ಲಂಡನ್: ಮೇ.17 ರಂದು ಜಗತ್ತಿನಾದ್ಯಂತ ಇರುವ ವಾಟ್ಸ್ ಆಪ್ ಗ್ರಾಹಕರು ತಾಂತ್ರಿಕ ದೋಷ ಎದುರಿಸಿದ್ದಾರೆ.
ಮೆಸೇಜ್ ಗಳನ್ನು ಸ್ವೀಕರಿಸುವುದಕ್ಕೆ ಹಾಗೂ ಲಾಗ್ ಇನ್ ಆಗುವ ವಿಚಾರದಲ್ಲಿ ತಾಂತ್ರಿಕ ದೋಷ ಎದುರಿಸಿದ್ದು, ವಾಟ್ಸ್ ಆಪ್ ವಿರುದ್ಧ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ ಎಂದು ಇಂಡಿಪೆಂಡೆಂಟ್ ವರದಿ ಪ್ರಕಟಿಸಿದೆ.
ಡೌನ್ ಡಿಟೆಕ್ಟರ್ ಎಂಬ ವೆಬ್ ಸೈಟ್ ನ ಪ್ರಕಾರ ಮಲೇಷ್ಯಾ ಹಾಗೂ ಸ್ಪೇನ್ ಗಳಲ್ಲಿ ಅತಿ ಹೆಚ್ಚು ತಾಂತ್ರಿಕ ದೋಷ ಎದುರಾದ ಪ್ರಕರಣಗಳು ವರದಿಯಾಗಿದ್ದು, ಕೆಲವೇ ವಾರಗಳಲ್ಲಿ ಎರಡನೇ ಬಾರಿಗೆ ಗ್ರಾಹಕರು ಈ ಸಮಸ್ಯೆ ಎದುರಿಸಿದ್ದಾರೆ ಎಂದು ತಿಳಿದುಬಂದಿದೆ.
ಮೆಸೇಜ್ ಕಳಿಸುವುದಕ್ಕೆ ಹಾಗೂ ಸ್ವೀಕರಿಸುವುದಕ್ಕೆ ಸಾಧ್ಯವಾಗದೇ ತಾಂತ್ರಿಕ ದೋಷ ಎದುರಿಸಿದ್ದ ಗ್ರಾಹಕರು ಟ್ವಿಟರ್ ನಲ್ಲಿ ವಾಟ್ಸ್ ಆಪ್ ವಿರುದ್ಧ ಅಸಮಾಧಾನ ವ್ಯಕ್ತಪಡಿಸಿದ್ದು, ಬೇರೆ ಮೆಸೆಜಿಂಗ್ ಆಪ್ ಗೆ ವರ್ಗಾವಣೆಗೊಳ್ಳುವುದಾಗಿ ಎಚ್ಚರಿಸಿದ್ದಾರೆ. ಮಲೇಷ್ಯಾ ಹಾಗೂ ಸ್ಪೇನ್ ನಲ್ಲಿ ಆದಂತೆಯೇ ಜರ್ಮನಿ ಹಾಗೂ ಯೂರೋಪ್ ಗಳಲ್ಲೂ ಸಹ ವಾಟ್ಸ್ ಆಪ್ ತಾಂತ್ರಿಕ ದೋಷ ಕಾಣಿಸಿಕೊಂಡಿದೆ.