ರಾಂಚಿ (ಜಾರ್ಖಂಡ್): ಜಾರ್ಖಂಡ್ ರಾಜಧಾನಿ ರಾಂಚಿಯ ಹೊತ್ವಾರ್‌ನಲ್ಲಿರುವ ಬಿರ್ಸಾ ಮುಂಡಾ ಕೇಂದ್ರ ಜೈಲಿನಲ್ಲಿ 20 ವರ್ಷದ ವಿಚಾರಣಾಧೀನ ಕೈದಿಯೊಬ್ಬನಿಗೆ ಮಾದಕ ದ್ರವ್ಯ ನೀಡಿ ಮೂರು ಬಾರಿ ಸಾಮೂಹಿಕ ಅತ್ಯಾಚಾರ (ಅಸ್ವಾಭಾವಿಕ ಲೈಂಗಿಕ ದೌರ್ಜನ್ಯ) ಎಸಗಿರುವ ಆಘಾತಕಾರಿ ಘಟನೆ ಬೆಳಕಿಗೆ ಬಂದಿದೆ. ಈ ಸಂಬಂಧ ಜೈಲು ಅಧೀಕ್ಷಕರು ಸೇರಿದಂತೆ ಒಟ್ಟು 19 ಮಂದಿಯ ವಿರುದ್ಧ ಪೊಲೀಸರು ಎಫ್‌ಐಆರ್ ದಾಖಲಿಸಿದ್ದಾರೆ. ಆ ಕುರಿತ ವರದಿ ಇಲ್ಲಿದೆ:
ಮಾದಕ ದ್ರವ್ಯ ನೀಡಿ ಕೃತ್ಯ:
ಪ್ರಕರಣವೊಂದರಲ್ಲಿ ನ್ಯಾಯಾಲಯದಿಂದ ಖುಲಾಸೆಗೊಂಡು ಜೂನ್ 12 ರಂದು ಜೈಲಿನಿಂದ ಬಿಡುಗಡೆಯಾದ ನಂತರ ಸಂತ್ರಸ್ತ ಯುವಕ ತನ್ನ ಕುಟುಂಬದವರಿಗೆ ನಡೆದ ಘಟನೆಯನ್ನು ವಿವರಿಸಿದ್ದಾನೆ. ಅದರಂತೆ, ಸಂತ್ರಸ್ತ ಯುವಕನ ತಂದೆ ನವೆಂಬರ್ 12 ರಂದು ರಾಂಚಿಯ ಖೇಲ್‌ಗಾಂವ್ ಪೊಲೀಸ್ ಠಾಣೆಯಲ್ಲಿ ಲಿಖಿತ ದೂರು ದಾಖಲಿಸಿದ್ದಾರೆ.
ಆ ದೂರಿನ ಅನುಸಾರ, ಜೈಲಿನಲ್ಲಿದ್ದ ಕೆಲವು ಕೈದಿಗಳು ಯುವಕನಿಗೆ ಬಲವಂತವಾಗಿ ಸೀರೆ ಉಡಿಸಿ, ಮೇಕಪ್ ಮಾಡಿ ಮಹಿಳೆಯಂತೆ ವೇಷ ಹಾಕಿಸಿದ್ದಾರೆ ಎಂದು ಆರೋಪಿಸಲಾಗಿದೆ. ನಂತರ ಆತನಿಗೆ ಪ್ರಜ್ಞೆ ತಪ್ಪುವಂತಹ ದ್ರವ ಪದಾರ್ಥ ನೀಡಿ, ಪ್ರತ್ಯೇಕ ವಾರ್ಡ್‌ಗಳಿಗೆ ಎಳೆದೊಯ್ದು ಮೂರು ಬಾರಿ ಸಾಮೂಹಿಕವಾಗಿ ಅಸ್ವಾಭಾವಿಕ ಲೈಂಗಿಕ ದೌರ್ಜನ್ಯ ಎಸಗಿದ್ದಾರೆ ಎಂದು ಎಫ್‌ಐಆರ್‌ನಲ್ಲಿ ಉಲ್ಲೇಖಿಸಲಾಗಿದೆ. ಮುಂದುವರೆದು, ಸಂತ್ರಸ್ತ ಯುವಕ ಈ ಬಗ್ಗೆ ಜೈಲಿನ ವಾರ್ಡ್ ಇನ್-ಚಾರ್ಜ್‌ಗೆ ಲಿಖಿತ ದೂರು ನೀಡಿದ್ದರೂ, ಅವರು ದೂರಿನ ಪತ್ರವನ್ನು ಹರಿದು ಹಾಕಿ ಹಲ್ಲೆ ನಡೆಸಿದ್ದಾರೆ ಎಂದು ಆರೋಪಿಸಲಾಗಿದೆ. ಅಲ್ಲದೇ, ಸಂತ್ರಸ್ತನಿಗೆ ಸೂಕ್ತ ವೈದ್ಯಕೀಯ ಚಿಕಿತ್ಸೆಯನ್ನೂ ನಿರಾಕರಿಸಲಾಗಿದೆ ಎನ್ನಲಾಗಿದೆ.
