ಸಾಮಾನ್ಯವಾಗಿ ಯಾವುದಾದರೂ ಒಂದೆರಡು ಗ್ರಾಮಗಳಿಗೆ ಸೇರಿ ಒಂದೇ ಒಂದು ಬ್ಯಾಂಕ್​​​ ಇರುತ್ತದೆ. ಮಿಸ್ ಆದ್ರೆ, ಎರಡು! ಆದ್ರೆ, ನಿಮಗೆ ಗೊತ್ತಾ, ಭಾರತದ ಒಂದು ಪುಟ್ಟ ಹಳ್ಳಿಯಲ್ಲಿ ಬರೋಬ್ಬರಿ 17 ಬ್ಯಾಂಕ್​​​ಗಳು ತಮ್ಮ ಬ್ರಾಂಚ್ ಓಪನ್ ಮಾಡಿವೆ! ಹಾಗಾದ್ರೆ, ಆ ಹಳ್ಳಿಯಲ್ಲಿ ಇರುವ ವಿಶೇಷತೆಯಾದ್ರು ಏನು? ನೋಡುವುದಕ್ಕೆ ಸಾಮಾನ್ಯ ಹಳ್ಳಿಯಂತೆ ಕಂಡರೂ, ಇಲ್ಲಿನ ನಿವಾಸಿಗಳ ಬ್ಯಾಂಕ್ ಬ್ಯಾಲೆನ್ಸ್ ನೋಡಿದರೆ ದಂಗಾಗುವುದು ಖಂಡಿತ.! ಅಷ್ಟೇ ಅಲ್ಲ ಈ ಸಣ್ಣ ಗ್ರಾಮವು ಇಂದು ಏಷ್ಯಾದ ಅತ್ಯಂತ ಶ್ರೀಮಂತ ಗ್ರಾಮ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಆ ಕುರಿತ ವರದಿ ಇಲ್ಲಿದೆ:

ಕೇವಲ 17 ಬ್ಯಾಂಕ್‌ಗಳಲ್ಲ, ಆ ಬ್ಯಾಂಕ್‌ ಶಾಖೆಗಳಲ್ಲಿ ಗ್ರಾಮಸ್ಥರು ಬರೋಬ್ಬರಿ ₹7,000 ಕೋಟಿಗೂ ಹೆಚ್ಚು ಹಣವನ್ನು ಫಿಕ್ಸೆಡ್ ಡೆಪಾಸಿಟ್ ರೂಪದಲ್ಲಿ ಇಟ್ಟು ಜಗತ್ತಿನ ಗಮನ ಸೆಳೆದಿದ್ದಾರೆ. ಈ ಅದ್ಭುತ ಸಾಧನೆ ಮಾಡಿದ ಭಾರತದ ಆ ಹೆಮ್ಮೆಯ ಗ್ರಾಮ ಗುಜರಾತ್‌ನ ಕಚ್ ಜಿಲ್ಲೆಯಲ್ಲಿರುವ ಮಾಧಾಪುರ.

ಇಷ್ಟೊಂದು ಬ್ಯಾಂಕ್‌ಗಳು ಈ ಹಳ್ಳಿಗೆ ಯಾಕೆ ಬಂದವು?

ಮಾಧಾಪುರದಲ್ಲಿ ಕೇವಲ 32,000 ಜನಸಂಖ್ಯೆ ಇದೆ. ಆದರೆ ಇಲ್ಲಿ SBI, HDFC, ICICI, PNB, Axis ಮತ್ತು Union Bank ನಂತಹ ದೇಶದ ಮುಂಚೂಣಿ 17ಕ್ಕೂ ಹೆಚ್ಚು ಪ್ರಮುಖ ಬ್ಯಾಂಕ್‌ಗಳು ತಮ್ಮ ಶಾಖೆಗಳನ್ನು ತೆರೆದಿವೆ. ಹಳ್ಳಿಯ ಜನರ ಬಳಿ ಇರುವ ಅಪಾರ ಹಣವನ್ನು ನಿರ್ವಹಿಸಲೆಂದೇ ಇಷ್ಟೊಂದು ಬ್ಯಾಂಕ್‌ಗಳು ಇಲ್ಲಿ ಪೈಪೋಟಿಗೆ ಬಿದ್ದಿವೆ.

ಸಾವಿರಾರು ಕೋಟಿ ಹಣ ಎಲ್ಲಿಂದ ಬಂತು?

