ನವದೆಹಲಿ: ಅಂಪೈರ್ ಗಳ ಸಂವಹನ ಕೌಶಲ್ಯವನ್ನು ಉತ್ತಮಗೊಳಿಸಲು ಅಂಪೈರ್ ಅಭಿವೃದ್ಧಿ ಕಾರ್ಯಕ್ರಮದಡಿ ಬಿಸಿಸಿಐ ಅಭೂತಪೂರ್ವ ಪ್ರಯತ್ನ ನಡೆಸಿದೆ. ಇದಕ್ಕಾಗಿ ಪ್ರತ್ಯೇಕ ಇಂಗ್ಲೀಷ್ ತರಗತಿಗಳನ್ನು ಆಯೋಜಿಸಲಾಗಿದೆ.

ಜುಲೈ.23 ರಿಂದ ಬ್ರಿಟೀಷ್ ಕೌನ್ಸಿಲ್ ನ ತರಬೇತುದಾರರು 20 ಅಂಪೈರ್ ಗಳ ಮೊದಲ ಬ್ಯಾಚ್ ಗೆ ಇಂಗ್ಲೀಷ್ ಹೇಳಿಕೊಡಲಿದ್ದಾರೆ. ಈ ಕೋರ್ಸ್ ನ ಅವಧಿ 10 ದಿನಗಳಾಗಿದ್ದು ಆಗಸ್ಟ್ 1 ಕ್ಕೆ ಮುಕ್ತಾಯಗೊಳ್ಳಲಿದೆ. ಬ್ರಿಟೀಷ್ ಕೌನ್ಸಿಲ್ ಸಹಯೋಗದಲ್ಲಿ ಐಸಿಸಿಯಿಂದ ಈ ಕೋರ್ಸ್ ನ್ನು ರೂಪುಗೊಳಿಸಲಾಗಿದ್ದು ಮುಂಬೈ ನಲ್ಲಿರುವ ಬಿಸಿಸಿಐ ನ ಕೇಂದ್ರ ಕಚೇರಿಯಲ್ಲಿ ತರಗತಿಗಳು ನಡೆದಿದೆ.

ಐಸಿಸಿಯ ಎಲೈಟ್ ಪ್ಯಾನಲ್ ನಲ್ಲಿ ತಮಿಳುನಾಡಿನ ಎಸ್.ರವಿ ಏಕೈಕ ಪ್ರತಿನಿಧಿಯಾದ್ದು, ಇದಕ್ಕೂ ಮೊದಲು ಭಾರತದ ಯಾವುದೇ ಅಂಪೈರ್ ಗಳು ಐಸಿಸಿಯ ಗಣ್ಯರ ಪ್ಯಾನಲ್ ನಲ್ಲಿ ಸ್ಥಾನ ಪಡೆದಿರಲಿಲ್ಲ. ಈ ಗೌರವಕ್ಕೆ ಪಾತ್ರರಾಗಬೇಕಾದರೆ ಅಂತಾರಾಷ್ಟ್ರೀಯ ಕ್ರಿಕೆಟರ್ ಗಳೊಂಗಿಗೆ ನಿರರ್ಗಳವಾಗಿ ಇಂಗ್ಲೀಷ್ ಮಾತನಾಡಬೇಕಾಗುತ್ತದೆ. ಭಾರತದ ಅಂಪೈರ್ ಗಳ ಇಂಗ್ಲೀಷ್ ಸಂವಹನ ಕೌಶಲ್ಯವನ್ನು ಉತ್ತಮಗೊಳಿಸಲು ಬಿಸಿಸಿಐ ಕ್ರಮ ಕೈಗೊಂಡಿದ್ದು ಇಂಗ್ಲೀಷ್ ಸಂವಹನವನ್ನು ಉತ್ತಮಗೊಳಿಸುವ ತರಗತಿಗಳನ್ನು ಪ್ರಾರಂಭಿಸಿದೆ.

ಅಂಪೈರ್ ಗಳ ಸಮಗ್ರ ಅಭಿವೃದ್ಧಿಯಲ್ಲಿ ಇಂಗ್ಲೀಷ್ ಸಂವಹನವು ಒಂದಾಗಿದೆ. ಆಟಗಾರರು ಹಾಗೂ ಅಂಪೈರ್ ಗಳ ನಡುವೆ ಉತ್ತಮ ಹೊಂದಾಣಿಕೆ ಉಂತಾಗಲು ಕಾರಣವಾಗುತ್ತದೆ ಎಂದು ಬಿಸಿಸಿಐ ಕಾರ್ಯದರ್ಶಿ ಅನುರಾಗ್ ಠಾಕೂರ್ ಹೇಳಿದ್ದಾರೆ.