಸಲು ಭೇಟಿ ನೀಡುತ್ತಿದ್ದಾರೆ. ಅಂತಹ ಒಂದು ಅಧಿವೇಶನದಲ್ಲಿ ನನ್ನ ಮಗಳು ರಾಖಿ ತನ್ನ ಗುರು ದೀಕ್ಷೆಯನ್ನು ತೆಗೆದುಕೊಂಡಳು" ಎಂದು ಜುನಾ ಅಖಾರಾ ಶಿಬಿರದಲ್ಲಿ ನೆಲೆಸಿರುವ ರೀಮಾ ಸಿಂಗ್ ತಿಳಿಸಿದ್ದಾರೆ.
ಕೌಶಲ್ ಗಿರಿ ಮಹಾರಾಜ್ ಅವರು ಕಳೆದ ತಿಂಗಳು ಮಹಾ ಕುಂಭ ಶಿಬಿರದಲ್ಲಿ ಸೇವೆ ಸಲ್ಲಿಸಲು ತಮ್ಮ ಪತಿ ಸಂದೀಪ್ ಸಿಂಗ್ ಮತ್ತು ಅವರ ಇಬ್ಬರು ಪುತ್ರಿಯರನ್ನು ಆಹ್ವಾನಿಸಿದ್ದರು ಎಂದು ರೀಮಾ ವಿವರಿಸಿದರು.
"ಒಂದು ದಿನ, ರಾಖಿ ಸಾಧ್ವಿಯಾಗಬೇಕೆಂಬ ತನ್ನ ಇಚ್ಛೆಯನ್ನು ವ್ಯಕ್ತಪಡಿಸಿದಳು. ಅದು ದೇವರ ಇಚ್ಛೆ ಎಂದು ನಂಬಿ, ನಾವು ಯಾವುದೇ ಆಕ್ಷೇಪಣೆಯನ್ನು ವ್ಯಕ್ತಪಡಿಸಲಿಲ್ಲ" ಎಂದು ರೀಮಾ ಹೇಳಿದ್ದಾರೆ. ಆಗ್ರಾ ಮೂಲದ ಕುಟುಂಬವು ತಮ್ಮ ಹೆಣ್ಣುಮಕ್ಕಳಾದ ರಾಖಿ ಮತ್ತು 8 ವರ್ಷದ ನಿಕ್ಕಿಗೆ ಶಿಕ್ಷಣ ನೀಡಲು ನಗರದಲ್ಲಿ ನಿರ್ದಿಷ್ಟವಾಗಿ ಮನೆಯೊಂದನ್ನು ಬಾಡಿಗೆಗೆ ಪಡೆದಿತ್ತು. ಸಂದೀಪ್ ಸಿಂಗ್ ಮಿಠಾಯಿ ವ್ಯಾಪಾರ ನಡೆಸುತ್ತಿದ್ದಾರೆ.
"ರಾಖಿ ಐಎಎಸ್ ಅಧಿಕಾರಿಯಾಗಬೇಕೆಂದು ಕನಸು ಕಂಡಿದ್ದಳು, ಆದರೆ ಮಹಾಕುಂಭದ ಸಮಯದಲ್ಲಿ ಅವರು ಲೌಕಿಕ ಜೀವನದಿಂದ ನಿರ್ಲಿಪ್ತತೆಯನ್ನು ಅನುಭವಿಸಿ, ಸಾಧ್ವಿಯಾಗುವ ನಿರ್ಧಾರಕ್ಕೆ ಬಂದಿದ್ದಾಳೆ" ಎಂದು ರೀಮಾ ಹೇಳಿದ್ದಾರೆ. ಕುಟುಂಬ ಮನಃಪೂರ್ವಕವಾಗಿ ತಮ್ಮ ಮಗಳನ್ನು ಆಶ್ರಮಕ್ಕೆ ನೀಡಿದೆ ಎಂದು ಮಹಂತ್ ಕೌಶಲ್ ಗಿರಿ ದೃಢಪಡಿಸಿದರು.
"ಯಾವುದೇ ಬಲವಂತವಿಲ್ಲದೆ ಈ ನಿರ್ಧಾರವನ್ನು ತೆಗೆದುಕೊಳ್ಳಲಾಗಿದೆ. ಕೆಲವು ಸಮಯದಿಂದ ಕುಟುಂಬವು ನಮ್ಮೊಂದಿಗೆ ಸಂಪರ್ಕ ಹೊಂದಿದೆ, ಮತ್ತು ಅವರ ಕೋರಿಕೆಯ ಮೇರೆಗೆ ರಾಖಿಯನ್ನು ಆಶ್ರಮಕ್ಕೆ ಸ್ವೀಕರಿಸಲಾಗಿದೆ. ರಾಖಿ ಇನ್ನು ಮುಂದೆ ಗೌರಿ ಗಿರಿ ಎಂದು ಕರೆಯಲ್ಪಡುತ್ತಾಳೆ" ಎಂದು ಅವರು ಹೇಳಿದರು.
ತನ್ನ ಮಗಳ ಕಾಳಜಿಯ ಬಗ್ಗೆ ಕೇಳಿದಾಗ, "ಒಬ್ಬ ತಾಯಿಯಾಗಿ, ಅವಳು ಎಲ್ಲಿದ್ದಾಳೆ ಮತ್ತು ಹೇಗಿದ್ದಾಳೆ ಎಂದು ನಾನು ಯಾವಾಗಲೂ ಚಿಂತಿಸುತ್ತೇನೆ. ನಾವು ನಮ್ಮ ಮಗಳನ್ನು ಆಶ್ರಮಕ್ಕೆ ಏಕೆ ಒಪ್ಪಿಸಿದ್ದೇವೆ ಎಂದು ಸಂಬಂಧಿಕರು ಆಗಾಗ್ಗೆ ಪ್ರಶ್ನಿಸುತ್ತಾರೆ. ಇದು ದೇವರ ಆಶಯವಾಗಿದೆ" ಎಂಬುದು ನಮ್ಮ ಪ್ರತಿಕ್ರಿಯೆಯಾಗಿರಲಿದೆ ಎಂದು ರೀಮಾ ಹೇಳಿದರು. ಅಖಾಡದ ಸಂತರೊಬ್ಬರು ಗೌರಿಯ "ಪಿಂಡ್ ದಾನ" (ಕುಟುಂಬ ಪರಿತ್ಯಾಗಕ್ಕಾಗಿ ಧಾರ್ಮಿಕ ಅರ್ಪಣೆಗಳು) ಮತ್ತು ಇತರ ಧಾರ್ಮಿಕ ಸಮಾರಂಭಗಳನ್ನು ಜನವರಿ 19 ರಂದು ನಡೆಸಲಾಗುವುದು, ನಂತರ ಅವರನ್ನು ಔಪಚಾರಿಕವಾಗಿ ಗುರುವಿನ ಕುಟುಂಬದ ಭಾಗವೆಂದು ಪರಿಗಣಿಸಲಾಗುವುದು ಎಂದು ಉಲ್ಲೇಖಿಸಿದ್ದಾರೆ.