ಕ್ಯಾಲಿಫೋರ್ನಿಯಾ: ಮಾಧ್ಯಮ ಕಚೇರಿಗೆ ಆಗಮಿಸಿದ್ದ ವಿಶೇಷ ಅತಿಥಿ ಕೆಲಕಾಲ ಸುದ್ದಿ ಓದುತ್ತಿದ್ದ ನಿರೂಪಕರನ್ನು ತಬ್ಬಿಬ್ಬುಗೊಳಿಸಿತ್ತು. 

ಸುದ್ದಿಮನೆಯಲ್ಲಿ ಕೆಲವೊಮ್ಮೆ ಅಚ್ಚರಿ ಘಟನೆಗಳು ನಡೆಯುವುದು ಸಾಮಾನ್ಯ. ಇದೇ ರೀತಿ ಅಮೆರಿಕದ ಕ್ಯಾಲಿಫೋರ್ನಿಯಾದ ಸ್ಯಾನ್ ಡಿಯಾಗೋದಲ್ಲಿ ಮಾಧ್ಯಮ ಕಚೇರಿಗೆ ಆಗಮಿಸಿದ್ದ ವಿಶೇಷ ಅತಿಥಿ ಕೆಲಕಾಲ ಸುದ್ದಿ ಓದುತ್ತಿದ್ದ ನಿರೂಪಕರನ್ನು ತಬ್ಬಿಬ್ಬುಗೊಳಿಸಿತ್ತು. ಹೌದು.. ಸ್ಯಾಂಡಿಯಾಗೋದಲ್ಲಿರುವ ಕೆಎಫ್ಎಂಬಿ ಟಿವಿ ಕಚೇರಿಗೆ ಆಗಮಿಸಿದ ಕಡುಕೆಂಪು ಹಕ್ಕಿ (Scarlet Bird) ನೇರವಾಗಿ ಸುದ್ದಿ ನೀಡುತ್ತಿದ್ದ ನಿರೂಪಕರ ತಲೆ ಮೇಲೆ ಕುಳಿತುಕೊಳ್ಳುವ ಮೂಲಕ ಕೆಲಕಾಲ ಗೊಂದಲದ ವಾತಾವರಣ ನಿರ್ಮಾಣ ಮಾಡಿತ್ತು. 

ಮೊದಲಿಗೆ ನಿರೂಪಕಿನಿಚೆಲ್ ಮಡಿನಾ ಅವರ ತಲೆ ಮೇಲೆ ಕುಳಿತ ಪಕ್ಷಿ ಬಳಿಕ ಪಕ್ಕದಲ್ಲೇ ಇದ್ದ ಮತ್ತೋರ್ವ ನಿರೂಪಕ ಎರಿಕ್ ಕಹ್ನೆಟ್ ನ ಮೇಲೆ ಕುಳಿತುಕೊಂಡಿತು. ಈ ಘಟನೆ ನ್ಯೂಸ್ ರೂಂನಲ್ಲಿದ್ದ ಸಿಬ್ಬಂದಿಗಳನ್ನು ಕೆಲಕಾಲ ನಗೆಗಡಲಲ್ಲಿ ತೇಲಿಸಿತ್ತು. ಕಳೆದ ಫೆಬ್ರವರಿ 24ರಂದು ಈ ಘಟನೆ ನಡೆದಿದ್ದು, ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.

ಕೆಎಫ್ಎಂಬಿ ಟಿವಿ ಕಚೇರಿಯಿಂದ ಸಮೀಪದಲ್ಲೇ ಸ್ಯಾನ್ ಡಿಯಾಗೋ ಮೃಗಾಲಯವಿದ್ದು, ಅಲ್ಲಿಂದಲೇ ಪಕ್ಷಿ ದಾರಿ ತಪ್ಪಿ ಬಂದಿರಬೇಕು ಎನ್ನಲಾಗಿದೆ.