ನವದೆಹಲಿ: ನಿರೀಕ್ಷೆಯಂತೆಯೇ ಭಾರತಕ್ಕೆ ನಿಗಧಿತ ಅವಧಿಗಿಂತ ಮುಂಚಿತವಾಗಿಯೇ ನೈಋತ್ಯ ಮಾನ್ಸೂನ್ ಮಾರುತಗಳು ಆಗಮಿಸಿದ್ದು, ಶನಿವಾರ ಕೇರಳ ರಾಜ್ಯಕ್ಕೆ ಅಪ್ಪಳಿಸಿದೆ.

2009ರ ಬಳಿಕ ಇದೇ ಮೊದಲ ಬಾರಿಗೆ ಮಾನ್ಸೂನ್ ಮಾರುತಗಳು ನಿಗಧಿತ ಅವಧಿಗಿಂತ ಮುಂಚಿತವಾಗಿಯೇ ಭಾರತ ಪ್ರವೇಶಿಸಿವೆ. ಈ ಹಿಂದೆ 2009ರಲ್ಲಿ ಮೇ 23 ರಂದು ದಕ್ಷಿಣ ರಾಜ್ಯ ಕೇರಳಕ್ಕೆ ಮಾನ್ಸೂನ್ ಮಾರುತಗಳು ಪ್ರವೇಶ ಮಾಡಿದ್ದವು. ಬಳಿಕ ಇದೇ ಮೊದಲ ಬಾರಿಗೆ ಮಾನ್ಸೂನ್ ಮಾರುತಗಳು ಕೇರಳ ಮೂಲಕ ಭಾರತ ಪ್ರವೇಶ ಮಾಡಿವೆ ಎಂದು ಭಾರತೀಯ ಹವಾಮಾನ ಇಲಾಖೆ (ಐಎಂಡಿ) ತಿಳಿಸಿದೆ.

ಸಾಮಾನ್ಯವಾಗಿ, ನೈಋತ್ಯ ಮಾನ್ಸೂನ್ ಜೂನ್ 1 ರ ವೇಳೆಗೆ ಕೇರಳದ ಮೇಲೆ ಪ್ರಾರಂಭವಾಗುತ್ತದೆ ಮತ್ತು ಜುಲೈ 8 ರ ವೇಳೆಗೆ ಇಡೀ ದೇಶವನ್ನು ಆವರಿಸುತ್ತದೆ. ಇದು ಸೆಪ್ಟೆಂಬರ್ 17 ರ ಸುಮಾರಿಗೆ ವಾಯುವ್ಯ ಭಾರತದಿಂದ ಹಿಮ್ಮೆಟ್ಟಲು ಪ್ರಾರಂಭಿಸುತ್ತದೆ ಮತ್ತು ಅಕ್ಟೋಬರ್ 15 ರ ವೇಳೆಗೆ ಸಂಪೂರ್ಣವಾಗಿ ಹಿಮ್ಮೆಟ್ಟುತ್ತದೆ ಎಂದು ಹವಾಮಾನ ಇಲಾಖೆ ಅಧಿಕಾರಿಗಳು ಹೇಳಿದ್ದಾರೆ.

ಮಾನ್ಸೂನ್ ಪ್ರವೇಶ ಇತಿಹಾಸ

ಕಳೆದ ವರ್ಷ ಮೇ 30 ರಂದು ದಕ್ಷಿಣ ರಾಜ್ಯದಲ್ಲಿ ಮಾನ್ಸೂನ್ ಪ್ರವೇಶಿಸಿತ್ತು, ಬಳಿಕ 2023ರಲ್ಲಿ ಜೂನ್ 8, 2022ರಲ್ಲಿ ಮೇ 29ರಂದು, 2021ರಲ್ಲಿ ಜೂನ್ 3ರಂದು, 2020 ಜೂನ್ 1ರಂದು, 2019 ಜೂನ್ 8 ರಂದು; ಮತ್ತು 2018ರಲ್ಲಿ ಮೇ 29 ರಂದು ಮಾನ್ಸೂನ್ ಮಾರುತಗಳು ಭಾರತ ಪ್ರವೇಶ ಮಾಡಿದ್ದವು ಎಂದು ಐಎಂಡಿ ದತ್ತಾಂಶ ತೋರಿಸಿದೆ. 1975 ರಿಂದ ಲಭ್ಯವಿರುವ ದತ್ತಾಂಶವು, ಮಾನ್ಸೂನ್ ಕೇರಳವನ್ನು 1990 ರಲ್ಲಿ (ಮೇ 19 ರಂದು) ಸಾಮಾನ್ಯ ದಿನಾಂಕಕ್ಕಿಂತ 13 ದಿನಗಳ ಮೊದಲು ತಲುಪಿತ್ತು.