3 ಬಾರಿ ನಡೆದ ದೌರ್ಜನ್ಯದ ವಿವರ
ಎಫ್‌ಐಆರ್‌ನಲ್ಲಿ ದಾಖಲಾಗಿರುವ ಮಾಹಿತಿಯ ಪ್ರಕಾರ, ಜೈಲಿನ ವಿವಿಧ ವಾರ್ಡ್‌ಗಳಲ್ಲಿ ಮೂರು ಪ್ರತ್ಯೇಕ ಸಂದರ್ಭಗಳಲ್ಲಿ ಈ ಕೃತ್ಯ ಎಸಗಲಾಗಿದೆ:
ಮೊದಲ ಘಟನೆ: ಆರೋಪಿ ಕೈದಿಗಳು ಯುವಕನಿಗೆ ಬಲವಂತವಾಗಿ ಸೀರೆ ಉಡಿಸಿ, ಮೇಕಪ್ ಮಾಡಿ ಮಹಿಳೆಯಂತೆ ವೇಷ ಹಾಕಿಸಿದ್ದಾರೆ. ಬಳಿಕ ಅಮಲು ಬರುವ ದ್ರವ ಕುಡಿಸಿ ಪ್ರಜ್ಞೆ ತಪ್ಪಿಸಿದ ನಂತರ, ವಾರ್ಡ್ ಸಂಖ್ಯೆ 3-A ಗೆ ಎಳೆದೊಯ್ದು ಸಾಮೂಹಿಕವಾಗಿ ಅಸ್ವಾಭಾವಿಕ ಲೈಂಗಿಕ ದೌರ್ಜನ್ಯ ಎಸಗಿದ್ದಾರೆ.
ಎರಡನೇ ಘಟನೆ: ರಾಮನವಮಿ ಹಬ್ಬದ ಆಸುಪಾಸಿನಲ್ಲಿ ಮತ್ತೆ ಅದೇ ರೀತಿ ಯುವಕನಿಗೆ ಮಹಿಳೆಯ ವೇಷ ಹಾಕಿಸಿ, ಮಾದಕ ದ್ರವ್ಯ ನೀಡಿ ವಾರ್ಡ್ ಸಂಖ್ಯೆ 3 ರಲ್ಲಿ ಸಾಮೂಹಿಕ ಅತ್ಯಾಚಾರ ಎಸಗಲಾಗಿದೆ.
ಮೂರನೇ ಘಟನೆ: ಸರಹುಲ್ ಹಬ್ಬದ ಸಂದರ್ಭದಲ್ಲಿ ಅದೇ ಗುಂಪಿನ ಕೈದಿಗಳು ಯುವಕನನ್ನು ವಾರ್ಡ್ ಸಂಖ್ಯೆ 4 ಮತ್ತು 5 ರ ಸಮೀಪಕ್ಕೆ ಎಳೆದೊಯ್ದು ಮೂರನೇ ಬಾರಿಗೆ ಲೈಂಗಿಕ ದೌರ್ಜನ್ಯ ನಡೆಸಿದ್ದಾರೆ.
ಮುಂದುವರೆದು, ಪ್ರಕರಣದಲ್ಲಿ 16 ಕೈದಿಗಳ ಜೊತೆಗೆ ಜೈಲು ಅಧೀಕ್ಷಕರು, ವಾರ್ಡ್ ಇನ್-ಚಾರ್ಜ್ ಮತ್ತು ಜೈಲು ಆಸ್ಪತ್ರೆಯ ವೈದ್ಯಾಧಿಕಾರಿಗಳನ್ನು ಆರೋಪಿಗಳನ್ನಾಗಿ ಹೆಸರಿಸಲಾಗಿದೆ. ಇದರೊಂದಿಗೆ, ದೌರ್ಜನ್ಯದಿಂದ ತೀವ್ರ ನೋವು ಮತ್ತು ಗಾಯಗಳಾಗಿದ್ದರೂ ಜೈಲು ಆಸ್ಪತ್ರೆಯ ವೈದ್ಯರು ಚಿಕಿತ್ಸೆ ನೀಡಲು ನಿರಾಕರಿಸಿದ್ದಾರೆ ಎಂದು ದೂರಲಾಗಿದೆ. ಅಲ್ಲದೇ, ಜೂನ್ 12, 2026 ರಂದು ನ್ಯಾಯಾಲಯದಿಂದ ಖುಲಾಸೆಗೊಂಡು ಬಿಡುಗಡೆಯಾಗುವಾಗ ನಡೆಸಬೇಕಾದ ಕಡ್ಡಾಯ ವೈದ್ಯಕೀಯ ತಪಾಸಣೆಯನ್ನೂ ಮಾಡಿಲ್ಲ ಎಂದು ಆರೋಪಿಸಲಾಗಿದೆ. ಏತನ್ಮಧ್ಯೆ, ಜೈಲಿನಿಂದ ಹೊರಬಂದ ನಂತರ ಯುವಕ ತೀವ್ರ ಮಾನಸಿಕ ಆಘಾತಕ್ಕೆ ಒಳಗಾಗಿದ್ದು, ತಡವಾಗಿ ಕುಟುಂಬದವರ ಬಳಿ ತನ್ನ ನೋವನ್ನು ಹೇಳಿಕೊಂಡಿದ್ದಾನೆ.