ಡೆನ್ ಬಾಷ್, (ಹಾಲೆಂಡ್): ಇಲ್ಲಿ ನಡೆಯುತ್ತಿರುವ ವಿಶ್ವ ಆರ್ಚರಿ ಚಾಂಪಿಯನ್ ಶಿಪ್ ನಲ್ಲಿ ಭಾರತದ ವನಿತೆಯರ ಕಾಂಪೌಂಡ್ ತಂಡ ತುರ್ಕಿಯನ್ನು ಮಣಿಸಿ ಕಂಚಿನ ಪದಕವನ್ನು ಜಯಿಸಿದೆ.
ಜ್ಯೋತಿ ಸುರೇಖಾ, ಮುಸ್ಕಾರ್ ಕಿರಾರ್, ರಾಜ್ ಕೌರ್ ಅವರನ್ನು ಒಳಗೊಂಡ ಭಾರತ ತಂಡ 229-226 ರಿಂದ ತುರ್ಕಿ ಯನ್ನು ಮಣಿಸಿ ಪದಕ ಗೆದ್ದಿತು.
ಇದಕ್ಕೂ ಮೊದಲು ಭಾರತ ಕ್ವಾರ್ಟರ್ ಫೈನಲ್ ನಲ್ಲಿ 219-213 ರಿಂದ ಹಾಲೆಂಡ್ ವಿರುದ್ಧ ಗೆಲುವು ಸಾಧಿಸಿತ್ತು. ನಾಲ್ಕರ ಘಟ್ಟದ ಪಂದ್ಯದಲ್ಲಿ ಭಾರತ 226-227ರಿಂದ ಅಮೆರಿಕ ತಂಡದ ವಿರುದ್ಧ ಸೋಲು ಕಂಡಿತು.
ತೈಪೆಯಿ, ಅಮೆರಿಕ ತಂಡವನ್ನು ಫೈನಲ್ ನಲ್ಲಿ ಮಣಿಸಿ ಚಾಂಪಿಯನ್ ಪಟ್ಟವನ್ನು ಅಲಂಕರಿಸಿದೆ.
ಪಂದ್ಯದ ಬಳಿಕ ಮಾತನಾಡಿದ ಜ್ಯೋತಿ "2017ರಲ್ಲಿ ಬೆಳ್ಳಿ ಪದಕ ಗೆದಿದ್ದೆವು. ಈ ಬಾರಿ ಅದಕ್ಕೆ ಉತ್ತಮ ಸಾಧನೆ ಮಾಡಬೇಕೆಂದು ಗುರಿ ಇತ್ತು. ಆದರೆ ಸಾಧ್ಯವಾಗಲಿಲ್ಲ. ಆದರೆ ಪದಕ ಗಳಿಸಿರುವುದು ಖುಷಿ ಕೊಟ್ಟಿದೆ" ಎಂದಿದ್ದಾರೆ.
ಇನ್ನು ಇದೇ ಪಂದ್ಯಾವಳಿಯಲ್ಲಿ ಭಾರತ ಪುರುಷರ ತಂಡ ಮೊದಲ ಚಿನ್ನದ ನಿರೀಕ್ಷೆಯಲ್ಲಿದ್ದು ಭಾನುವಾರದ ರಿಕರ್ವ್ ಪಂದ್ಯದಲ್ಲಿ ಚೀನಾವನ್ನು ಎದುರಿಸಲಿದೆ.