ನ್ಯೂಯಾರ್ಕ್: 9 ವರ್ಷ ವಯಸ್ಸಿನ ಭಾರತೀಯ ಮೂಲದ ಅಮೆರಿಕನ್ ಹುಡುಗಿ ದೇಶದ ಅತ್ಯುನ್ನತ ವ್ಯಕ್ತಿಗೆ ಗರಮ್ ಮಸಾಲಾಯುಕ್ತ ಬರ್ಗರ್ ತಿನ್ನಲು ನೀಡುವುದು ಅಂದರೇನು? ಜಗತ್ತಿಗೇ ಹಿರಿಯಣ್ಣನಾಗಿರುವ ಅಮೆರಿಕ ಅಧ್ಯಕ್ಷ ಒಬಾಮ ಈ ಹುಡುಗಿಯನ್ನು ಶ್ವೇತಭವನಕ್ಕೆ ಊಟಕ್ಕೆ ಆಹ್ವಾನಿಸುವುದು ಅಂದರೇನು?

ಶ್ವಾಮ್ ಬರ್ಗ್‍ನಲ್ಲಿರುವ ಶ್ರೇಯಾ ಪಟೇಲ್ ಎಂಬ 9ರ ಹುಡುಗಿಯನ್ನು ವೈಟ್‍ಹೌಸ್‍ನಲ್ಲಿ ನಡೆಯುವ ನಾಲ್ಕನೇ ವರ್ಷದ ಕಿಡ್ಸ್ ಸ್ಟೇಟ್ ಡಿನ್ನರ್ ಸಂಭ್ರಮಕ್ಕೆ ಆಹ್ವಾನಿಸಲಾಗಿತ್ತು. 55 ಮಂದಿ ಆಹ್ವಾನಿತ ಬಾಣಸಿಗರಲ್ಲಿ ಈಕೆ ಅತಿ ಕಿರಿಯ. ಜು.10ರಂದು ನಡೆದ ಈ ಭೋಜನಕೂಟದಲ್ಲಿ ಒಬಾಮ, ಪತ್ನಿ ಮಿಷಲ್ ರೊಂದಿಗೆ ಈಕೆ ಭೋಜನ ಮಾಡಿ ಥ್ರಿಲ್ ಆಗಿದ್ದಾಳೆ. ಖುದ್ದು ದಂಪತಿಗಳು ಈಕೆಯನ್ನು ಉಪಚರಿಸಿ ಉಣ ಬಡಿಸಿದ್ದಾರೆ.

ಇದಕ್ಕೆಲ್ಲ ಕಾರಣವಾದದ್ದು ಇಲಿನೋಯ್ಸ್ ನಲ್ಲಿ ನಡೆದ ಕಿಡ್ಸ್ ಸ್ಟೇಟ್ ಡಿನ್ನರ್ ಎಂಬ ಹೊಸ ರುಚಿ ಸ್ಪರ್ಧೆಯಲ್ಲಿ ಶ್ರೇಯಾ ತಯಾರಿಸಿದ ಗರಮï ಮಸಾಲಾಯುಕ್ತ ಕ್ವಿನೋ ಬರ್ಗರ್ ಹಾಗೂ ಅದರೊಂದಿಗೆ ನೀಡಿದ ರಾಯಿತ. ಆಕೆ ತಯಾರಿಸಿದ ಬರ್ಗರ್ ತಿಂದ ಒಬಾಮ ಬಾಯಿ ಚಪ್ಪರಿಸಿ, ವಿಜೇತೆಯೆಂದು ಘೋಷಿಸಿ ಡಿನ್ನರ್ ಪಾರ್ಟಿಗೆ ಆಹ್ವಾನಿಸಿದ್ದರು.