ಈ ಹಳ್ಳಿಯ ಶ್ರೀಮಂತಿಕೆಯ ಅಸಲಿ ರಹಸ್ಯ ಇರುವುದು ಇಲ್ಲಿನ ಜನರ ದೇಶಪ್ರೇಮದಲ್ಲಿ. ಮಾಧಾಪುರದ ಸುಮಾರು 1,200ಕ್ಕೂ ಹೆಚ್ಚು ಕುಟುಂಬಗಳು ವಿದೇಶಗಳಲ್ಲಿ (ಲಂಡನ್, ಅಮೆರಿಕ, ಆಫ್ರಿಕಾ, ಮತ್ತು ಗಲ್ಫ್ ದೇಶಗಳಲ್ಲಿ) ನೆಲೆಸಿದ್ದಾರೆ. ಇವರು ವಿದೇಶದಲ್ಲಿ ಗಳಿಸಿದ ಹಣವನ್ನು ಅಲ್ಲೇ ಬ್ಯಾಂಕ್‌ಗಳಲ್ಲಿ ಇಡುವುದಿಲ್ಲ. ಬದಲಾಗಿ, ತಮ್ಮ ಸ್ವಂತ ಹಳ್ಳಿಯ ಬ್ಯಾಂಕ್‌ ಖಾತೆಗಳಿಗೆ ಕಳುಹಿಸುತ್ತಾರೆ. ದಶಕಗಳಿಂದ ಈ ರೀತಿ ಹಣ ಒಟ್ಟುಗೂಡಿ ಇಂದು ₹7,000 ಕೋಟಿಯ ದಾಟಿದೆ. ಅದರಂತೆ, ಇಲ್ಲಿನ ಪ್ರತಿಯೊಂದು ಮನೆಯ ಖಾತೆಯಲ್ಲೂ ಸರಾಸರಿ ₹15 ಲಕ್ಷದಿಂದ ₹20 ಲಕ್ಷದವರೆಗೆ ಕೇವಲ ಉಳಿತಾಯದ ಹಣವೇ ಇರುತ್ತದೆ.

ಮುಂದುವರೆದು, ಬ್ಯಾಂಕ್‌ಗಳಲ್ಲಿ ಇಷ್ಟೊಂದು ಹಣವಿರುವುದರಿಂದ ಈ ಹಳ್ಳಿ ಯಾವುದೇ ಮೆಟ್ರೋ ನಗರಕ್ಕೂ ಕಮ್ಮಿ ಇಲ್ಲದಂತೆ ಅಭಿವೃದ್ಧಿ ಹೊಂದಿದೆ. ಅದರಂತೆ, ಹಳ್ಳಿಯಲ್ಲಿ ಅತ್ಯಾಧುನಿಕ ಅಂತರರಾಷ್ಟ್ರೀಯ ಶಾಲೆಗಳು ಮತ್ತು ಕಾಲೇಜುಗಳಿವೆ. ಜೊತೆಗೆ ಸುಸಜ್ಜಿತ ಖಾಸಗಿ ಕ್ಲಬ್‌ಗಳು, ಶಾಪಿಂಗ್ ಕಾಂಪ್ಲೆಕ್ಸ್‌ಗಳು ಮತ್ತು ದೊಡ್ಡ ಆಸ್ಪತ್ರೆಗಳಿವೆ. ಹಾಗೂ ಇಲ್ಲಿನ ರಸ್ತೆಗಳು, ಶುದ್ಧ ಕುಡಿಯುವ ನೀರು ಮತ್ತು ನೈರ್ಮಲ್ಯ ವ್ಯವಸ್ಥೆ ಅತ್ಯಂತ ಮಾದರಿಯಾಗಿದೆ. ವಿಶೇಷವೆಂದರೆ, ಈ ಎಲ್ಲ ಸೌಲಭ್ಯಗಳಿಗೆ ಹಳ್ಳಿಯವರು ಸರ್ಕಾರದ ಅನುದಾನಕ್ಕಾಗಿ ಕಾಯುವುದಿಲ್ಲ; ಬದಲಾಗಿ, ತಾವೇ ಹಣ ಒಟ್ಟುಗೂಡಿಸಿ ಅಭಿವೃದ್ಧಿ ಮಾಡಿಕೊಳ್ಳುತ್ತಾರೆ.