ಇಸ್ಲಾಮಾಬಾದ್: ಭಾರತದಲ್ಲಿ ಮುಸ್ಲಿಮರನ್ನು ಶಿವಸೇನೆ ಕಡೆಗಣಿಸಿರುವ ಹಾಗೆ ಪಾಕಿಸ್ತಾನದಲ್ಲಿ ಹಿಂದೂಗಳನ್ನು ಕಡೆಗಣಿಸುವುದಿಲ್ಲ ಎಂದು ಪಾಕಿಸ್ತಾನ ತೆಹರಿಕ್-ಇ-ಇನ್ಸಾಫ್ (ಪಿಟಿಐ) ನ ಅಧ್ಯಕ್ಷ ಇಮ್ರಾನ್ ಖಾನ್ ವಚನ ನೀಡಿದ್ದಾರೆ.
ಉಮರ್ಕೋಟ್ ನಲ್ಲಿ ದೀಪಾವಳಿ ಹಬ್ಬ ಆಚರಿಸಲು ಸಾರ್ವಜನಿಕರೊಂದಿಗೆ ಅವರು ಪಾಲ್ಗೊಂಡಿದ್ದರು ಎಂದು ಡಾನ್ ಪತ್ರಿಕೆ ವರದಿ ಮಾಡಿದೆ.
"ಪಿಟಿಐ ಸರ್ಕಾರದಡಿ ಹೊಸ ಪಾಕಿಸ್ತಾನ ಹೊರಹೊಮ್ಮಲಿದೆ. ಇಲ್ಲಿ ತೊಂದರೆ ನೀಡಲು ಪೊಲೀಸರನ್ನು ಬಳಸುವುದಿಲ್ಲ. ನ್ಯಾಯ ಉಳಿಯಲಿದೆ ಹಾಗೂ ಎಲ್ಲ ಪ್ರಾಂತ್ಯಗಳಿಗೂ ಸಮಾನ ಹಕ್ಕು ನೀಡಲಾಗುವುದು" ಎಂದು ಖಾನ್ ತಿಳಿಸಿದ್ದಾರೆ.
"ನಮಗೆ ಖೈಬರ್ ಪಖ್ತುಂಕ್ವ ಪರೀಕ್ಷೆಯಿದ್ದಂತೆ. ಇಲ್ಲಿನ ಜನರಿಗೆ ಉತ್ತಮ ಜೀವನ ನಡೆಸಲು ಕನಿಷ್ಠ ಸೌಲಭ್ಯಗಳನ್ನು ಒದಗಿಸಿ ನಮ್ಮ ಸಾಮರ್ಥ್ಯ ಸಾಬೀತುಪಡಿಸಲಿದ್ದೇವೆ" ಎಂದು ಅವರು ಹೇಳಿದ್ದಾರೆ.
ಭ್ರಷ್ಟಾಚಾರದ ಖಾಯಿಲೆಯಿಂದ ನರಳುತ್ತಿರುವ ಪಾಕಿಸ್ತಾನಕ್ಕೆ ಮುಕ್ತ ಮತದಾನವಷ್ಟೇ ಮಾರ್ಗ ಎಂದು ಕ್ರಿಕೆಟರ್ ಆಗಿದ್ದ ಈಗ ರಾಜಕಾರಣಿಯಾಗಿರುವ ಇಮ್ರಾನ್ ಖಾನ್ ಹೇಳಿದ್ದಾರೆ.
ಇದಕ್ಕೂ ಮುಂಚೆ ಪಾಕಿಸ್ತಾನ ಪ್ರಧಾನಿ ನವಾಜ್ ಶರೀಪ್ ಕೂಡ ದೀಪಾವಳಿ ಸಂಭ್ರಮದಲ್ಲಿ ಪಾಲ್ಗೊಂಡು ಶುಭಾಶಯ ಕೋರಿದ್ದರು.