ನವದೆಹಲಿ: ಭಾರತದ ಬ್ಯಾಡ್ಮಿಂಟನ್ ತಾರೆ ಸೈನಾ ನೆಹ್ವಾಲ್ ಮತ್ತೆ ವಿಶ್ವದ ನಂಬರ್ ಒನ್ ಪಟ್ಟಕ್ಕೇರಿದ್ದಾರೆ.

ಮಲೇಷಿಯನ್ ಓಪನ್ ಬ್ಯಾಡ್ಮಿಂಟನ್ ಚಾಂಪಿಯನ್‌ಶಿಪ್‌ನ ಸೆಮಿಫೈನಲ್ ನಲ್ಲಿ ಚೀನಾದ ಎದುರಾಳಿ ಲೀ ಸೂಜಿಯಾ ವಿರುದ್ದ ಸೋಲುವ ಮೂಲಕ ಎರಡನೇ ಸ್ಥಾನಕ್ಕೆ ಕುಸಿದಿದ್ದರು.

ಕಳೆದ ವಾರ ನಡೆದ ಸಿಂಗಾಪುರ್ ಓಪನ್ ಸೂಪರ್ ಸಿರೀಸ್ ನಿಂದ ವಿಶ್ವದ ನಂ.1 ಆರ್ಟಗಾರ್ತಿಯಾಗಿದ್ದ ಚೀನಾದ ಲೀ ಕ್ಷೆರುಯಿ ಅವರು ಹೊರ ಹೋದ ಪರಿಣಾಮ ಸೈನಾ ನೆಹ್ವಾಲ್ ಅವರು ಮತ್ತೆ ನಂಬರ್ ಒನ್ ಪಟ್ಟ ಅಲಂಕರಿಸುವಂತಾಗಿದೆ.

ಇತ್ತೀಚಿಗೆ ಇಂಡಿಯಾ ಓಪನ್ ಸೂಪರ್ ಸರಣಿ ಬಾಡ್ಮಿಂಟನ್ ಟೂರ್ನಿಯಲ್ಲಿ ಪ್ರಶಸ್ತಿ ಗೆಲ್ಲುವ ಮೂಲಕ ಸೈನಾ ಅವರು ವಿಶ್ವದ ನಂ.1 ಆಟಗಾರ್ತಿ ಎನಿಸಿದ್ದರು. ಈ ಪಟ್ಟಕ್ಕೇರಿದ್ದ ಭಾರತದ ಮೊದಲ ಮಹಿಳಾ ಕ್ರೀಡಾಪಟು ಎಂಬ ಹೆಮ್ಮೆ ಹೊಂದಿದರು. ಒಲಿಂಪಿಕ್ಸ್ ನಲ್ಲಿ ಕಂಚಿನ ಪದಕ, ಕಾಮನ್ ವೆಲ್ತ್ ನಲ್ಲಿ ಚಿನ್ನದ ಪದಕ ಪಡೆದಿರುವ ಸೈನಾ ಅವರು ಯುವ ಆಟಗಾರರಿಗೆ ಸ್ಪೂರ್ತಿಯಾಗಿದ್ದಾರೆ.