ಬೀಜಿಂಗ್: ಹೊಸದಾಗಿ ವಿವಾಹವಾದ ಚೀನಾ ದಂಪತಿಗಳು ತಮ್ಮ ಹಳೆಯ ಫೋಟೊಗಳನ್ನು ತಿರುವಿ ಹಾಕುತ್ತಿರಬೇಕಾದರೆ, ವಿವಾಹಕ್ಕೂ ಮುನ್ನ 14 ವರ್ಷಗಳ ಹಿಂದೆ ಇಬ್ಬರ ಕುಟುಂಬದ ಸದಸ್ಯರೂ ಕಾಕತಾಳಿಯವಾಗಿ ಒಂದೇ ಪ್ರದೇಶಕ್ಕೆ ಭೇಟಿ ನೀಡಿದ್ದು ಫೋಟೋದಲ್ಲಿ ದಾಖಲಾಗಿರುವುದು ಕಂಡುಬಂದಿದೆ.

ಪತಿಯ ಬಾಲ್ಯದ ಫೋಟೋಗಳನ್ನು ನೋಡುತ್ತಿದ್ದ ಲು-ಯಿಂಗಿನ್ ಗೆ ಆ ಫೋಟೋದ ಹಿನ್ನೆಲೆಯಲ್ಲಿ ತನ್ನ ತಾಯಿ ನಿಂತಿರುವ ದೃಶ್ಯ ದಾಖಲಾಗಿರುವುದು ಕಂಡುಬಂದಿದೆ. ನವಿವಾಹಿತ ಚೀನಾ ದಂಪತಿಗಳ ಪ್ರಕಾರ ಇಬ್ಬರ ಕುಟುಂಬದವರು 2000 ರಲ್ಲಿ ವುಕ್ಸಿ ನ ಲಿಂಗ್ ಮೌಂಟೇನ್ ನಲ್ಲಿರುವ ಬೃಹತ್ ಬುದ್ಧನ ಪ್ರತಿಮೆ ವೀಕ್ಷಿಸಲು ಬಂದಿದ್ದಾರೆ. ಆಗ ಲು-ಯಿಂಗಿನ್ ನ ಪತಿ ಝಾಂಗ್ ಹಿಡಾಂಗ್ ಗೆ ಇನ್ನೂ 14 ವರ್ಷ ವಯಸ್ಸು. ಝಾಂಗ್ ಫೋಟೋ ಗೆ ಪೋಸ್ ನೀಡಿದ್ದ ಪ್ರದೇಶದ ಆಸುಪಾಸಿನಲ್ಲಿ ಲು-ಯಿಂಗಿನ್ ನ ತಾಯಿ ನಿಂತಿರುವುದು ಫೋಟೋದಲ್ಲಿ ಆಕಸ್ಮಿಕವಾಗಿ ದಾಖಲಾಗಿದೆ. ಇದನ್ನು ಪರಿಶೀಲಿಸಿದಾಗ ಲು-ಇಂಗಿನ್ ನ ತಾಯಿಯೇ ಆ ಫೋಟೊದಲ್ಲಿರುವ ಮಹಿಳೆ ಎಂಬುದು ಸ್ಪಷ್ಟವಾಗಿದ್ದು, ಕಾಕತಾಳೀಯಕ್ಕೊಂದು ಒಳ್ಳೆಯ ನಿದರ್ಶನ ದೊರೆತಂತಾಗಿದೆ.