ರಾಷ್ಟ್ರಮಟ್ಟದಲ್ಲಿ ಬಿಎಸ್ಪಿ ಮತಗಳಿಕೆಯಲ್ಲಿ ಇಳಿಕೆ; ಕರ್ನಾಟಕದಲ್ಲಿ ಏರಿಕೆ

ಮೈಸೂರು: ಇತ್ತೀಚೆಗೆ ಮುಗಿದ ಲೋಕಸಭೆ ಚುನಾವಣೆಯಲ್ಲಿ ರಾಜ್ಯದಲ್ಲಿ ಶೇಕಡಾ 6ರಷ್ಟು ಫಲಿತಾಂಶ ಪಡೆಯುವ ಗುರಿಯನ್ನು ಬಹುಜನ ಸಮಾಜ ಪಕ್ಷ ಇಟ್ಟುಕೊಂಡಿತ್ತು. ಆದರೆ ಅದು ಸಾಧ್ಯವಾಗಲಿಲ್ಲ.

ಆದರೂ ಕರ್ನಾಟಕದಲ್ಲಿ ಈ ಬಾರಿ ಬಿಎಸ್ ಪಿ ಸಾಧನೆ ಉತ್ತಮವಾಗಿದೆ ಎಂದೇ ಹೇಳಬಹುದು. ಶೇಕಡಾ 0.86ರಿಂದ ಶೇಕಡಾ 1.16ರಷ್ಟು ಫಲಿತಾಂಶದಲ್ಲಿ ಏರಿಕೆಯಾಗಿದೆ. ಆದರೆ ರಾಷ್ಟ್ರಮಟ್ಟದಲ್ಲಿ 2014ರಲ್ಲಿ ಬಂದ ಶೇಕಡಾ 4.14 ಫಲಿತಾಂಶದಿಂದ ಈ ಬಾರಿ ಶೇಕಡಾ 3.63 ಫಲಿತಾಂಶಕ್ಕೆ ಇಳಿದಿದೆ.

ಕಳೆದ ವರ್ಷ ಕರ್ನಾಟಕದಲ್ಲಿ ಒಬ್ಬರೇ ಒಬ್ಬ ಶಾಸಕರನ್ನಿಟ್ಟುಕೊಂಡು ಕಾಂಗ್ರೆಸ್-ಜೆಡಿಎಸ್ ಮೈತ್ರಿಕೂಟ ಸೇರಿಕೊಂಡಿತ್ತು. ಕೊಳ್ಳೆಗಾಲದಿಂದ ಆಯ್ಕೆಯಾಗಿದ್ದ ಎನ್ ಮಹೇಶ್ ಸಂಪುಟದಲ್ಲಿ ಕೂಡ ಸಚಿವ ಸ್ಥಾನ ಗಿಟ್ಟಿಸಿಕೊಂಡಿದ್ದರು. ಆದರೆ ಕೆಲವೇ ಸಮಯಗಳಲ್ಲಿ ಅವರು ಮಂತ್ರಿ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದರು.