ಮಾಸ್ಕೋ/ಕೇಪ್ ಕೆನವೆರಲ್: ಅಂತಾರಾಷ್ಟ್ರೀಯ ಬಾಹ್ಯಾಕಾಶ ಕೇಂದ್ರ ತಲುಪಲು ಶಾರ್ಟ್‌ಕಟ್ ಉಂಟಾ?
ಸ್ವಲ್ಪ ರಿಸ್ಕ್ ತೆಗೆದುಕೊಂಡ್ರೆ ಬಾಹ್ಯಾಕಾಶ ಕೇಂದ್ರ ತಲುಪಲು ಎಕ್ಸ್‌ಪ್ರೆಸ್ ಮಾರ್ಗಗಳೂ ಇವೆ ಎಂದು ರಷ್ಯಾ ಸಾಧಿಸಿ ತೋರಿಸಿದೆ. ಇದೇ ಮೊದಲ ಬಾರಿಗೆ ರಷ್ಯಾ ಶಾರ್ಟ್‌ಕಟ್ ಮೂಲಕ ಗಗನಯಾತ್ರಿಗಳನ್ನು ಬಾಹ್ಯಾಕಾಶ ಕೇಂದ್ರಕ್ಕೆ ತಲುಪಿಸುವಲ್ಲಿ ಯಶಸ್ವಿಯಾಗಿದೆ. ಈ ಮೂಲಕ ಬಾಹ್ಯಾಕಾಶ ಕೇಂದ್ರ ತಲುಪಲು ತೆಗೆದುಕೊಳ್ಳುತ್ತಿದ್ದ ಸಮಯದಲ್ಲಿ 45 ಗಂಟೆಗಳಷ್ಟು ಉಳಿತಾಯ ಮಾಡಬಹುದು ಎಂದು ತೋರಿಸಿಕೊಟ್ಟಿದೆ.
ಕಜಕಿಸ್ತಾನದ ಬೈಕೊನೂರ್‌ನ ಉಡ್ಡಯನ ಕೇಂದ್ರದಿಂದ ಮೂವರು ಗಗನಯಾತ್ರಿಗಳನ್ನು ಹೊತ್ತೊಯ್ದ ಸೊಯೆಜ್ ಗಗನನೌಕೆ ಕೇವಲ 6 ಗಂಟೆಗೂ ಕಡಿಮೆ ಅವಧಿಯಲ್ಲಿ ಬಾಹ್ಯಾಕಾಶ ಕೇಂದ್ರವನ್ನು ತಲುಪಿದೆ.
ಮೂರು ವರ್ಷದ ಹಿಂದೆ: ರಷ್ಯಾವು ಮೂರು ವರ್ಷದ ಹಿಂದೆಯೇ ಬಾಹ್ಯಾಕಾಶ ಕೇಂದ್ರವನ್ನು ತಲುಪಲು ಹೊಸ ಮಾರ್ಗಗಳ ಹುಡುಕಾಟ ಆರಂಭಿಸಿತ್ತು. ಆರಂಭದಲ್ಲಿ ಇಂಥದ್ದೊಂದು ಪ್ರಸ್ತಾಪ ಮುಂದಿಟ್ಟಾಗ ಇದರ ಸಾಧ್ಯಾಸಾಧ್ಯತೆ ಕುರಿತು ಸಂಶಯ ವ್ಯಕ್ತವಾಗಿತ್ತು. ಈ ಹಿನ್ನೆಲೆಯಲ್ಲಿ ಬ್ಯಾಲಿಸ್ಟಿಕ್ ಸ್ಪೆಷಲಿಸ್ಟ್‌ಗಳು ಹೊಸ ದಾರಿಯ ಕುರಿತು ಲೆಕ್ಕಾಚಾರ ಹಾಕಿದರು.
ರಾಕೆಟ್ ಮತ್ತು ಸೊಯೆಜ್ ಗಗನನೌಕೆಯ ಸಾಮರ್ಥ್ಯವನ್ನು ಪರಿಶೀಲಿಸಿದರು. ಆ ಬಳಿಕವಷ್ಟೇ ಈ ಎಕ್ಸ್‌ಪ್ರೆಸ್ ದಾರಿಗೆ ಗ್ರೀನ್ ಸಿಗ್ನಲ್ ನೀಡಲಾಗಿತ್ತು.