ಶಿರಾ: ಶಿರಾ ಉಪಚುನಾವಣೆಯ ಬಿಜೆಪಿ ಅಭ್ಯರ್ಥಿ ಡಾ.ಸಿ.ಎಂ.ರಾಜೇಶ್ ಗೌಡ ಅವರು ಐಷಾರಾಮಿ ಕಾರುಗಳ ಪ್ರಿಯರಾಗಿದ್ದು, ರಾಜೇಶ್ ಗೌಡ ಅವರ ಬಳಿ ರೂ.1.27 ಕೋಟಿ ಹಾಗೂ ರೂ.52 ಲಕ್ಷ ಮೌಲ್ಯದ ಎರಡು ಬಿಎಂಡಬ್ಲ್ಯೂ ಕಾರುಗಳಿವೆ. ರೂ.34 ಲಕ್ಷ ಮೌಲ್ಯದ ಫೋರ್ಡ್, ರೂ.10.20 ಲಕ್ಷ ಮೌಲ್ಯದ ಹುಂಡೈ ಕಾರುಗಳನ್ನು ಹೊಂದಿದ್ದು, ಇವರ ಪತ್ನಿ ಡಾ.ತೇಜಸ್ವಿನಿ ಅವರ ಬಳಿಯೂ ರೂ.9.50 ಲಕ್ಷ ಮೌಲ್ಯದ ಹುಂಡೈ ಕಾರು ಇದೆ. 

ರಾಜೇಶ್ ಗೌಡ ಅವರು ಕೋಟ್ಯಾಧಿಪತಿಯಾಗಿದ್ದು, ರೂ.15.25 ಕೋಟಿ ಮೌಲ್ಯದ ಆಸ್ತಿಯನ್ನು ಹೊಂದಿದ್ದಾರೆ. ಇವರ ಪತ್ನಿ ಕೂಡ ರೂ.4.10 ಕೋಟಿ ಆಸ್ತಿಯನ್ನು ಹೊಂದಿದ್ದಾರೆ. 

ಉಪಚುನಾವಣೆ ಹಿನ್ನೆಲೆಯಲ್ಲಿ ಚುನಾವಣಾ ಆಯೋಗಕ್ಕೆ ರಾಜೇಶ್ ಗೌಡ ಅವರು ತಮ್ಮ ಆಸ್ತಿ ಕುರಿತು ಮಾಹಿತಿ ನೀಡಿದ್ದಾರೆ. ಈ ಮಾಹಿತಿ ಪ್ರಕಾರ, 2019-20ನೇ ಸಾಲಿನಲ್ಲಿ ರೂ.2.57 ಕೋಟಿ ಆದಾಯಗಳಿಸಿದ್ದಾರೆ. ಪತ್ನಿ ರೂ.48 ಲಕ್ಷ ಆದಾಯ ಹೊಂದಿದ್ದಾರೆ.

ರಾಜೇಶ್ ಗೌಡ ಅವರು ರೂ.9.92 ಕೋಟಿ ಚರಾಸ್ತಿ ಹಾಗೂ ರೂ.5.33 ಕೋಟಿ ಸ್ಥಿರಾಸ್ತಿ ಹೊಂದಿದ್ದರೆ, ಅವರ ಪತ್ನಿ ಬಳಿ ರೂ.2.80 ಕೋಟಿ ಚರಾಸ್ತಿ ಹಾಗೂ ರೂ.1.30 ಕೋಟಿ ಸ್ಥಿರಾಸ್ತಿ ಹೊಂದಿದ್ದಾರೆಂದು ತಿಳಿದುಬಂದಿದೆ.