ಬೆಂಗಳೂರು: 'ದೇಶದಲ್ಲಿ ಅನೇಕ ರಾಜ ಹಾಗೂ ಮಹಾರಾಜರು ಜನಿಸಿದ್ದಾರೆ. ಅಂತಹ ಮಹಾನ್ ವ್ಯಕ್ತಿಗಳಲ್ಲಿ ಟಿಪ್ಪು ಸುಲ್ತಾನ್ ಸಹ ಒಬ್ಬರು. ಅವರ ಜಯಂತಿ ಆಚರಿಸಿದರೆ ತಪ್ಪೇನಲ್ಲ' ಎಂದು ಲೋಕಸಭೆಯಲ್ಲಿ ಕಾಂಗ್ರೆಸ್ ಸಂಸದೀಯ ನಾಯಕರಾಗಿರುವ ಮಲ್ಲಿಕಾರ್ಜುನ ಖರ್ಗೆ ಹೇಳಿದ್ದಾರೆ. ಚೌಡಯ್ಯ ಮೆಮೋರಿಯಲ್ ಹಾಲ್‍ನಲ್ಲಿ ನಡೆದ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಭಾಗವಹಿಸಿದ್ದ ಅವರು ಸುದ್ದಿಗಾರರ ಜತೆ ಮಾತನಾಡಿ,

ನಮ್ಮಲ್ಲಿ ನೂರೆಂಟು ಜಾತಿಗಳಿವೆ. ಪ್ರತಿಯೊಬ್ಬ ನಾಯಕನೂ ಒಂದೊಂದು ಜಾತಿಯಲ್ಲಿ ಹುಟ್ಟಿರುತ್ತಾರೆ. ಅಂತಹ ಮಹಾನ್ ನಾಯಕರ ಜಯಂತಿ ಮಾಡುವುದು ತಪ್ಪೇನಲ್ಲ. ಅದಕ್ಕೆ ವಿರೋಧ ಸಲ್ಲದು ಎಂದರು.
ಮೋದಿಗೆ ಪೂರ್ಣ ವಿರಾಮ: ಪ್ರಧಾನಿ ನರೇಂದ್ರ ಮೋದಿ ಅವರ ಶರವೇಗಕ್ಕೆ ದೆಹಲಿ ಚುನಾವಣೆಯಲ್ಲೇ ಅಲ್ಪವಿರಾಮ ಹಾಕಲಾಗಿತ್ತು, ಈಗ ಬಿಹಾರದ ಚುನಾವಣೆಯಲ್ಲಿ ಮೂರು ಪಕ್ಷದವರು ಸೇರಿ ಪೂರ್ಣ ವಿರಾಮಹಾಕಿದ್ದೇವೆ. ಅವರು ಇನ್ನು ಮುಂದೆ ಹೋಗಲು ಸಾಧ್ಯವಿಲ್ಲ ಎಂದು ಕುಟುಕಿದ್ದಾರೆ. ಬಿಹಾರದಲ್ಲಿ ಜೆಡಿಯು, ಆರ್‍ಜೆಡಿ, ಕಾಂಗ್ರೆಸ್ ಪಕ್ಷಗಳು ಸೇರಿ ಬಿಜೆಪಿಯನ್ನು ಸೋಲಿಸಿವೆ. ಮುಂದಿನ ದಿನಗಳಲ್ಲಿ ನಿತೀಶ್ ಕುಮಾರ್ ನೇತೃತ್ವದಲ್ಲೇ ಸರ್ಕಾರ ನಡೆಯಲಿದೆ ಎಂದರು.