ಇಸ್ಲಾಮಾಬಾದ್: ಪಾಕಿಸ್ತಾನದ ಮೇಲೆ ಇಸ್ರೇಲ್ ದಾಳಿ ನಡೆಸಲಿದೆ ಎಂಬ ಸುಳ್ಳುಸುದ್ದಿಯನ್ನು ಓದಿದ ಪಾಕಿಸ್ತಾನದ ರಕ್ಷಣಾ ಸಚಿವ ಖ್ವಾಜಾ ಮೊಹಮ್ಮದ್ ಆಸಿಫ್ ಅವರು ಇಸ್ರೇಲ್ ಮೇಲೆ ಪರಮಾಣು ದಾಳಿ ಮಾಡುವ ಸಾಮರ್ಥ್ಯ  ಪಾಕಿಸ್ತಾನಕ್ಕೂ ಇದೆ ಎಂದು ಟ್ವೀಟ್ ಮಾಡಿದ್ದಾರೆ.

awdnews.com ಎಂಬ ಖಾಸಗಿ ವೆಬ್​ಸೈಟ್​ನಲ್ಲಿ ಸಿರಿಯಾಗೆ ಪಾಕಿಸ್ತಾನದ ಸೇನೆ ಆಗಮಿಸಿದರೆ ನಾವು ಪಾಕ್ ವಿರುದ್ಧ ಅಣ್ವಸ್ತ್ರ ಬಳಸುತ್ತೇವೆ ಎಂದು ಇಸ್ರೇಲ್ ರಕ್ಷಣಾ ಸಚಿವರು ತಿಳಿಸಿದ್ದಾರೆ ಎಂದು ಡಿಸೆಂಬರ್ 20 ರಂದು  ವರದಿ ಮಾಡಲಾಗಿತ್ತು. ಈ ಸುದ್ದಿಯ ಸತ್ಯಾಸತ್ಯತೆಯ ಕುರಿತಂತೆ ಅಧಿಕಾರಿಗಳಿಂದ ಮಾಹಿತಿ ಪಡೆಯದೇ ಕನಿಷ್ಠ ಪಕ್ಷ ಸುದ್ದಿಯ  ಪರಾಮರ್ಶೆ ನಡೆಸದ ಪಾಕ್ ರಕ್ಷಣಾ ಸಚಿವ ಖ್ವಾಜಾ ಮೊಹಮದ್ ಆಸಿಫ್ ಅವರು ತಮ್ಮ ಅಧಿಕೃತ  ಟ್ವೀಟ್ ಖಾತೆಯಲ್ಲಿ ಇಸ್ರೇಲ್​ಗೆ ಬೆದರಿಕೆ ಹಾಕಿದ್ದಾರೆ. ನಮ್ಮ ಬಳಿಯೂ ಅಣ್ವಸ್ತ್ರಗಳಿದ್ದು, ದಾಳಿ ನಡೆದರೆ ನಾವು ಸುಮ್ಮನಿರುವುದಿಲ್ಲ ಎಂಬುದನ್ನು ಇಸ್ರೇಲ್ ಮರೆಯಬಾರದು ಎಂದು ಟ್ವೀಟ್ ಮಾಡಿದ್ದಾರೆ.

ಇದಕ್ಕೆ ಪ್ರತಿಕ್ರಿಯಿಸಿರುವ ಇಸ್ರೇಲ್ ರಕ್ಷಣಾ ಇಲಾಖೆಮಾಜಿ ರಕ್ಷಣಾ ಸಚಿವರು ಈ ಹೇಳಿಕೆಯನ್ನು ನೀಡಿಲ್ಲ ಎಂದು ಆಸಿಫ್ ಟ್ವೀಟ್​ಗೆ ಉತ್ತರಿಸಿದೆ. ಜತೆಗೆ ವೆಬ್​ಸೈಟ್ ಪ್ರಕಟಿಸಿರುವ ವರದಿ ಸುಳ್ಳು ಎಂದು ಸ್ಪಷ್ಟಪಡಿಸಿದೆ.

ಆದರೆ ವೆಬ್ ಸೈಟಿನಲ್ಲಿ ಪ್ರಕಟವಾದ ಸುದ್ದಿಯಲ್ಲಿ ಇಸ್ರೇಲ್​ನ ಮಾಜಿ ರಕ್ಷಣಾ ಸಚಿವ ಮೋಸೆ ಯಾಲೂನ್ ಪಾಕ್ ವಿರುದ್ಧ ಬೆದರಿಕೆ ಹಾಕಿದ್ದಾರೆ ಎಂದು ತಿಳಿಸಲಾಗಿತ್ತು. ಆದರೆ ಪ್ರಸ್ತುತ ಇಸ್ರೇಲ್​ನ ರಕ್ಷಣಾ ಸಚಿವರಾಗಿ ಅವಿಗಡೋರ್  ಲಿಬೆರ್​ವುನ್ ಕಾರ್ಯ ನಿರ್ವಹಿಸುತ್ತಿದ್ದು, ಈ ವಿಚಾರ ತಿಳಿಯದ ಖ್ವಾಜಾ ಆಸಿಫ್ ಇಸ್ರೇಲ್ ದೆ ಬೆದರಿಕೆ ಹಾಕುವ ಮೂಲಕ ಇದೀಗ ಟ್ವಿಟರ್ ನಲ್ಲಿ ಗೇಲಿಗೊಳಗಾಗಿದ್ದಾರೆ.