ತಿರುವನಂತಪುರ: ಮುಂಗಾರು ಮಾರುತ ನಿರೀಕ್ಷೆಯಂತೆ ಶನಿವಾರ ಕೇರಳ ಪ್ರವೇಶಿಸಿದೆ. ಈ ಮೂಲಕ ಮುಂಗಾರು ಮಾರುತ ವಿಳಂಬವಾಗಿ ಸುರಿಯಬಹುದೆನ್ನುವ ಆತಂಕ ನಿವಾರಣೆಯಾಗಿದ್ದು, ರೈತರ ಮೊಗದಲ್ಲಿ ಸಂತಸ ಮೂಡಿಸಿದೆ. ಸದ್ಯದ ಪರಿಸ್ಥಿತಿಯನ್ನು ಅವಲೋಕಿಸಿದರೆ ನೈಋತ್ಯ ಮಾರುತ ಇನ್ನಷ್ಟು ಪ್ರದೇಶಗಳಿಗೆ ಮುಂದುವರಿಯಲು ಅನುಕೂಲಕರವಾಗಿದೆ. ಮುಂದಿನ 48 ಗಂಟೆಗಳಲ್ಲಿ ಮುಂಗಾರು ಮಾರುತವು ಇನ್ನಷ್ಟು ಪ್ರದೇಶಗಳಿಗೆ ವಿಸ್ತರಿಸಲಿದೆ. ಸದ್ಯ ದಕ್ಷಿಣ ಅರಬ್ಬೀಸಮುದ್ರ, ಕೇರಳ, ಕರ್ನಾಟಕದ ಕರಾವಳಿ ಹಾಗೂ ದಕ್ಷಿಣ ಒಳನಾಡು ಮತ್ತು ತಮಿಳುನಾಡಿನ ಕೆಲ ಭಾಗಗಳಲ್ಲಿ ಉತ್ತಮ ಮಳೆಯಾಗಿದೆ ಎಂದು ಹವಾಮಾನ ಇಲಾಖೆ ಮಾಹಿತಿ ನೀಡಿದೆ.