ಮುಂಬೈ: ಭಾರತಕ್ಕೆ ಭೇಟಿ ನೀಡಿರುವ ಅಮೆರಿಕದ ವಿದೇಶಾಂಗ ಕಾರ್ಯದರ್ಶಿ ಮಾರ್ಕೊ ರೂಬಿಯೊ, ಭಾರತವನ್ನು 'ಶಕ್ತಿಯುತ ಮತ್ತು ಪ್ರಭಾವಶಾಲಿ' ರಾಷ್ಟ್ರ ಎಂದು ಬಣ್ಣಿಸಿದರು. ಅಲ್ಲದೆ, ಭಾರತ-ಅಮೆರಿಕ ಸಂಬಂಧಗಳು 21ನೇ ಶತಮಾನದ ಸ್ವರೂಪವನ್ನು ನಿರ್ಧರಿಸಲಿವೆ ಎಂದು ಅವರು ಹೇಳಿದರು.
ಮುಂಬೈನಲ್ಲಿ ನಡೆದ 'ಫ್ರೀಡಂ 250 ರಿಸೆಪ್ಷನ್' (Freedom 250 Reception) ಕಾರ್ಯಕ್ರಮದಲ್ಲಿ ಮಾತನಾಡಿದ ರೂಬಿಯೊ, "ಇಂದು ಇಲ್ಲಿಗೆ ಮರಳಿ ಬಂದಿರುವುದು ನನಗೆ ದೊಡ್ಡ ಗೌರವದ ವಿಷಯ. ಇಂದಿನ ಪತ್ರಿಕಾಗೋಷ್ಠಿಯಲ್ಲಿ ಯಾರೋ ಒಬ್ಬರು, 'ಕೇವಲ ನಾಲ್ಕು ತಿಂಗಳ ಅಂತರದಲ್ಲಿ ನೀವು ಮತ್ತೆ ಭಾರತಕ್ಕೆ ಏಕೆ ಬಂದಿದ್ದೀರಿ?' ಎಂದು ಪ್ರಶ್ನಿಸಿದರು. ಅದಕ್ಕೆ ನಾನು ಹೀಗೆ ಉತ್ತರಿಸಿದೆ: ಮೊದಲನೆಯದಾಗಿ, ಇದು ವಿಶ್ವದಲ್ಲೇ ಅತಿ ಹೆಚ್ಚು ಜನಸಂಖ್ಯೆ ಹೊಂದಿರುವ ರಾಷ್ಟ್ರ. ಇದು ವಿಶ್ವದ ಅತ್ಯಂತ ಹಳೆಯ ಪ್ರಜಾಪ್ರಭುತ್ವ ವ್ಯವಸ್ಥೆಯನ್ನು ಹೊಂದಿದೆ. ಮತ್ತು ಇದು ಅತ್ಯಂತ ಬಲವಾದ ಭೌಗೋಳಿಕ-ರಾಜಕೀಯ (geopolitical) ಪಾಲುದಾರ ರಾಷ್ಟ್ರವಾಗಿದೆ."
"21ನೇ ಶತಮಾನದ ಕಥೆ ಮತ್ತು ಇತಿಹಾಸದ ಬಗ್ಗೆ ಯೋಚಿಸಿದರೆ, ಅದು ಈ ಪ್ರದೇಶದಲ್ಲಿಯೇ ರೂಪುಗೊಳ್ಳುತ್ತಿದೆ. ಮತ್ತು ಅದು ಈಗಲೇ ನಡೆಯುತ್ತಿದೆ. ಮುಂದೊಂದು ದಿನ ಯಾರಾದರೂ 21ನೇ ಶತಮಾನದ ಇತಿಹಾಸದ ಬಗ್ಗೆ ಪುಸ್ತಕ ಬರೆಯಬಹುದು. ಅದರಲ್ಲಿ ಜಗತ್ತಿನ ಇತರ ಪ್ರದೇಶಗಳ ಬಗ್ಗೆಯೂ ಒಂದು ಅಧ್ಯಾಯವಿರಬಹುದು. ಆದರೆ, 21ನೇ ಶತಮಾನವು ಒಳ್ಳೆಯದಕ್ಕಾಗಲಿ ಅಥವಾ ಕೆಟ್ಟದಕ್ಕಾಗಲಿ, ಈ ಪ್ರದೇಶದಲ್ಲಿ ನಡೆಯುವ ಘಟನೆಗಳಿಂದಲೇ ನಿರ್ಧಾರವಾಗಲಿದೆ. ನಮಗೆ ಈ ವಿಷಯ ತಿಳಿದಿದೆ," ಎಂದು ಅವರು ಹೇಳಿದರು.
ಅಮೆರಿಕ ಮತ್ತು ಭಾರತದ ನಡುವಿನ ಸಂಬಂಧ 21ನೇ ಶತಮಾನ ಹೇಗಿರಲಿದೆ ಎಂಬುದನ್ನು ಸಕಾರಾತ್ಮಕವಾಗಿ ರೂಪಿಸುತ್ತಿದೆ ಎಂದು ತಾವು ನಂಬುವುದಾಗಿ ರೂಬಿಯೊ ತಿಳಿಸಿದರು.
"ಅಮೆರಿಕ ಮತ್ತು ಭಾರತದ ನಡುವಿನ ಸಂಬಂಧವು 21ನೇ ಶತಮಾನದ ಸ್ವರೂಪವನ್ನು ಹಲವು ರೀತಿಯಲ್ಲಿ, ಸಕಾರಾತ್ಮಕವಾಗಿ ರೂಪಿಸುತ್ತಿದೆ ಎಂದು ನಾನು ದೃಢವಾಗಿ ನಂಬುತ್ತೇನೆ. ಇವು ಕೇವಲ ಸುಮ್ಮನೆ ಆಡಿದ ಮಾತುಗಳಲ್ಲ ಎಂಬುದನ್ನು ನಿಮಗೆ ಸಾಬೀತುಪಡಿಸುತ್ತೇನೆ." ಎಂದು ರುಬಿಯೊ ಹೇಳಿದ್ದಾರೆ.
ರೂಬಿಯೊ ಅಕ್ಟೋಬರ್ 20 ರಿಂದ 22 ರವರೆಗೆ ಭಾರತದಲ್ಲಿ ಮೂರು ದಿನಗಳ ಪ್ರವಾಸದಲ್ಲಿದ್ದಾರೆ. ಅವರು ಮಂಗಳವಾರ ಮುಂಬೈಗೆ ಆಗಮಿಸಿದ್ದು, ಬುಧವಾರ ಗುಜರಾತ್‌ಗೆ ತೆರಳಿ ರಿಲಯನ್ಸ್‌ನ ಜಾಮ್‌ನಗರ್ ಸಂಸ್ಕರಣಾಗಾರಕ್ಕೆ (refinery) ಭೇಟಿ ನೀಡಲಿದ್ದಾರೆ.