ಹವಾಮಾನಶಾಸ್ತ್ರಜ್ಞರ ಪ್ರಕಾರ, ಆರಂಭದ ದಿನಾಂಕ ಮತ್ತು ಋತುವಿನಲ್ಲಿ ದೇಶದಾದ್ಯಂತ ಒಟ್ಟು ಮಳೆಯ ನಡುವೆ ಯಾವುದೇ ನೇರ ಸಂಬಂಧವಿಲ್ಲ. ಕೇರಳದಲ್ಲಿ ಮಾನ್ಸೂನ್ ಮುಂಚಿತವಾಗಿ ಅಥವಾ ತಡವಾಗಿ ಆಗಮಿಸುತ್ತಿದೆ ಎಂದರೆ ಅದು ದೇಶದ ಇತರ ಭಾಗಗಳನ್ನು ಆವರಿಸುತ್ತದೆ ಎಂದರ್ಥವಲ್ಲ. ಇದು ದೊಡ್ಡ ಪ್ರಮಾಣದ ವ್ಯತ್ಯಾಸಗಳು ಮತ್ತು ಜಾಗತಿಕ, ಪ್ರಾದೇಶಿಕ ಮತ್ತು ಸ್ಥಳೀಯ ವೈಶಿಷ್ಟ್ಯಗಳಿಂದ ನಿರೂಪಿಸಲ್ಪಟ್ಟಿದೆ ಎಂದು ಐಎಂಡಿ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಏಪ್ರಿಲ್‌ನಲ್ಲಿ ಐಎಂಡಿ 2025 ರ ಮಾನ್ಸೂನ್ ಋತುವಿನಲ್ಲಿ ಸಾಮಾನ್ಯಕ್ಕಿಂತ ಹೆಚ್ಚಿನ ಸಂಚಿತ ಮಳೆಯನ್ನು ಮುನ್ಸೂಚನೆ ನೀಡಿತ್ತು. ಇದು ಭಾರತದಲ್ಲಿ ಸಾಮಾನ್ಯಕ್ಕಿಂತ ಕಡಿಮೆ ಮಳೆಯೊಂದಿಗೆ ಸಂಬಂಧಿಸಿದ ಎಲ್ ನಿನೊ ಪರಿಸ್ಥಿತಿಗಳ ಸಾಧ್ಯತೆಯನ್ನು ತಳ್ಳಿಹಾಕುತ್ತದೆ.

ಐಎಂಡಿ ಪ್ರಕಾರ, 50 ವರ್ಷಗಳ ಸರಾಸರಿ 87 ಸೆಂ.ಮೀ.ಗಳಲ್ಲಿ ಶೇ. 96 ರಿಂದ ಶೇ. 104 ರವರೆಗಿನ ಮಳೆಯನ್ನು 'ಸಾಮಾನ್ಯ' ಎಂದು ಪರಿಗಣಿಸಲಾಗುತ್ತದೆ.

ದೀರ್ಘಾವಧಿಯ ಸರಾಸರಿಯ ಶೇ. 90 ಕ್ಕಿಂತ ಕಡಿಮೆ ಮಳೆಯನ್ನು 'ಕೊರತೆ' ಎಂದು ಪರಿಗಣಿಸಲಾಗುತ್ತದೆ; ಶೇ. 90 ರಿಂದ 95 ರ ನಡುವೆ 'ಸಾಮಾನ್ಯಕ್ಕಿಂತ ಕಡಿಮೆ'; ಶೇ. 105 ರಿಂದ 110 ರ ನಡುವೆ 'ಸಾಮಾನ್ಯಕ್ಕಿಂತ ಹೆಚ್ಚು'; ಮತ್ತು ಶೇ. 110 ಕ್ಕಿಂತ ಹೆಚ್ಚು ಮಳೆಯನ್ನು 'ಅಧಿಕ' ಮಳೆ ಎಂದು ಪರಿಗಣಿಸಲಾಗುತ್ತದೆ. ಅದರಂತೆ ಭಾರತದಲ್ಲಿ 2024 ರಲ್ಲಿ 934.8 ಮಿಮೀ ಮಳೆಯಾಗಿದ್ದು, ಇದು ಸರಾಸರಿಯ 108 ಪ್ರತಿಶತ ಮತ್ತು 2020 ರ ನಂತರದ ಅತ್ಯಧಿಕ ಮಳೆಯಾಗಿದೆ.

ಆಂತೆಯೇ 2023 ರಲ್ಲಿ, ಇದು 820 ಮಿಮೀ ದಾಖಲಾಗಿದ್ದು, ಇದು ಸರಾಸರಿಯ 94.4 ಪ್ರತಿಶತ ಎನ್ನಲಾಗಿದೆ. 2022ರಲ್ಲಿ, ಇದು 925 ಮಿಮೀ; 2021ರಲ್ಲಿ 870 ಮಿಮೀ; ಮತ್ತು 2020 ರಲ್ಲಿ 958 ಮಿಮೀ ಎಂದು IMD ದತ್ತಾಂಶವು ತಿಳಿಸಿದೆ.

ಭಾರತದ ಕೃಷಿ ವಲಯಕ್ಕೆ ಮಾನ್ಸೂನ್ ನಿರ್ಣಾಯಕವಾಗಿದ್ದು, ಇದು ಜನಸಂಖ್ಯೆಯ ಸುಮಾರು ಶೇಕಡಾ 42 ರಷ್ಟು ಜನರ ಜೀವನೋಪಾಯವನ್ನು ಬೆಂಬಲಿಸುತ್ತದೆ ಮತ್ತು ದೇಶದ GDP ಗೆ ಶೇಕಡಾ 18.2 ರಷ್ಟು ಕೊಡುಗೆ ನೀಡುತ್ತದೆ. ದೇಶಾದ್ಯಂತ ಕುಡಿಯುವ ನೀರು ಮತ್ತು ವಿದ್ಯುತ್ ಉತ್ಪಾದನೆಗೆ ನಿರ್ಣಾಯಕವಾಗಿರುವ ಜಲಾಶಯಗಳನ್ನು ಮರುಪೂರಣಗೊಳಿಸಲು ಇದು ಅತ್ಯಗತ್ಯ.