ಲಂಡನ್: ವಿಂಬಲ್ಡನ್ ಭಾರತದ ಕೊನೆಯ ಭರವಸೆಯಾಗಿದ್ದ ಸಾನಿಯಾ ಮಿರ್ಜಾ ಅವರು ಮಿಶ್ರ ಡಬಲ್ಸ್ ಪಂದ್ಯದಲ್ಲಿ ಸೋಲುವ ಮೂಲಕ ಪಂದ್ಯಾವಳಿಯಲ್ಲಿ ಭಾರತದ ಸವಾಲು ಅಂತ್ಯಗೊಂಡಂತಾಗಿದೆ.
ಸಾನಿಯಾ ಮಿರ್ಜಾ ಅವರು ಮಿಶ್ರ ಡಬಲ್ಸ್ ವಿಭಾಗದ ಕ್ವಾರ್ಟರ್‌ಫೈನಲ್ ಪಂದ್ಯದಲ್ಲಿ ರೋಮೆನಿಯಾದ ಜತೆಯಾಟಗಾರ ಹೋರಿಯಾ ಟೆಕುವಾ ಜತೆ ಸೋಲನುಭವಿಸಿದರು. ಸಾನಿಯಾ ಮತ್ತು ಟೆಕುವಾ ಜೋಡಿ ಕ್ವಾರ್ಟರ್‌ಫೈನಲ್‌ನಲ್ಲಿ ಕೆನಡಾದ ಡೇನಿಯಲ್ ನೆಸ್ಟೋರ್ ಮತ್ತು ಫ್ರಾನ್ಸ್‌ನ ಕ್ರಿಸ್ಟಿನಾ ಮ್ಲಾಡೆನೋವಿಚ್ ಜೋಡಿ ವಿರುದ್ಧ 7-6 (7-5), 7-6 (7-5) ಸೆಟ್‌ಗಳ ಅಂತರದಿಂದ ಪರಾಭವ ಹೊಂದಿತು.
ಭಾರತ ಮತ್ತು ರೋಮೆನಿಯಾ ಜೋಡಿ ಪಂದ್ಯದಲ್ಲಿ ನಿರಂತರವಾಗಿ ತಪ್ಪುಗಳನ್ನು ಎಸಗಿದ್ದು ಪಂದ್ಯದಲ್ಲಿ ಸೋಲಿಗೆ ಪ್ರಮುಖ ಕಾರಣವಾಯಿತು. ದ್ವಿತೀಯ ಸೆಟ್‌ನಲ್ಲಿ ಸಾನಿಯಾ ಮತ್ತು ಟೆಕುವಾ ಜೋಡಿ ಎದುರಾಳಿಯ ಸರ್ವ್ ಎದುರಿಸುವಲ್ಲಿ ವಿಫಲವಾಯಿತು.ಅಲ್ಲದೆ ಸಾನಿಯಾ ಮಿರ್ಜಾ ಪರಿಣಾಮಕಾರಿಯಾದ ಸರ್ವ್ ಮಾಡಲಿಲ್ಲ. ಆದರೆ, ತೀವ್ರ ಹಣಾಹಣಿಯಿಂದ ಕೂಡಿದ ಪಂದ್ಯದಲ್ಲಿ ಆಕರ್ಷಕ ಪ್ರದರ್ಶನ ನೀಡಿದ ಕೆನಡಾದ ಡೇನಿಯಲ್ ನೆಸ್ಟೋರ್ ಮತ್ತು ಫ್ರಾನ್ಸ್‌ನ ಕ್ರಿಸ್ಟಿನಾ ಮ್ಲಾಡೆನೋವಿಚ್ ಜೋಡಿ ಸೆಮಿಫೈನಲ್‌ಗೆ ಹೆಜ್ಜೆ ಹಾಕಿತು.