ಮಲಾಂಗ್ : ಭಾರತದ ಯುವ ಬ್ಯಾಡ್ಮಿಂಟನ್ ಆಟಗಾರ ಕೆ. ಶ್ರೀಕಾಂತ್ ಇಂಡೋನೇಷಿಯಾ ಮಾಸ್ಟರ್ಸ್ ಗ್ರಾಂಡ್ ಪ್ರಿಕ್ಸ್ ಬ್ಯಾಡ್ಮಿಂಟನ್ ಪಂದ್ಯಾವಳಿಯ ಪುರುಷರ ಸಿಂಗಲ್ಸ್ ವಿಭಾಗದಲ್ಲಿ ಪ್ರಶಸ್ತಿ ಸುತ್ತಿಗೆ ಧಾವಿಸಿದ್ದಾರೆ. ಆದರೆ, ಮಹಿಳೆಯರ ಸಿಂಗಲ್ಸ್ ವಿಭಾಗದಲ್ಲಿ ಪಿ.ವಿ. ಸಿಂಧು ಅವರ ಹೋರಾಟಕ್ಕೆ ತೆರೆಬಿದ್ದಿದೆ. ಇಲ್ಲಿನ ಗೆಡುಂಗ್ ಗ್ರಾಹ ಚಕ್ರವಾಲದಲ್ಲಿ ನಡೆಯುತ್ತಿರುವ 120,000 ಡಾಲರ್ ಮೊತ್ತದ ಪಂದ್ಯಾವಳಿಯಲ್ಲಿ ಶನಿವಾರ ನಡೆದ ಸೆಮಿಫೈನಲ್ ಪಂದ್ಯದಲ್ಲಿ ಅಗ್ರ ಶ್ರೇಯಾಂಕಿತ ಶ್ರೀಕಾಂತ್ ಸ್ಥಳೀಯ ಆಟಗಾರ ಗಿಂಟಿಂಗ್ ಆಂಟನಿ ವಿರುದ್ಧ 21-13, 21-19ರ ಎರಡು ನೇರ ಗೇಮ್ ಗಳಲ್ಲಿ ಗೆಲುವು ಸಾಧಿಸಿ ಫೈನಲ್‍ಗೆ ಅರ್ಹತೆ ಪಡೆದರು. ಕೇವಲ 37 ನಿಮಿಷಗಳ ಕಾಲ ನಡೆದ ಪಂದ್ಯದಲ್ಲಿ ಮೊದಲ ಗೇಮ್ ಅನ್ನು ಸುನಾಯಾಸವಾಗಿ ಜಯಿಸಿದ ಶ್ರೀಕಾಂತ್,ಎರಡನೇ ಗೇಮ್ ನಲ್ಲಿ ತುಸು ಪೈಪೋಟಿಯನ್ನು ಎದುರಿಸಬೇಕಾಯಿತು. ಈ ಗೆಲುವಿನೊಂದಿಗೆ ಗುಂಟೂರು ಮೂಲದ ಶ್ರೀಕಾಂತ್ ಆಂಟನಿ ವಿರುದ್ಧದ ವೃತ್ತಿಬದುಕಿನ ಮುಖಾಮುಖಿಯಲ್ಲಿ 1-1ರ ಸಮಬಲ ಸಾಧಿಸಿದ್ದಾರೆ.
ಸಿಂಧುಗೆ ನಿರಾಸೆ: ಇನ್ನು ಮಕಾವ್ ಓಪನ್ ಗ್ರಾಂಡ್ ಪ್ರಿಕ್ಸ್ ಗೋಲ್ಡ್ ಟೂರ್ನಿಯಲ್ಲಿಗೆಲುವು ಸಾಧಿಸಿ ಮಿಂಚು ಹರಿಸಿದ್ದ ಪಿ.ವಿ. ಸಿಂಧು ಕ್ವಾರ್ಟರ್ ಫೈನಲ್‍ನಲ್ಲಿ ಚೀನಾದ ಹೀ
ಬಿಂಗ್ಜಿಯಾವೊ ವಿರುದ್ಧ 23-21, 13-21ರಿಂದ ಸೋತು ಟೂರ್ನಿಯಿಂದ ಹೊರಬಿದ್ದರು.